المشاركة الأصلية كتبت بواسطة فتى نجد

أمين الله يجزاك عنا كل خير على دعواتك جعلها الله في موازين اعمالك ..

اختي الكريمة ... دبي مدينة ممتازة لبدء التجارة برأس مال بسيط وفيها فرص ممتازه وفيها خير للجاد واللي يدور رزقه , ولكن بنفس الوقت مو كل شي موجود في دبي يعني مو كل المصانع اللي في الصين عندهم محلات في دبي ولا كان غرقت دبي , عشان كذا بالنسبه للمضيئات والشغلات هذي انا ماعندي خبر عن توفرها في دبي أو عن اسعارها ولا وين تمباع ولكن انصحك بالتواصل مع الأخت ( تـفـاهــم ) وهي عضوه في المنتدى هنا ولها كم موضوع في المتصفح هذا لأنها من اهل الامارات ( وأهل مكه ادرا بشعابها ) وممكن ترسلين لها صور للمضيئات اللي تبينها وهي تبحث لك عنها وعن اسعارها في دبي , وانتي طبعاً تكونين عارفه اسعارها في السعودية , وقتها لما تقارنين بين اسعارها في السعودية واسعار الجمله في دبي ... تقدرين تقررين من وين تشترينها !!! هل من دبــــــي أو من الـصــــين ؟؟

بالنسبه للخمريات ( مع اني ما ادري وشي ولكن حسيت انها تستخدم لتعطير الشعر الظاهر ) والبخور والشغلات هذي , دبـــــــــــــــي من اكبر المدن في الخليج المشهوره ببيع المواد الخام اللي تدخل في تصنيعها , هذا حسب ما شفت بنفسي من تجار يشتغلون هالشغلات وبرضو الأخت الكريمة ( تفـــاهــــم ) أكيد بتفيدك بالموضوع .

بالنسبه للمحلات عندنا بالسعودية , أغلبهم ماعندهم مشكله يعني ممكن يعرض لك بضاعتك عنده في المحل مقابل عموله ياخذها على كل بيعه .

رأيــــــي ... في البداية ركزو على مجال واحد ( يعني شغل المضيئات مثلاً ) ابدؤا فيه وبعد فتره توسعو في الشغل شوي شوي . مجرد رأي قابل للصواب أو الخطأ .

وموفقين بإذن الله ,,,

المشاركة الأصلية كتبت بواسطة فتى نجد

ووجهك إن شاء الله , وامين وجميع بإذن الله ...

اخوي جلاد الصبر ... انت جيت في الصميم بالظبط ومشروعك هذا خطيرررررر وناجح يقووووووه بحيل اللي ما تنام عينه وانا اقولك اتكل على الله واجزم بس وتذكر كلام ابو خالد (فتى نجد) ويشهدون علي كل الأعضاء هنا , لأن كل عوامل النجاح متوفره عندك وهي ( توفر سيارة النقل + سكنك في موقع استراتيجي + وجود زوجتك كداعم معك + توفر العزيمه والإصرار + القناعه بالربح المعقول في البداية ) .

ولكن اخوي قبل ما أجاوبك وعشان تقدر تمشي بشغله زي هذي , لازم تركز على شغلتين في شخصيتك :

ــ تكون وسيع صدر وحليم وطويل بال وتحمل فلسفة العالم (المشترين) وأي كلمه ما تعجبك ردها بابتسامه .
ــ بتلقا حرب ما تتخيلها من منافسينك (خصوصاً الأجانب) ولكن خلك أذكا واكسبهم بصفك وتعلم منهم أفضل من عداوتهم .

الحين نبدا بزبدة الموضوع , وبجاوبك بشكل نقاط :

1/ اسواق الجملة للملابس في الرياض موجودة في ( سوق البطحاء قرب مواقف المرقب + سوق التعمير قرب سوق المعيقلية وامارة الرياض ) , ولكن اتوقع إن جدة افضلك لأن اكيد السعر بيفرق معك بحدود 15 % الى 25 % تقريباً واعذرني لأني ما اعرف اسواق الجملة في جدة بس اذكر فيه ( عماير الباشا + باب مكة في جدة ) وفيه أعضاء في المنتدى من اهل جدة ماراح يقصرون معك وانا متأكد 100 % .

2/ بالنسبة لتكلفة شراء ملابس للنساء والاطفال وتكون مشكله ومنوعه , وتعبي صندوق الهايلكس بحدود ( 3000 الى 5000 ريال تقريباً ) .

3/ البيع عندك طريقتين ممكن تشتغلهن بنفس الوقت وهي ( البيع بالمفرق + البيع بالجملة ) :

ــ البيع بالمفرق :
ـ بمساعدة زوجتك ببيع الملابس على الجيران والمعارف من اهل القرية .
ـ تركب شد قماش تنزاني ( قويه صح هههههههه ) على صندوق الهايلكس وتعبي البضاعه فيه وتبحث عن الاسواق الشعبيه بالديار اللي حولك مثل ( الدوادمي , عفيف , القويعيه , الحصاة , حلبان , الشعره , ومليان ديار حولك ما اذكرها الأن ) واذا وصلت السوق تبسط ببضاعتك وتبيع للناس مباشره .

ــ البيع بالجملة :
ـ طبعاً اذا رحت للأسواق الشعبيه بالديار اللي حولك , لازم تبدا تسوق بضاعتك بالجمله على اهل المحلات والبسطات هناك وخصوصاً انك بتلقا اكثرهم سعوديين إما رجال أو حريم عجز يترزقن الله , وهذولا هم المكسب الحقيقي لك وركز على المكسب الحقيقي لك !!!!! ولكن خلك قنوع بمكسب بسيط بحيث تكون انت ارخص من الموزعين الاجانب اللي يبعون لهم بالجمله , يعني مثلاً ( انت شريت درزن من جدة بمبلغ 100 ريال وجيت للسوق ولقيت الموزعين الاجانب يبيعونه للعجز بمبلغ 150 ريال , هنا انت اعرضه على العجز بمبلغ 130 ريال مثلاً ) طبعاً المكسب قليل وما يسوى ... صح ؟؟؟ انا اقولك ليه , لأن الهدف هنا ماهب الحين !!!! الهدف اني ابيك بعد شهرين أو ثلاثه بالكثير تصير تستورد انت بنفسك هالملابس من دبـــــــــي ووقتها بتكتشف إن الدرزن اللي كنت تشتريه من جده بمبلغ 100 ريال صرت ا تشتريه من دبـــي بمبلغ 70 ريال , ومع الوقت بتصير من اكبر الموزعين والموردين في طريق الحجاز ... وما ادراك ما طريق الحجاز ( وانت ادرى مني بعدد المدن والهجر والقرى اللي في طريق الحجاز يعني عد واغلط ) .
ـ بعد ما تصير تستورد من دبـــــي مباشرةً , وقتها كبر المخدة وحط رجل على رجل وبتكتشف إن كل الموزعين الأجانب اللي كانو حاقدين عليك ويكرهونك يبوسون الرجلين والأيادي عشان اتفضل واتكرم عليهم وتعطيهم من بضاعتك ويصيرون يشتغلون عندك ولحسابك وما عليك إلا تورد لهم البضايع وهم اللي يصرفونها على الناس ولا تستغرب ولا تعجب لو قلت لك لو مشيت انت على هالطريقة بتلقا دخلك بعد اربع أو خمس شهور بحدود ( 20 الف إلى 30 الف ريال ) صافي في جيبك وتزود مع الوقت بعد , طبعاً بعد توفيق الله .

وزي ما قلت لك بداية الموضوع كل احتياجات المشروع متوفره عندك وما يبقالك إلا شي واح ( شنطة العزبه ومكوناتها : دافور + سكر + شاهي + قهوه + هيل + بريق شاهي + دلة تفويح قهوه + تميرات + ) وانا متأكد انها موجودة عندك اصلاً هههههههههههههههههههههههههههههههههه .



اخوي / جــــلاد الصبر , هالكلام لك ولكل الشباب , ترا هذا هو الرزق والشغل الحقيقي في بلدنا , ورب البيت الكريم الشغله هذي ممكن تخليك تشتري بيت في وسط الرياض خلال سنه وحده بس , فرجاء خاص اخوي اتكل على الله وخلك صاااااااااااااااااااااااااااااااااااااااامـــــل الله يرحم والديك .

اعذروني على الاطاله ولكن جلاد الصبر جا على الجرح ... وهذا الشغل اللي تشققت احبالي الصوتيه من سنين وانا انصح الشباب فيه ولكن ماش , ما جا الصامل .

(( بخصوص شغل الاعلاف , أرجو المعذرة لأني غير مطلع على مثل هالمواضيع واستميحك العذر ياخيي )) ...

ودعواتي لك يا جلاد الصبر بالتوفيق وسعة الرزق , وأي خدمة أو أي استفسار أنا حاضر بأي وقت ولو تبي بنص الليل ابشر بطيبة الخاطر ولا يردك الا لسانك وانا اخوك .

تحياتي
ابـو خــالــــد ,,,

المشاركة الأصلية كتبت بواسطة جلاد الصبر

بيض الله وجهك يابو خالد كفيت ووفيت
واشكرك على النصايح وروحك المرحه
وان شاء الله اني ببدا بالشغل بعد ماحمستني ووجهتني


اخوك ابو منال

المشاركة الأصلية كتبت بواسطة جلاد الصبر

بيض الله وجهك يابو خالد كفيت ووفيت
واشكرك على النصايح وروحك المرحه
وان شاء الله اني ببدا بالشغل بعد ماحمستني ووجهتني


اخوك ابو منال

المشاركة الأصلية كتبت بواسطة احمد الشمراني

بصراحه تحمست مرره انا عاطل توني متخرج من الثانويه وكل اصحابي وكل ما اقابل احد يقولي روح اشتغل
مع خالك خالي وش شغلته { مقاول وعنده موئسسات يعني بقعد اقول عنده وعنده الين بكره ما شاء الله }
والله ودي اشتغل معه وافتحلي مكتب وحتى خيلاني الثانين يقلولي روح روح فك لك سجيل تجاري ان شاء الله يكون لك رزق
والله ماني عارف من وين ابدا مع اني احب التجاره .

تكفون ساعدوني من وين ابدا كل ما افكر اسوي شي اقول بعدين بعدين بعدين واقول اذا توظفت .

المشاركة الأصلية كتبت بواسطة تفاهم

وأنــا يابو منال ،أنالك الله كل الخير رأيت كلام أبو خالد ينطبق على مشاهير الاغنياء الذين بدؤا من الصفر فكانو مندوبين لاخرين والحمد لله عندك عوامل النجاح لتبتدأ ،توكل على اللـــــــــه وأنطلق.
ومن ناحيتي أدعمك بكل المعلومات اللي تبغاها من دبي بعد ما تضع الركائز في أسواقك المستهدفة في السعودية وتكون تاجر ممول .
وفقكم اللـه