♒♒ يــابــســات الأورده♒♒

مكتفي خيبه · #1 (**permalink**) 18-05-2017, 12:30 PM

مشكور .. ماقصرت .. لكن طالبك ماعاد أبى
غير الرحيل أستأذنك وسبوق قلبى فلها

ماعدت قاوى للحمل شف كيف غادٍ منكبى
هزلٍ ولكن طعنتك لابد ما تفطن لها

ياكم عطيت ولا خذيت الا مرارة مشربى
عقّدت يدّينى من هواك ولا عرفت أحلها

يا منيتى مانى غبى هالطيب خلانى غبى
أغض عينى لغلطتك وإلا حرام أدبلها

أجرعك مر القسى والله ماتحبى حبى
لكنّ شِمت من الردى والنفس تحمل غلها

مذهب صدوق .. ومذهبك لاشك خالف مذهبى
والعوسجه قشرا ولاذكرتْ بوافر ظلها

وياربعنا روحو ورى النار شبت وحطبى
عصارة أفكارالمخيخ وأشيا كثيره ملها

أتلدّ بعيونى غضب تزهمنى بأفلح يا صبى
وتثور وتزوع اللهب وأعتى السيوف تسلها

( فواز ) يَ حزامى تعال أسمع وحقق مطلبى
والكايده خابرك دايم بالوزا كفوٍ لها

أفزع معى فزعت شجاعٍ يعربى لليعربى
فى وقت ذلان العرب تشكى مرارة ذلها

بكب شعرٍ ماجنى غير العنا ويّا تعبى
واليا أنحنى عزمى يخوك أثقل همومى أشتلها

أربكت لكنْ للاسف ما دسّم الوقت شنبى
تمنعنى شيمة شايبٍ كنّ الضلوع أحتلها

غايب ولكنْ حاضرٍ ذكراه يحيا بي وبى
من عالي شموخه همم ماتنثنى عن حلها

يالله سترك لا يبيد الجبل وتخرّ اركبى
قدّام من يفرح على زله قبل لا آزلها

ياخوك مايجرح سوى من يدْبى لكسرك دبى
أرجال لكن طبعها تخجل توصّف دِلها

ودّك تبدل شمغها بشْيال ورهاف العبي
تحْرم عليها عقلها وأشنابها عارٍ لها

(فواز ) والدنيا متاع ولا دامت لوجه النبى
شف كيف هذا يتلها وشف كيف هذا يتلها

كلن يبيها والبلا هذا يبى وهذا يبى
ويقول يالله علها وآقول يالله علها

أنحاس مثل الذهب منسوخ ما بله كوبى
مغشوش واللي له عنا خسران من دهولها

هبّيت يا وجه الزمن اى والله الوالى تهبى
فيك القلوب الوافيه تشكى سبايب قلها

أستغفر الله والقصيد أحيان ينتاب غضبى
لكنْهِ يروي يابسات الأورده ويبلها

وأستغفر الله دام الاستغفار وحده مهربى
أن كان زليت القدم فى قاع ماهى محلها