السلام عليكم.
فصلوني من العمل والحمدلله قبل خمس شهور والان باذن الله ابي ادخل العمل الحر بدون مذلة أحد. فاليوم ان شاء الله بدفع عربون لمحل موجود في الشرقية بحي جديد يمكن فيه 40 فلة مسكونة ولا في الحي اي محل تجاري قائم لقيت لي مجمع محلات وناوي استرزق الله المحل عبارة عن فتحة دورين الدور اللي تحت مساحته 85 تقريبا وفوق فيه نص دور تقريبا ابي اخذ فتحتين جنب بعض وافك الجدار تكون المساحة 170 تحت وفوق تقريبا 60 متر سعر الفتحتين ب 50 ألف.. وناوي اسويها تموينات (سوبر ماركت صغير) .

انا جديد في البزنس الشخصي ولا افقه شي بس ان شاء الله الواحد بيخاف على حلاله وبيتواجد بشكل شبه دايم.
رأيكم في الفكرة تستاهل او اغير النشاط؟ فتحتين او تكفي فتحة؟ هل سعره مناسب؟ كيف طريقة السيطرة على نظام البقالة ؟ كم احتاج عامل؟ (ان شاء الله بيكون فيه عامل للتوصيل المنزلي) هل اضمن الثلاجات من الشركات نفسها بدون ما اشتري؟ الدور الثاني اقدر اخلي نشاطه اخر تحت نفس مظلة البقالة ؟ (مثلا قرطاسية مصغرة او محل خضار بس ما تكون في السجل؟)
ثقلت عليكم ولكم خالص شكري وتقديري .

السلام عليكم
الله يعوضك باللي خير من الوظيفه
ابتدء بفتحه واحده فقط بتكفيك وتزود ان شاءالله
اذا ماتقدر تتفرغ للبقاله انصحك تترك الفكره وتبحث عن نشاط اخر
البقاله تحتاج تفرغ تام لتستفيد

باختصار اقول لك اصرف نظر عن الموضوع تماما

الله يوووووفقك يارب أستخر قبل كل شئ وحط ببالك قاعدة أنه لازم تتفرغ لهالشئ

افا يا هل الخبرات وينكم تساعدون اخوكم ولكم الدعوة.
قربوا لا عدمتكم

وانت صدقت اللي قالك يبيع بأكثر من خمسه الاف في اليوم ؟
وعلى فرض انه صادق مو شرط تكون زيه !!

عموما لاسباب كثيرة قلت لك اصرف النظر من ضمنها موقعك مو تمام وشو حي فيه 40 فيلا
البقالة اذا ماكانت في موقع تمام ماتسوى

احسب مصاريفك التشغيلية الشهرية بشكل سريع
ايجار 4200
فاتورة كهرباء ماراح تقل عن 2500 ريال لان كله ثلاجات وفريزرات ومكيفات
راتب العامل خلنا نقول 1500
مصاريف ورسوم حكومية خلنا نقول 300 ريال ( وياعالم بيجي زيادة ولا لا )
500 ريال هامش مصاريف عامة وتلفيات وصيانة وانتهاء تاريخ صلاحية .... الخ
الاجمالي 9000 ريال شهريا

يعني يبي لك تبيع يوميا بالفين ريال عشان تغطي مصاريف التشغيل فقط

نصيحة اشتغل في بنده او التميمي وخذلك 5000 شهريا وتأمين طبي وبونص وعمولات احسن من بقاله في حي ناشئ يمكن ماتبيع في اليوم ب 500 ريال او حتى الف ريال

فيه نقطة مهمه المبيعات لازم تكون بدون بطايق السوا وموبايلي يعني مثلا اذا المبيعات 5 الاف 3 الاف منها بطايق يعني مبيعاتك 2000 السوا ربحها هامشي مره