الراس بيت اشيوخ والحلم جاسوس
للنفس .. يقطع من تركها ثواني

خذني وطلّعني ولو الهوى كوس
ابا آتنفس شي صافي وهاني

داخل تصادم فكر ومزاحم نفوس
على فتافيت الغوى والغواني

في هاللوبي كل شي ضايع ومعكوس
ماكن في هالكون رب واماني

اثاثه الغامق وتصفيفة الكوس
دلّت على ذوقِ راقي وداني

شفهم وشف كيف الفشل يجعل الروس
اشيا كماليّه مَ بين الاذاني

وشف كيف هذا ثَمَل ويْعَثْرِ ويدوس
على مسمّى جدّهِ الاوّلاني !!

وشف كيف هالشايب برغبته محبوس
تحت شعار " إنّ آخر العمر فاني" !!

أحس عنده عيله وبنتٍ اعروس
تخجل من آبوها كثير وتعاني

وشفت الثنين اهناك تراهم جنوس
رِجِال بس ارجال من نوع ثاني

ضحايا نفطُ وقلّ طاعه وناموس
والامّ كانت طيش والاب اناني

وشف هالجَمَال اللي مدّثر ومحيوس
مثل الكلام اللي بليّا معاني

فتاه تعرضْ جسمها الّغض بفلوس
ويبيعها في اليوم عشرين زاني

كل الزوايا طافحه قبح ونجوس
تسبح وفي الرّكن الاخير المواني

واحد يغنّي وعنده احثاله جلوس
كأن ما في الحياة إلاّ الأغاني

يا وخز قلبي وخزة الجرح بالموس
يا عالمٍ ما فيه حلم وتفاني

في هاللوبي ما فيه ريس ومريوس
الكل بايع نفس .. والكل جاني

والكل عنده عذر واهي ومدروس
لو قلت ليه انتَ كذا قال : "أعاني"

انا الليَ أعاني من القوس للقوس
هذا مهب جوي ولا هو مكاني

بركض وابي يركض معي ألف فانوس
الى صباحات الغلا والتهاني

روّح معي والواقع احيان كابوس
وانا مَ احط اللومْ على زماني

احمده ربي كل ما دق ناقوس
واعرف حدودي واستحي من كياني

واصمت اذا جا للحكي روس وعسوس
واضحك ولو وجهي من البكي حاني

لو كل شيْ محسوس بالفعل ملموس ؟!
طلّعت آخر جرح بين المحاني