السلام عليكم ورحمة الله وبركاته


تحيه طيبه للجميع ..


الله يعافيكم أنا حابه ابدأ مشروع أسر منتجه أنا ممكن اعمل بعض الاكلات
الشعبيه والحلويات ... لكن ماني عارفه كيف ارتب افكاري فيها
الاكلات الشعبيه تحتاج حافظات خاصه وبرضه الاكياس وحق الحلى
كيف اشتري منها بالجمله أنا مفكره بالشكل برضه مو بس أكل بحيث
اذا وصل الزبون يكون مرتب ومتعوب عليه ما احب البهذله والحوسه
وكيف أسوّق لمنجاتي وهل فيه جهات معروفه هنا في الدمام او الخبر
ممكن يوصلها الاكل وتسوقه لي وتنشره

اللي عارف للشغله او سبق وحده جربتها ومن وين اشتري الاغراض
وكم الكميه والمندوب والاسعار بصراحه محتاسه بهالشئ كثير وحابه
ابدأ في أقرب وقت ممكن طالما عندي فراغ

والله يجزاكم كل خير

أهنيك على روحك واسأل الله لك التوفيق والسداد

الموضوع سهل وأبسط مما تتخيلين

محلات الجمله منتشرة بكل مكان ونصيحه مني لك أغلب أغراض الشغل لا تاخذيها إلا من الجملة أوفرلك وأرخص لك

وكذلك محلات البلاستيك روحي عندهم تحصلين انواع وأشكال من الأطباق

وأفضلها اللي تجي لونها أسود والغطاء بلاستيك شفاف هذي ممتازه وتحفظ الحراره وأغلب المطاعم تستخدمها

وأفتحيلك حساب عالانستقرام وعلى تويتر وأتفقي مع محلات الأسر المنتجه أستاجري منهم رف ولا رفين وأعملي استكرات عليها صور منتجاتك ولصقيها بالقرب من الدوائر الحكومية

أخوي موظف في بنك بالخرج كانو متفقين مع وحده ياخذون من عندها غدا يومياً ب 8 آلاف بالشهر وسحبت عليهم جاها عرض أفضل والحين ياخذون من المطعم ههههههههه

وتقدرين تتقاولين مع الديوانيات حقت القهوه والشاهي منتشره بكثره

ويبقى عليك تشوفين أشخاص من أقاربك يوصلون طلباتك ولهم حق المشوار أو تنزلين إعلان طلب مندوبين توصلين

تحصلين شباب كثير يشتغلون توصيل

رتبي أمورك وسجلي اللي تبين تسوينه بورقه وخذيها حبه حبه حتى تنجزي مشروعك بنجاح بحول الله

هذا كل اللي عندي مع ودي وتقديري