السلام عليكم
لاهنتوا يا أخوان من لديه خبرة بالموضوع فليتفضل مشكور
أنا عندي كلية تقنية وتعينت عام 1426 على رقم وكيل رقيب أشغلها برتبة عريف مع انهم في البداية قالوا لي وكيل رقيب بس الرجاجيل غيروا هرجتهم مدري ليه بس مضطر وقتها وقلنا يلا لقمة العيش ولووو وللمعلومية سنة 1425 و سنة 1427 ولحد الآن الكلية التقنية يعطونهم وكيل رقيب يعني جات على حظي أو الشغله ماني داري فيها لف ودوران على العموم جات الترقية وترقيت لوكيل رقيب على طول وما طولت سنتين وترقيت المشكلة عندي في السنتين هذي هل يحق لي أطالب فيها أو أرفع تظلم بحقوقي وكيل رقيب أو تعويض مثلاً أبغى أعرف الطريقة لو أحد يدلني أكون له شاكر ومقدر .. ما خلص الحكي للحين فيه مواااال طويل عريض باقي واللي هو راح يحجوني بشغلة واللي هي يقولون لي وقتها انت موقع ومتنازل اووك ما عندي مشكلة بس النظام لمن يكون ماشي عليك وعلى غيرك هنا الوضع يكون عادي لكن لمن يكون اللي بعدك ماخذ حقه وزياده هنا المشكلة بالنسبة لي أحس اني انظلمت وانهظم حقي.. اللحين اللي دخلوا بعدي مترقين رقباء أوائل الله يوفقهم هذا ما يهمني وخصوصا اني قدمت فصل عام 1434 في مرحلة شهر 11 لسبب لقيت وظيفة مدنية ووافقوا على فصلي ما تأخروا ولا دقيقه قالوا لي بس انت توحي وش تسوي قلت اي نعم وكتبوا بناءاً على طلبي .. قدمت معروضي الساعه 1.30 الظهر وبالليل بعد صلاة المغرب استلمت صورة من قراري بيدي سريعين ما شاء الله عليهم والله وخصوصاً وقتها كانوا مداومين على وقت مرابطة والكل موجود فتسهلت أموري حقيقه أشكرهم على سرعة فصلي بناءاً على طلبي وفقهم الله ..
السؤال هل يحق لي المطالبه بحقوقي عن تلك السنين كفروقات في الراتب وما إلى ذلك وتعويضي بما يرونه مناسب وإلا أنسحب وأسكت وأحمد الله على كل حال ..
أرجوا افادتي أشكي لمين وأرفع لمين ؟؟؟

للملعومية أنا كنت بالقوات البرية في لـ17 مجموعة المهندسين

انا مثلك معي كلية مجتمع ومتعيين جديد هذي السنة على رقم وكيل رقيب ورتبتي عريف مع انه زملائي بالوحدة بنفس تاريخ تعييني معهم كلية مجتمع نفس الشهادة وحطوهم وكلاء رقباء .

الله يعينك .. أجل المشاكل كثيرة
شف بقولك شغله اللي حدني وحدك وقتها لقمة العيش بس والله انها تغبن يخوي .. غيري نفس مستواي وياخذ أحسن مني ما أحسد أحد بس العدل مطلوب مهما كان ..
انت تعتبر اداري نفس الطريقة صارت لي وصارت لأخوي كمان اللحين كلنا كليه تقنية ومتخرجين سوا أنا وياه أنا أخذت السادسه ولله الحمد وهو عطوه الخامسه .. الفرق انه هو اداري وأنا فني هنا الفرق والتصنيف موجود منذو مبطي في الخدمة المدنية الوضع هنا ما يزعل وعادي تصنيف وموجود وقدام عينك من قبل تجي ... بس العسكرية على أي أساس يصنفون من رؤوسهم .. وزي ما في الخدمة المدنية تصنيف ورونا اياه والا ناس عن ناس تفرق .. لعب في لعب ..
وتأكد قبل من شغلة شهادة اداريه وفنيه لأنها تفرق كمان والله يوفق الجميع ويعوضنا خير

نصيحة لك من أخ مجرب قبلك اطلع وانزل ولا تخلي طريقة لا تعيش حياتك الوظيفيه مغبون .. والضباط أعلمك ترى ما في أسوأ منهم والله يحسدك حتى في شربة المويه ولا راح يعطيك وجه ولا يعيرك أي اهتمام لمن تجي تقوله هالشيء أنا عانيت من هالشيء قبلك حسبي الله عليهم
إلا من رحم الله منهم الزين فيهم يعطيك ابتسامه استهزاء واستحقار وزي اللي يقول بلط بحر ويحطمك .. تبغى نصيحتي لا يردك إلا الرياض ياخي حقك ماهم متفضلين عليك بشيء انت صاحب حق .. لحق عمرك والا تنازل وعش يومك وارضى ما كتبه الله انت مخير
والله يدلك

اولا الله يكون بعونك يوفقك وين ماكنت

ثانيا سؤالي غير الموضوع وياليت ترد علي


ممكن تقولي كيف سلاح المهندسين من ناحية دوام
وكيف تخصص الوقاية من اسلحة الدمار الشامل
وكيف رواتبهم