السلام عليكم ورحمة الله وبركاته

جبت لكم مشروع للفائده واتمنى ينال اعجابكم وحلو للي يبي يشتغل عليه ولا يحتاج عمال اما بالنسبه للبنات اخوها او اي سعودي واذا مره عامل والله ييسرها

المهم المشروع هوا محل الاسر المنتجه هذا والله فيه مكسب طيب ومرضي بذات لو كان فيه اكله او شي مميز وطبعا ""من واقع تجربه ""

المشروع يحتاج :
1- ثلاجة تبريد للكيك والحلى والخخ ..
2-ديكور للمحل ( يفتح النفس )
3- ارفف لوضع الاكل

لو مثلا اختك او امك او انت ممتاز ف اكله معينه / كنافه ، حلى اللوتس ، حلى الاوريو وما الى ذلك ... تختص ف هذا الشي وتخليه زي الشي الرئيسي ف المحل ومافي مشكلة لو تحط اكثر من شي (( هذا شي بالنسبه لك )) واما الارفف تأجرها على اسر منتجه وتقدر تاخذ نسبه من الي ينباع او بس تاخذ ايجار الرف انت براحتك

مميزات المشروع :
ما يحتاج له عامل لو انت بتشتغل بالمحل
ما يكلف واجد مجرد ديكور و ثلاجه و ايجار
تقدر تطلع حق ايجار المحل من تاجير الارفف

سلبيات المشروع :
الاكل الي يبقى ما ينباع تضطر انك تصرفه وهذي مشكله بسيطه مو العائق الكبير


تجربتي حسب ما شفت :
اشتغلت مع عائله يوم واحد مساعده فاتحين محل صغير تقريبا 5 في 5
ماشاء الله رغم ان المنطقه لما الواحد يشوفها يقول مين بيجيك هنا الا انه ربك مسخر الارزاق من اول ساعه بدأت العصر الدخل كان 660 ريال ، وبعدها الى اخر الليل وصل 1400 وهذا والمحل صغير جدا والطلب بقووه يمكن 20 زبون جو يبغون كنافه ومخلصه ولو بحلف اكثر من 20 وغير كذا ناس تجي تسال فيه تاجير ارفف غير الي يبغى كنافه بالطلب يعني كبيره وكذا ..

لو نحسب التكاليف نقول نص القيمه يعني من 1400 يكون 700 مكسب في 30 يوم 21 الف نشيل منها مثلا 3 الاف حق ايجار يبقى 18 الف نقول الكهرباء الف بقى 17 نقول راتب العامل 3 الاف يبقى 14 الف

ولو مثلا صافي الارباح ف اليوم 500 ونفس الحسبه راح يكون الدخل الشهري في الجيب 8 الاف

هذي احتمالات وممكن تكون ناجحه وممكن لا


ختاما حبيت اعلمكم بربح محل نفس الفكره جمب المحل الي اشتغلت فيه بعد م جلست مع اليمني وطبعا المحل الي يشتغل فيه اكبر من المحل الي انا فيه وسالته عن دخله في اليوم جاوبني وقال طايح مو زي قبل قلت كم يعني ؟؟ قال في اليوم تقريبا 5 الاف الى 7 الاف !! قلت له : سكران انت هذا طايح ؟؟ قال ايه بداية ما فتحنا المحل كان يوصل 13 الف في اليوم قلت : مستحيل كان كل واحد فتح محل كذا وعاش ، قال : لا مو كل الدخل لنا اغلب البيع للاسر المنتجه واحنا ناخذ نسبه عليه يعني حول 3 ، 4 دخلنا والباقي للاسر يتوزع

هذا مشروع ممتاز ولو كان عندي المال لفتحت مشروع زي هذا واشتغلت عليه بنفسي واتقاول مع اي واحد فنان ف الطبخ يسوي لي اكل واعطيه حقه بحكم اني متغرب عن اهلي لاجل الدراسه

فاللي عنده الفرصه انصحه بالتجربه والتجاره يبغى لها مغامره ما راح تنجح وانت جالس وكل فكره جديده ومشروع جديد خفت الخوض فيه وفكرت في سلبياته قبل ايجابياته ..

اسف على الإطاله .. والسلام عليكم ورحمة الله وبركاته 💜

جزاك الله خير مشروع ناجح والمخاطره قليله لأنه يعتمد على انتاج الاسر فقط يعني انت ماتخسر شي بس جالس تحاسب الزباين