السلام عليكم ورحمة الله وبركاتة
اسف على التاخير
المشروع كنت اشتغل فيه قبل 9 سنوات تقريبا

انا من الرياض كنت اشتغل في الخضار والفواكه وابيع على سيارة في الشوارع
من كثر ما اجي سوق العزيزية في الرياض حق الخضار كنت اقابل بعض اصحاب محلات الخضار والفواكه من خارج الرياض
من اهل المناطق القريبة مثل سدير وحريملاء ورويضة العرض الى اخره وبعد كونت معرفه معهم عرضت عليهم اني اشتري الخضار والفواكه لهم واوصلها لهم في مناطقهم وهم عند اهلهم بدال زحمة الرياض والمشوار.... اللي كان في سدير كنت اشتري الخضار والفواكه على حسابي و اوصلها له بـ 500 صافي في جيبي .. طبعا هو يدفع حق الخضار والفواكه بعد ما اوصله الطلب .... لكن قبل كل شي لازم تاخذ خبرة في الخضار عشان ماتجيب لهم خضار وفواكه جودتها غير جيدة ( مهيب زينة بالعاميه هههههه ) الله يديم علينا النعمه

انصح اللي بيشتغل فيها

1- اهم شي الامانه ومخافة الله ( لا تسوي نفسك ذكي لهم معارف في السوق ويعرفون اسعار الخضار والفواكه بالجوال لو حاوولت تزيد عليهم في السعر ... راح تخسر ثقتهم فيك )

2- الاستمرار معهم مهما كانت اشغالك ... انتبه تشتغل على مزاجك اسبوع واسبوع لا ... ماراح يوثقون فيك

3- انصحك هايلكس او ددسن ولو تكون ديزل يكون افضل ... تروح وترجع بتانكي واحد 20 ريال

4- لو بغيت تشتغل لحسابك الخاص شوف اسواق المناطق مثلا سوق الرويضة اعتقد اذا ماكنت ناسي يوم الخميس لو تحمل كمية وسط من الخضار والفواكه وتجيهم بدري بتلقى خير ان شاءالله (رأس المال مايزيد عن 1500 الى 3000 اذا السيارة كبيرة )
5- اذا ماقدرت تصرف الكمية كلها ... الباقي منها ممكن توزعها على محلات الخضاروالفواكه والبوفيهات اللي بالمنطقة او على اسواق المحطات وانت راجع للرياض او لمدينة اللي انت ساكن فيها

## اتمنى الدعاء لـ والدي و عمي رحمهم الله توفوا قبل مده .. الله يرحمهم ويسكنهم فسيح جناته ويغفرلهم ماتقدم وما تأخر من ذنبهم ##


والسلام عليكم ورحمة الله وبركاتة

اي استفسار حسب ما اكون متواجد و انتم تامرون امر ما تطلبون



.
.
.
.

للأمانة منقول: https://www.btalah.com/showthread.*****..#ixzz4dkObz7rW

اتمنى من المشرفين تعديل العنوان واضافة ( معه )

مشروع ناجح 100% برأس مال لايزيد عن 3000 ريال للشباب العاطلين اللي ( معه ) ددسن/هايلكس

ماشاء الله عليك
واضيف اضافة .. الجح موسمه الان بدأ وبالشوارع خصوصا بالاحياء الراقيه وسعودي ان شاء الله ماعلينا خوف

اماشاء الله

مشوع مميز
شكرااا ع تجربتك