السلام عليكم ,

انا ولله الحمد قدمت على قرض من ريادة عشان افتح محل وجتني رسالة اليوم الثاني تفيد بالقبول المبدئي وموعد للمقابلة الشخصية ,

ابي اعرف وش اجراءاتهم بعد المقابلة في حال القبول النهائي بحول الله وقوته هل راح يتاخرون ولا كيف

وللاسف حاطين رقم للاستفسار ولا لقيت احد يرد علي

الي عنده علم يفيدني جزاه الله خير

عليكم السلام ورحمه الله وبركاته



انا ماعندي معلومات بس حبيت ارد علي موضوعك وارفعه عشان يجي من يفيدك ..


تحياتي لك

هذا رقم رياده بالرياض


0112546770

حتى أنا قدمت لأخوي
محتاجين معلومات عن المقابله في رياده

__________________
سبحان الله وبحمده

الف مبرووك يا شباب ..

المقابله بسيطه وسهلة كل الي عليكم تجمعون معلومات عن نشاط الاتصالات ..

مثلا اسعار الجملة لأجهزة الايفون والجلكسي واسعار الاكسسوارات وكذلك ركزوا على نوع التقديم الي تريدونه ..

مثلا تبي تفتح صيانة ركز على جمع معلومات عن عدة الصيانة وعن اعطال الصيانة الاكثر شيوعاً ..

واذا تبي تفتح بيع فقط ركز على اسعار الجلكسي و الايفون وكذلك عن الفرق بين الجلكسي والايفون ..

لا تنسى تعبي البيانات في موقع رياده عن مشروع وركز على رفع قيمة الايجار هذي مشكله لازم تحرص انك تحلها من بدري لا تخلي الايجار يقل بأي حال عن 50 الف ريال ..

حيسئلك اول شي تكلم عن نفسك وش شهادتك وين اشتغلت وهكذا وعلاقة عملك في الاتصالات حاول تربطها بشكل جميل ..

وركز على ان الاتصالات قطاع مربح وفيه دخل وانك ترغب بالمساهمة في نجاح حملة التوطين ..

قطاع الجوالات ربحه كبير جدا بس المشكلة الحالية الي كلنا نواجهها نحن من سبقناكم بالتقديم هي ايجار المحل ما اهتمينا فيه وحطيناه 30 الف واقل ايجار حصلته الان 45 الف ريال ..

فهالنقطة مهمه جدا يا شباب لان دفعة الايجار لازم تجيب عقد ايجار بنفس المبلغ فاحرص انه يكون عالي شوي ..

بالنسبه للقبول النهائي لجنة المقابلة الشخصية يعطونك نتيجة المقابلة و بعد القبول تدخل دورة دراسة جدوى لمدة خمس أيام يكون معاك انت والمقبولين مشرف من ريادة يتابع دارسة الجدوى خطوة بخطوة الى حد اخر يوم من الدوره يعطيك الأعتماد وترسل الى بنك التسليف

أنا قدمت عليهم يوم الخميس في الليل .. تمام ؟؟
المهم أمس جاتني رسالة بالقبول المبدئي ومكتوب في الرسالة " علماً بأن القبول النهائي يعتمد على سلامة سجلك الإئتماني ( سما ) "
قلت غريب بهالسرعة !!
اليوم جاتني رسالة منهم مكتوب فيها " يؤسفنا إبلاغك بعدم تجاوزك الفحص الإئتماني للأسباب التالية . وجود سجل تجاري أو أكثر "
يا شيخ انصدمت ههههههه
أنا قبل فترة مطلع سجل تجاري " لقافةً " يعني ما كان هناك غرض يحتاج إني أطلعه بالسرعة اللي طلعته فيها
دخلت على موقعهم وجيت بسوي له شطب ما عرفت ومحتاس معه
المشكلة انه منتهي ويبغاله تجديد وشكل فيه فلوس عشان الشطب والله ورطان ماني عارف وش اسوي
جيتكم أفضفض ههههههه
والله يوفقك يا عزيز اذا فكيت محل وظفني معك معي شهادة اساسيات صيانة الجوال ههههههه

الله يوفقكم جميعا ياشباب

قطاع الاتصال مربح جدا وخصوصا الصيانة والاكسسوارات

اهم شيء ياشباب ان العميل اذا صلح عندك شيء متعطل لازم تعطيه تصليح 100 %
واعطه ضمان على تصليحك

لان البعض اذا صلح شيء يكون البعض ينصب انه صلح له وبعد مايوصل للبيت يشوفه ماصلح شيء


والله حصلت معي قبل فترة بعد اصدار امر بالتوطين على السعوديين 100 %

رحت محل جوالات عندي بيت الشاحن مايشحن جوالي ايفون
وقال لي الموظف السعودي 100 ريال تصليح

واكيد معه يمني او هندي يصلح له في العزبة او السكن
وقال لي تعال بعد العشاء لاني رحت له العصر

وجيت العشاء واشحن باكثر من شاحن وماشحن معي
وبعدها شحن معي بشاحن ابو عشرة ريال

وقال لي غيرنا لك الكيبل الداخلي

والله اني دفعت 100 وانا مو راضي

اذا كان الكيبل صلحه وكان صادق معي فعسى الله ان يبارك له بغض النظر عن خسارتي
واذا نصب علي فان شاء الله مايهتنى بها

وانا ما الوم الموظف , الوم الفني اللي يخلي السعودي في الواجهه

فنقطة انتبهوا لها

لازم تعطون ضمان على صيانتكم حتى العميل يشعر بالرضا ويرجع لكم مرة ثانية
ويعمل لكم تسويق عند الاخرين بالمصداقية والضمان وهذه اهم شي

الله يوفقكم جميعا ويبارك لكم في ارزقاكم يارب

صراحة عاجز عن شكركم جميعا على المعلومات المفيدة شكرا لكم

وان شاءالله يحقق لكم جميع ماتتمنون يارب