السلام عليكم


عندي الاسبوع الجاي مقابلة مع الراجحي للخدمات الادارية

وظيفة خدمة عملاء عبر الهاتف

الي عنده علم عن هالشركة وكيف دوامهم ياليت يفيدني

وعليكم السلام ورحمة الله وبركاته

محدثك كان بالراجحي خدمة عملاء عن طريق الهاتف وما كملت معهم 3 اشهر وراح اكتب لك كل شي بإذن الله

طبعا بالمقابلة راح يدخلونك على شخص اسمه خالد قصير شوي واسمراني راح يسولف معك سوالف سخيفه وراح يعطيك ورقة

رقم وعليه كم صفر يقول كم ,, وتقوله مليون او مليونين او عشره مليون او مية مليون وهكذا ,, وراح تعديها بسهولة لانها مثل ما قلت سخيفه

بعدها راح يرسلونك فوق لقسم الكول سنتر ,, واحتمال تقابل مدير القسم واحتمال لا ,, بالنسبة لي قابلته وبعض زملائي لا وكلنا انقبلنا

طبعا اذا راح يدخلونك عليه راح يقول عرفني عليك وأيش شهادتك مع ان السي في تبعك بيكون معه وبين يدينه لكن يبي يسال كذا

راح يقول ليه جيت عندنا بالذات ,, وش هدفك ,, ليه ما كملت دراستك ؟؟ ليه نسبتك او معدلك نازل يتلقف شوي ,, اخر شي راح يعطيك مجلة ,, ويحدد لك نص ويقولك اقراه يبي يشوف النطق كيف عندك وكيف مخارج الحروف واذا خلصت راح يعطيك ورقة فيها بياناتك واسمك وفيها توقعيه وبتشوف بنفس الورقه هل اهو موافق او رافض ,, اذا وافق تنزلها تحت لنفس الشخص اللي قابلته اول مره اسمه خالد

وتعطيه الورقه اللي استلمتها من مدير القسم راح يشوفها بعدها راح يعطيك ورقتين الاولى فحص طبي والثانيه الفحص الجنائي ,,

الفحص الطبي يتعاملون معه الراجحي يعني تفحص وتمشي واهم يرسلون نتائج فحصك للراجحي اما الفحص الجنائي لا تفحص وتجيهم بعد 3 ايام تستلم النتيجة هل عندك سوابق او لا ,, والله يعينك على الفحص الجنائي ياهو بيوصخ يدينك بالشحم الاسود

المهم بعد ما تستلم الفحص الجنائي وتوديه للراجحي بعد كم يوم راح يرسلون لك رسالة بحضور اجتماع تعرفيني مع شخص سوداني وراح يعلمك ب انواع العملاء ومن هالاشياء تخلص الاجتماع انت واللي مقدمين معك بعدها بكم يوم يرسلون لك رسالة بالمباشره تجيهم ,, ويعطونك العقد وتقراه وتوقع عليه وبعدها يعطونك ورقتين بخصوص السماعات مع الكيبل وقيمتها تقريبا 500 ريال راح يخصمونها من راتبك ,, بعد ما تخلص يرسلونك لقسم الهاتف ويحطون شخص يكون مشرف عليك وعلى المجموعه اللي معاك وراح يعلمك بالنظام وهالاشياء ان شاء الله بعدها راح ياخذكم ويحط كل واحد منكم او اثنين عند موظف بالكول سنتر عشان تشوف كيف يتكلم مع العملاء وكيف يتكلمون العملاء معه انتم راح تسمعون فقط وفي حالة كان مافي ضغط اتصالات راح يخليك ترد على العملاء وتتكلم معهم

والتدريب راح يكون مدته اسبوعين :
اوقات التدريب الصباحي يكون من 8 الى 3 والمسائي من 4 الى 10 او 11
بعد ما تخلص التدريب اللي مدته اسبوعين راح يجي المشرف المسؤول على مجموعتك ويعطيك اليوزر تبعك والباسوورد تبع النظام
وياخذكم ويسوي لكم اختبار على الكمبيوتر بخصوص اللي درسته هالاسبوعين وانت تجاوب وكل الاسئلة بتكون مريت عليها انت تحاول تركز وقت التدريب لان الاختبار لو تجيب تحت 90 درجة تعتبر راسب ولا تشيل هم لا تجاوب بسرعه وخلك على اقل من مهلك لان المشرف راح يمر عليك ويضبطك بالاجابات ويساعدك عشان تجتاز وبعض الشباب اللي معك ماراح يقصرون ان شاء الله

تجتاز الاختبار ,, بعدها راح تمسك السماعه لحالك وترد على العملاء والله يعينك على بعضهم

احتمال باليوم تاخذ لك 100 مكالمة ,, والله يعينك على يوم الرواتب لانه بيكون ضغط مكالمات بشكل مو طبيعي توصل 150 مكالمة بالراحه بيصدع راسك وبتتعب اذنك من السماعات ,, فيه بعض عينات العملاء بيقولك : ليه م نزلتوا راتبي ,, ليه سحبتوا نص راتبي ,, يا حراميه ليه سرقتوا فلوسي ,, وبيجي اللي يسب ويلعن بالبنك وفيك وانت مالك ذنب طبعا ما تقدر ترد عليه ولازم تحترمه وما تقدر تسكر بوجهه لان العميل دايم معه حق ههههههههههه وكل ما اعطيت العميل معلومه غلط او إفادة غلط راح تتحاسب عليهها ويجيك مشرفك ويسمعك مكالمتك اللي غلطت فيها ويعدل معلومتك المغلوطه ,, طبعا ثلاث اشهر هذي للتجربه لك الحق انك تخطئ فيها بالمعلومات لان توك جديد وفترة تجربه ,, لكن انا انخصم نص يوم من راتبي بسبب معلومه خطأ وما تستاهل بفترة التجربه عكس كلامهم اللي قالوه ما يخصم منك اي شي ,,

بخصوص اوقات الدوام / النظام شفتات والويكند غير ثابت مو شرط يكون جمعه وسبت / احتمال يكون اربعاء وخميس / احتمال يكون احد وثلاثاء يعني مو شرط برضوا يكونوا مع بعض وتداوم جمعه وسبت

الدوام 8 ساعات وكلها شفتات

احتمال تجي

6 الصباح تطلع 2 الظهر / 7 وتطلع 3 / 8 وتطلع 4 / 9 وتطلع 5 / 10 وتطلع 6 المغرب / 12 ظهر وتطلع 8 العشاء

واحتمال تداوم 4 العصر تطلع 12 الليل / احتمال تداوم 6 المغرب تطلع 2 الفجر / تداوم 8 وتطلع 4 الفجر / عادي جداً ههههههههه

والله يعينك على اجهزتهم لان نصهاا معطوبهه ما تشتغل ولا صلحوها بعد ههههههه والله يعينك على بعض المشرفين جوالك يا ويلك اذا مسكته خصوصا اذا كان ما عندك مكالمات وبعضهم ياويلك اذا كلمت زميلك والمكالمة عندهم محسوبه يعني كل عميل لا تتجاوز معه اكبر من دقيقتين ونص وراح يوضح هالشي عندهم ويطلع انك متأخر والبريك مقطع مدته ربع ساعه لازم تاخذه بوقته لا تاخذه قبل وقته ولا بعده لانها مشكله عندهم

طبعا الراتب راح يكون 4500 ريال 2000 هذي حافز اداء بفترة التجربه 3 شهور ما راح تاخذها ’’ تخلص ثلاث اشهر تبدأ تاخذها لكن لازم تكون دقيق جدا وما تغلط لان الغلطه عندهم احتمال تروح نصها راح يحاولون يطلعون عليك اي غلطه حتى لو صغيره عشان ما تاخذها ,,

وقت المقابلة راح يقولون لك اذا كانت شهادتك ثانويه سنتين وراح تترسم ويحطونك بفرع من فروعهم واذا كنت دبلوم سنه وحده وتترسم .

اتمنى اني وفقت في إفادتك بكل شي ,, وكل شي مر علي شخصياً وان شاء الله ما اكون نسيت شي ,,

بالتوفيق لك والله يرزقك يا غالي من واسع فضله

بخاطري اقدم عندهم فرع النساء شلون عطوني ايميل او رقم ؟

الله يسعدكم افيدوني ابي اقدم على بنك الراجحي نساء با الطائف قدمت في موقعهم بس ما احد رد علي اتمني اني اتوظف فية معي شهادة بكالوريس ادارة اعمال وحاسب الي مدة سنتين ابي رقم او احد يساعدني واذ يبغى اتعاب بعد الوظيفة اعطية واذ لوجة الله الله يرزقة من حيث لا يحتسب انا يتيمة ومحتاجة