وعليكم السلام....

/ هل لك سابق تجربه في المجال التجاري ؟ وما هو ؟
نعم ( في مجال اجهزه الجوال والاكسوارات ( ولاكن مامشا المشروع بسبب غلاء الاجار)

2/ هل انت لك ميول لمجالات معينه ؟
والله يا خوي لا مالي ميول معين

3/ هل لديك خبره في مجال معين؟
نعم لي في مجال الاتصالات ( ولاكن كرهت الجوالات كره الله يعلم به ولا افكر الدخول به مره اخرا)

4/ هل لديك ذائقه جيده في الأختيار ( يعني انت ذويق في الأختيار )؟

نعم نوعا ما ( لاني لا اختار الا افضل القطع )

والله يرزقك الجنه

ملاحضه ( مقاهي النت ما وجهت نظرك بها )

السلام عليكم ...
الأخ / قصه قديمه , انا اكره شغلتين في هالدنيا وهي ( الجوالات والجوالات ) لأني احس انها شغلت من ليس لديه حيله , بمعنى انها استهلكت بما فيه الكفايه ومافيها رزق وكل من هب ودب اشتغل فيها . واكرر عليكم اللي دائماً انصح فيه كل من يستشيرني ( لاتكن في وجه المدفع بل كن الجندي المجهول )...
عموماً قصه قديمه / رأس مالك (30000 ريال) وهذا المبلغ ممتاز جداً جداً وانا بعطيك فكرة مشروع انا شخصياً مقتنع فيه 100% وجربته بطريقه سطحيه ولقيت ارباحه تتجاوز 250 % بدون مبالغه والله العظيم .
فكرة المشروع :
مفارش للطاولات ( وهي مفارش لزينة الطاولات في المجالس وتكون بشك يدوي وبأقمشه أورجنزا و مخمل وساتان بالإضافه للخداديات )
التسويق :
( لاتفتح محل نهائياً انتبه هذي نقطه مهمه )
ــ التسويق عن طريق العرض والبيع على التصريف لدى محلات المفروشات (الأثاث) ومو المحلات الفخمه جداً , يعني ممكن تتعامل مع مفروشات العمر ومعارض المفروشات اللي عندهم اطقم كنب على التفصيل مثل اللي في مخرج (11) بالروضه وطريق الملك عبدالله في المرسلات وفي كل حي تلقاهم وكثيرين جداً جداً .
ــ التسويق عن طريق العرض والبيع على التصريف لدى الأكشاك الموجوده في المجمعات التجاريه اللي يبيعون تحف أو اكسسوارات مثل ( مجمع صحاري بلازا أو السلام مول أو البديعه مول أو العثيم مول أو الرياض مول أو الرمال سنتر أو .............. الخ .
ــ أستغلال الأسواق المؤقته (المهرجانات) بحيث تستأجر كشك صغير لمدة عشر ايام مثلاً مع ملاحظة كثافة المتسوقين الممتازه في هذه المهرجانات وعندك حالياً مهرجان في هايبر بنده بطريق الملك فهد ورمال سنتر في الدائري الشرقي .
ــ يمكن التسويق عن طريق ركن صغير في أحد المشاغل النسائيه المشهوره وتعطيهم نسبه من المبيعات .
ــ التسويق عن طريق محل تتفق معهم ويكون في سوق نسائي .
ــ وهناك الكثير من طرق التسويق بذكرها لك لاحقاً اذا نويت انشاء الله .
المطلوب منك :
انك تبدأ تشيك على المحلات في الرياض وتشوف اسعارهم .
تجهز لك مبلغ (1800 ريال) تكاليف كامله عشان تسافر للدوله اللي عندهم هالمنتجات وتبدأ تقارن من ناحية السعر والموديلات .
مميزات المشروع :
ــ مافيه احد يقدم موديلات حلوه وتناسب اذواق السعوديين إلا في أماكن معينه وبأسعار مرتفعه جداً .
ــ نسبه كبيره جداً من المعروض عندنا اذواق (الله يكرم النعمه) وموديلات قديمه يعني مافيه تجديد .
ــ المنافسه ضعيفه جداً في هالمجال ومافيه احد متخصص إلا اللي في شارع الثميري وكلهم أفغانيين وباكستانيين والذوق (الله يجيرك ولا بريال) وموديلات لها سنوات وحنا نشوفها ورح وتأكد بنفسك .
رأس المال :
مبدئياً ممكن تبدأ بمبلغ (15000 ريال )
مثال صار معي :
كنت مسافر انا وام خلودي (راس المال طبعاً) سياحه على قولتهم , الله يطولي بعمره ويخليها لنا و......و......و.......و........و....... ( واحد خواف هههههههه) شافت مفارش طاوله وجابت العيد وقالت هذا مكاني (طبعاً ام خلودي ذووووووويقه بقوه والدليل انها اخذتني) المهم اشترت مفرش بعرض (1 متر) وطول (2 متر) قماش اورجنزا وكله شك يدوي بسعر ( 150 ريال ) مفرق يعني بالجمله ممكن ( من 90 الى 110 ريال ) وجبنا كم حبه هديه وبعد ما جبناها انجنو عليها الأقارب اللي عطيناهم وبدو يبلشوني يكثر الأسئله والطلبات ونا والله مانيب فاضي ولا كان اشتغلت فيها مظبوط , عموماً بديت اسأل في السوق من باب العلم بالشيء وحصلت اشياء قريبه منها ولكن مو زيها بالعكس اقل مستوى منها ولقيت الأسعار من (800 الى 1200 ريال ).
نقطه مهمه جداً جداً :
الذوق الذوق الذوق الذوق ركز زين على الذوق وممكن تستعين بخواتك او قريباتك في هالموضوع .
طبعاً نسبة البنات كثيره في المنتدى وياليت تعطونا ملاحظاتكم وأرائكم وتصححون لي إذا أخطيت لأنكم انتم اللي تعرفون الشغلات هذي اكثر منا ...

(( على فكره يا عبدالإله اذا منتب متزوج أعرس عشان تحل مشكلة أختيار البضاعه ))
مززززززززززززززززحه ....

طبعاً انا عندي تلفونات وعناوين المصادر . اذا نويت 100% أعطيك اياها إنشاء الله , ولاتنسانا من الدعاء وياليت توصي العجوز تدعيلنا ...

أي استفسارات انا مستعد وبالتوفيق إنشاء الله ...

الأخوات / لاعمل لدي و طموحة بلا حدود ..
عطوني يوم او يومين عشان ارد عليكم انشاء الله ...

أعجبتني فكرة خدمات الطالب النسائي
بس هل يعطون تراخيص

أخي فتى نجد أعجبتني فكرة المفارش ممكن التفاصيل
لاني وحدة درت دورة غير طبيعية علشان مجالسي

السلام عليكم ...
الأخت / لاعمل لدي , فكرتك جيده وانا سبق وشفتها في اسواق ماليزيا واسبانيا وغيرهم والحقيقه هي ناجحه عندهم بقوه ولاكن بسئلك بعض الأسئله اللي لابد تحطينها في حساباتك وراجعيها تمام , وهـــــــــــي :
1/ لابد أن يكون الموقع مؤمن بحيث تطمئن الأم وتثق بوضع ابنها , بمعنا أن الطفل لايستطيع الخروج من هذا الموقع لوحده وبنفس الوقت لابد ان يكون شبه مكشوف ليستمتع الأطفال باللعب والتفرج على المتسوقين ولتتمكن الأم من متابعة طفلها كل فتره بمجرد المرور من بعبد لبعيد , فهل هذا ممكن !!!!! .
2/ في حالة كان الموقع شبه مكشوف كيف ستتمكنين من التحرك ومتابعة الأطفال امام الناس وانتي امرأه .
3/ ما شاهدته انا في الخارج كان في مراكز تجاريه صممت مكان خاص لهذا النشاط منذ بداية إنشاء السوق بحيث يكون في موقع استراتيجي في وسط المركز مع ملاحظة أن المركز التجاري في الخارج يؤجر هذا الموقع بمبلغ يعتبر رمزي على شركات متخصصه في هذا المجال وذلك من باب الدعايه لمركزهم لجلب اكبر عدد من الزبائن للتسوق في مركزهم , بمعنى أنهم لايهدفون للربح منه بقدر أن يكون عنصر جذب للعملاء .
4/ طبعاً مشروع مثل هذ يحتاج لمساحه ممتازه وواسعه يعني بحدود (150 الى 200 متر مربع) ومثل هذه المساحه في مثلاً (سوق صحارى أو العثيم مول أو الحياة مول أو ..................الخ ) يتراوح ايجاره (200000 الى 300000 ريال سنوياً).
5/ ايضاً تكلفة التجهيزات ستكون عاليه وذلك لأن اصحاب المراكز هنا يشترطون عليك أن يكون ديكورك وتجهيزك راقي ليتناسب مع مستوى وسياسة ادارة المركز .
6/ يجب الأخذ بالحسبان أن اغلب الأمهات اللي يجيبون اطفالهم معهم إما أن معها الخدامه أو تبي طفلها معها لأنها جايه تشتري له شي وتبي تقاوس عليه وتشوف اللي يناسبه يعني لازم يكون معها .
7/ طبعاً فيه ملاحظات اخرى ولكن اللي كتبته يعتبر الأهم وأي مناقشه مستعد وما ذكرته ليس إلا وجهة نظر قد تكون صحيحه وقد تكون خاطئه والله أعلم ..

طلب للجميع (( لاتنسونا من الدعاء لوالدتي بالشفاء وجزاكم الله خير ))

الأخت/ طموحة بلاحدود , بالنسبه لرغبتك البدء بهذا المبلغ انا سبق وذكرت في بداية هذا الموضوع فكرت تأمين احتياجات المباسط النسائيه , وايضاً ممكن تفكرين في موضوع المفارش اللي كتبته قبل وتسويقها على معارفك وبحاول اشوف شي جديد ويناسبك بإذن الله ولكن برضو انتي دوري أي شيء في بالك واكتبيه هنا وأنشاء الله محنا مقصرين عنك بالأراء والتوجيه والمناقشه والله يكتب للجميع التوفيق .
ملاحظه/
ياليت تكتبين لنا عن ظروفك , يعني هل عندك سواق او اخوك ممكن يتنقل معك وفي أي مدينه انتي وهل انتي طالبه ولا موظفه واشياء مثل كذا , طبعاً انا اسألك كذا لأن فيه طبيعة اعمال تصلح لبنت ولا تنفع لثانيه حسب الظروف ومكان السكن وغيره عشان نحاول نحدد الهدف من دون تشتيت الأفكار .