السلام عليكم ورحمة الله

اخواني انا سبق وكتبت موضوع عن ايقاف خدماتي وتجميد حساباتي البنكيه مع حاجتي الشديده

اليوم اتصل علي محامي البنك وقال بواصل القضيه وهددني بالحبس وانا امرأه مطلقه اصرف على عيالي

يبي اسدد المبلغ كاش وانا ماقدر نهائيا مايعلم بالحال الا الله

هل يستطيعون سجني والله انا خايفه من يوم اتصل وحالتي حاله تكفون طمنوني

اليوم بسأل وارد عليك ان شاء الله..ثانيا لاتخافين حبيبتي توكلي ع الله والبنك هذا يطالب بحقه بدون تهديد سلامات ولا شهري في البنك وخليها قضية راي عام والبنوك تخاف ع سمعتها عشان ماتخسر عملاء..الله يكون في عونك ويسهل امرك

ابوي محامي وسألته...قال اذا ثبت وقال المحامي حق البنك هذا الكلام سجلي مكالمته وتقدرين تدينينه وينسجن هوا لانه مو من حقه يهددك بالسجن او اي عقوبه لان اللي يفتي بالعقوبه هوا القاضي ع العموم انتي بأمان وحاولي تمسكين دليل ع التهديد تسجلين مكالمه المحامي او اي شي وقدميها للمحكمه وهم راح يقاضونه ولو كنتي مدانه للبنك وتعذر التسديد هذي تحتاج اجراءات في المحاكم مو من حق اي محامي او احد يفرض عقوبه عليك ..المحامي للاسف كان بيهددك ويخوفك

انتبهي لاتقولين للمحامي انك بتقاضينه اول شي امسكي دليل واذا ماعندك مانع تروحين ترفعين عليه قضيه وع البنك اللي هددك وقولي في خطاب ... ان ام لاطفال تعرضت لتهديد من البنك(واكتبي اسم البنك)عن طريق محامي البنك..وهذا التهديد اثر في نفسيتي انا واطفالي وقد استغل البنك مع محاميه ضعفي وقلة درايتي بالأمور القانونيه وطالبو بدفع مستحقاتهم كاش والا ادخلوني السجن وانا التمس عداله المحكمه بإنصافي ورد اعتباري واريد الإجراء القانوني بحق المحامي مع البنك وحقي الخاص ضد هذا التهديد اللذي اقلقل عائلتي حيث لامعيل معي الإ الله والسلام عليكم ورحمة الله وبركاته..

يعطيك الف عافيه اختي الصريحه

بحاول اسجل كلامه مع اني ماعرف بهالامور

اختي اسألي ابوكي هل فعلا البنك يقدر يسجن العميل المتعثر وربي خايفه

نزلي برنامج تسجيل المكالمات ومتى مادق يتسجل الصوت..لاتخافين لو كل عميل مادفع اللي عليه كان نص الشعب بالسجن..هذي اجراءات طويله مو على كيفه يسجنك القاضي هوا اللي يحدد العقوبه المهم ارتاحي واسترخي وماعليك منهم استغفري كثير ..اذكر زوج خالتي ماخذ من البنك قرض وللاسف انفصل من العمل وصار البنك يطالبه يسدد اللي عليه مبلغ 500 الف لكن ما انسجن ولا شي لان مو من مصلحة البنك العميل ينسجن ..لان او انسجن كيف يسدد اللي عليه لازم يدور شغل او يستلف ويسدد..المهم زوج خالتي قعد سنه بدون وظيفه لين الله قدر لها وتوظف ورجع يسدد للبنك..يعني لاتخافين حبيبتي كثير ناس مثل حالتك تمر عليهم ظروف ويتعثرون .

تسلمين اختي الصريحه الله ييسر امورك ويرزقك الي ببالك ويطمنك زي ماطمنتيني

اخوي مبخوت الله يسعدك ويرزقك ويطمن قلبك

بحاول احل الموضوع ودي الله ييسر