اليا اختلف سِلْم العرب والتقاليد
من مات منهـو لا تعدّه فقـيده

لو هو قريبٍ منْك فرقى الرِّدي عيد
جعله مـن الدنيا يعجّل شـديده

يعيش معـزولٍ عن الناس ووحيد
أفضل من مقابل وجـيهٍ قريده

يوم إنّيَ اذْكر بعض الاحوال يَ فهيد
الوقت جافي والـموارد زهـيده

وإنْ حدّت الحاجه لبعض الرعاديد
اليوم ما ينفع عضـيدٍ عضـيده

نفسي معوِّدها على الصبر تعويد
والصبر نكسبّ به صفاتٍ حميده

وخير الكلام الذكر من غير تحديد
مع خالص النيّه وطِيـب العقـيده

يقولـه اللي ما نشد زيد وعبـيـد
بالمصحـف الطاهر لقى ما يفيده

من طبَّق اللي فيه ؛ نال المقاصيد
وسَلَك طريق أهْل الحياة السعيده

ما يستوون أهل القشر والأجاويـد
الله فَرَقَـهـم فــي أمــورٍ عـديــده

قال : اعملوا تلقون .. وِلْكُم مواعيد
أَجَلٍ قصير ومن قضى أَجَله نعيده

مرجاعهم لله جمـوع وتفـاريد
والله بخلقه يفعل اللي يريده

دنياك ما فيها حيـاةٍ سرامـيد
زرع الفنا لابد له من حصيـده

من سار بالسكه وصل لاخر السيد
العبد لابد المنايا تـصـيـده

ترى المـنايا للبـرايا حواصـيـد
والموت له مع كل نفـسٍ وعيـده

والرابح اللي من هَلَ الخير وشهيد
وادرك بحسن الخُلق مرضاة سيده

حبْـله يـورِّد طـيـّبـات الـمواريـد
لا صـار مع ربّه حبـاله جـويـده

والحكم للي يبْدي الخَلق وِيْعيـد
هو ربّنا الواحد وحـنّـا عبـيـده

القصيدة جزلة والابيات متماسكة وقوية وذات معنى

__________________
ومن يعمل من الصالحات وهو مؤمن فلا يخاف ظلما ولا هضما