السلام عليكم ورحمة الله وبركاته
كتبت موضوع سابق يخص هالوظيفه
ماني مرتاحه فيها ابدا , والجميع اصر علي اني اكمل اشتغل فيها
عشان الخبره
ضغطت على نفسي واستمريت
والحين على نهاية الشهر الثاني ونفس الشي لو اسحب عليهم عادي لاني بفترة التجربة
وللاسف كل يوم اسواء من الثاني
والجميع يقولون لي استمري لكني والله يعلم بحالي دخلت في حالة كابه وحيره بين اني اكمل او اطلع
مقدر اضغط على نفسي زياده الاجواء سيئه جداً
ولكن الخبره مهمه ايضاً

لغتي الانجليزيه بسيطه جداً واحس اني راح اتورط معهم لانهم طلعوا اللي كانت تساعدني باللغه ظلما وبدون ادنى سبب
وقالوا عشان السعوده , ويشهد ربي ان السعوديين بالمستشفى ينعدون عد كلهم اجانب
اتمنى اي احد يقرا موضوعي ينصحني هل اطلع او استمر ! ويعطيني اسباب
لكن انا فعلا دخلت حالة كآبه مقدر اكمل وخايفه اطلع واندم

الارزاق بيد الله .. حطيها بين عيونك واشتري راحتك


3 شركات طلعت من عندهم ومن الشركات الكبار القوية .. بسبب اني ما ارتحت نفسياً وفيه عنصرية الا اني حاط حاجة في بالي ان الرزق بيد الله .. واتوكل عليه .. ولا تهمني الخبرة والراتب دام اني ماني مرتاح .. أنا لست عبد لاحد .. انا انسان حر .. والرزق بيد الله

طلعت ووالله ان اكثر فترة قعدت عاطل فيها 3 شهور .. بسبب اني ماسعيت تكاسلت والحمدلله انا الان رزقني الله بوظيفة في شركة كبيرة وراتب الحمدلله ماكنت اتوقعه وبيئة محترمة وناس اخلاق .. وكل هذا فضل من الله ورزق



( أشتري راحتك - والرزق بيد الله ) هذي خليها بين عيونك مهما كان قدامك من مغريات.

شوفي يااختي الراحه النفسيه مهمه جدا كثير ناس جاهم القولون واعتلال نفسي كله من الوظايف والبيئه اذا مو مريحة

بس اذا تقدرين تتحملين فتره بسيطه اقلها سنه علشان تحصلين على خبره والفتره الحاليه كثفي البحث عن وظيفه ثانيه

الخبره مهمه جدا , واذا وضعك معهم جدا مزري ومتعب استقيلي وربك بيعوضك انتي الي تقدرين تحددين هل في امكانيه الاستمرار معهم او لا

دام مو مرتاحه اطلعي وخصوصا انتي في فترة تجربه لسا ماندعمتي ولو اندعمتي ماكملتي الفترة الي تحرمك من الدعم مره ثانيه

يعني عندك فرص تلاقي وظيفه احسن من وظيفتك هذي

اختي انا الي ضيعني مثلك اول ماتوظفت فرحت بعد عطاله دامت 5 سنوات اول شهر تحملت الي صاير وثاني شهر انتقدت وتكلمت والكل يقولي اجلسي ومن الي معاي بالدوام وكمان مشرفة القسم كلهم شجعوني اجلس وكل شهر اقول بيتحسن الوضع وكل ماله المشاكل والظلم بيزيد لدرجة قدمت استقالتي وارتحت بعد ماتعبت جسديا ونفسيا قرابة السنتين وانا اتعذب وينلعب بعصابي وطلعت انصحك صحتك بالدنيا كلها انا جربت مثلك والحين ندمانه اني ماستقلت من زمان وكسبت صحتي

بذا الزمن مافي شي اسمه خبره الحين يدورون الي ماندعمو او الي ماكملو دعمهم بشغلهم السابق

انا عندي شهايد ودورات وخبره قرابة السنتين واول سؤال لي اندعمتي قبل كذا ؟؟؟ وطبعا انا اندعمت من الموارد فيقولوها بوجهي الحين القطاع الخاص يفضلو الغير مدعومات حتى لو ماعندها خبره وهذا كلام مشرفة التوظيف بطاقات

اذا والله تقدري تتحملي ضغوطات العمل لين تنهلكين ويجيك مرض يكون سببه نفسي كملي معاهم
اما لو تبغين تكسبين صحتك وراحتك وكرامتك استقيلي وارتاحي الرزق مو بيد احد بيد ربي انا مثلك اول شي فكرت فيه بعد ماستقيل كيف وضعي وهل بلاقي وظيفة بس لما تتركي الشغل فترة وتنسي وبتلاقي شغل بأذن الله

انا كنت اشتغل بشركة وشغلي كان بالموارد البشريه بس الي اعرفه مايقدرون مايعطون موظف مستحقاته وان ماعطوهم يروحون يشتكونهم لمكتب العمل بالنسبه لك مالك مستحقات نهاية خدمة لانك بتخرجي قبل السنه واتوقع استحقاقك للاجازة السنويه يكون بعد سنه

طيب انتي قدمي طلب اجازة براتب واذا وافقو بيعطونك راتبك كامل حق شهر قبل الاجازه بنص الاجازه اقطعيها وقدمي استقالتك والله ليتجننون وخصوصا انهم وافقو يعطونك اجازه السنويه قبل وقتها واخذتي مستحقات الاجازة وفيك ماتحضري فترة الانذار 30 يوم انا حضرت كذا يوم تكرمن مني واحترام للبنت الي بشرح لها شغلي فهمته ب اسبوع وسحبت عليهم طبعا عطوني حقي بالاسبوع لاني داومت في فترة الانذار


أقرأو
الثقافه العماليه - اعرف حقوقك وكُن محاميًا لنفسك!‎

http://www.laboreducation.gov.sa/

وعليكم السلام ورحمة الله وبركاته

اولا: شي الله يكون بعونك أختي العزيزه , ومقدر وضعك كثير وأسأل الله انه يعينك ياسميع يامجيب.

ثانيا: كل الناس ما أرتاحت بوظايفها , موضوع الجانب النفسي أذا عطيناه اكبر من حجمه حيتعبنا ونخسر أشياء كثيره بحياتنا.

ثالثا: بالنسبه لقولك ما أرتحت : ياليت تحددي شي معين ما أرتحتي فيه بحيث نناقشه وناصل بحل أن شاء الله . أما قولت أنا ما أرحت وبس , انا مقدر وضعك لكن الحياه صعبه يأ اختي ولازم نشقى شويه بحياتنا من شان الراتب ومن شان يكون معنا خبره وهيك.

رابعا: بالنسبه للغه الانجليزية موضوعها بسيط أنتي أجتهدي وح تتطور لغتك حبه بحبه , ولا تخافي منها اثناء الدوام , وحتى لو فصلوك بسببها , انتي اجتهدي والتوفيق بيد الله , أهم شي انك ماتتركي العمل بدون مايفصلونك هم.

خامسا: نصيحتي أستمري فيها وبالوقت هذا قدمي على وظائف ثانيه الى أن تنتقلي لوظيفه أفضل منها ترتاحي فيها نفسيا وماديا وهيك.

سادسا: الاستخاره ثم الاسستشاره , استخيري ربك ثم خذي رأي بابا وماما و أخوانك وشوفي أيش يقولو لك .

ختاما: أشوف انا الهدوء وأخذ الموضوع بتأني واصبري شويه وتبين لك كل حاجه أن شاء الله , أهم شي لاتتعبي نفسك بالتفكير وتعطي الامور اكبر من حجمها , وبالتوفيق لك أختي .

استقالة فورية وهذية فيها كلام الخبرة مو شرط مثل ماوظفك المستشفي بدون خبرة بتحصلين غيرة
الرزق بيد الله

اذا كملتي سنتين خلاص اطلعي مثلي
الزم ماعلى الواحد كرامته بلا ذل واهانة من الاجانب وليته ع راتب يسوى

استخيري واهم شي الراحه النفسيه

فتره التجربه 6 شهور تقدر تفصل باي وقت بدون مايكون عليك التزام او حتى لو رفضو استقالتك

اهم شي بالعمل الراحه النفسيه واذا ماحصلتها الشغل مامنه فايده

لكن الاسوء منها الجلسه بالبيت والبطاله لين تحصل وظيفه


شوف وش احسن الاسوء بالنسبه لك وقرر

انا اشوف تستمرين وتقدمين في اكثر من مكان لا تطلعين الى تحصلين شغل ثاني ... الا اذا مره ما تقدرين تكملين استقيلي
انا طلعت من شركة بنفس التفكير ما ارتحت واستقلت بس حسيت شوي ندمان الوظايف والحياة والراتب له طعم