بسم الله الرحمن الرحيم
صبحكم الله بالخير أخواني وأخواتي

ضيفه جديده وحبيت أول مشاركه تكون موزوع خفيف


بقول لكم قصتي من طق طق لسلام عليكم وأنتوا عاد أحكموا

كان يا مكان .. أنا يوم كنت لسه طالبه في الثانويه
كنت طالبه فاشله ( حلوه الصراحه ) .. كانت الدراسه في ديره وأنا وخشتي في ديره ثانيه
كنت دايم أقول لأبوي : أبي أفصل يبه أبي أفصل
وكان يعيي ودايم يهاوشني .. :: قبل الثانوي مافيه .. خذي الشهاده وبعدها يصير خير
فايقنت حينها في قرارة نفسي إنه مافيش فكه
فصرت أخذ الدراسه تسليه ولعب وتضييع وقت
كنت دايم أتمشكل .. وأخالف المدرسه عشان يفصلوني .. كنت أداوم وبدال ما أحط بشنطتي كتب ودفاتر وأقلام وماشابه لك .. أحط درزن علوك ( هاذا أهم شيء بالشنطه ) ومشط وشباصات ومرايه وأحياناً مسجل ,, وأحياناً كنت أجيب أشرطة فيديو >>> بس ترا والله كنت مؤدبه وماعندي حركات .. كنت أحب أتابع فلونه وهايدي وطقتهم وأحب أعطيهم صديقاتي يتفرجون عليهم
وكنت أطفي العداد حق الكهرب بالمدرسه .. وكنت أنا وصديقاتي نشيل الفيوز تبع اللمبات >>> كيفنا مانحب النور

يعني بأختصار أنواااع البلاوي في المدرسه
ومع ذلك مافصلوني
... الظاهر إنهم يحبوني ومايبون أفارقهم

المهم .. كان لابد من إني أنجح عشان أجرب
جلسة البيت ...
دخلت ثالث ثانوي ,, تخرجت بنسبه زي قلتها >>> مابقول لكم زي وجهي لأن وجهي أزين منها

حققت حلمي ... فجاني أبوي
كملي الجامعه يا بنتي يا بسه ....
وأنا : ابدددددددددن .. تكفى يا أخوي خلنا متفاهمين >>> حلوه يا أخوي خخخخخ
وكل واحد حر في نفسه ....
وقعد يحاول فيني ويحاول .. إلى أن أقتنعت بشرط ....!
مش السنه دي ... اللي بعدها
لأني تعبت وأبي أرتاح ********> أصلاً متى تعبتي عشان ترتحاين >>> كانت حركه عشان أخليه يخف علي شوي (( ذكيه مووو ))
فأقتنع .. وأصلاً غسل إيده وكان داري إني مابدرس لا السنه ذي ولا بعد مية سنه
.................................
وجلسنا بالبيت
أوكي أول يوم دراسه بعد آخر سنه لي في الثانويه
الناس كلهم مكتمين .. وطفشانين ومتجهزين رايحين المدرسه .. وأنا قاعده متكيه بالصاله أتابع التلفزيون ******** قمة الونااااااسه
فكنت أحس بنشاط عمرررررري كله ماحسيت به وأنا أدرس >>> بلا والله من الفلاحه الزايده

مــــــــــــرت سنه
وبعدها سنه ......

ما زلت استمتع ولم أشكي الحال

ليش أشكي .. ماني عندي .. أجتماع مع الناس .. مافي أكثر من جمعاتي ..
آكل وأشرب وأنام .. وأمي وأبوي وهلي كلهم حواليني
صحيح ساعات أحس بملل .. بس مو أكثر من الملل تبع الدرااسه واااااع
لأني أخذت راحتي وصرت أمارس هواياتي
بحريه .. أقرأ .. وأكتب .. وأصمم
ومبدعه درجه أولى >>> فالثقافه والفن ليست حكراً على متعددوا الشهادات
وأصبحت أكثر عقلانيه >( من جمبها ) <
صرت فيلسوفة زماني وحلالة مشاكل بعد

( عشقي الأنترنت )أعرف مداخله ومخارجه .. وتعلمت برامج التصميم .. وصرت حريفه واعطي دروس بعد >>> قولوا ماشاء عاد

والوضع جـــــــــــــــــداً عاجبني

المشكله ياناس إنه مافيش مشكله .. بس
ما أدري ... ليش الناس ضدي ... مستخسرين فيني راحة البال

بحكم صغر سني ..كل من سألني .. وش تدرسين
أجيبهم بفخر الأرض وبملئ فمي (عاطله ولله الحمد )
:: يووووو عااطله شلون عايشه أجل !

بسم الله الرحمن الرحيم .. عايشه أشم هواء
واشرب مويه وآكل كبسه وكل شيء تمام

يسألوني :: طيب ماتبين تشتغلين !!!
أرد ....:: ولماذا !! وش أبي بالشغل ؟!
مافي أحسن من البيت .. البيت أحسن ماريت

بس برضه صاروا يرددون علي السؤال
عمرهم ماسألوني .. وش هواياتك .. وش تحبين .. وش تكرهين

تصدقون ..
صار عندي فوبيا من كلمة ( وش تدرسين )
أي وحده تسألني هالسؤال يجيني هستيريا


هيييييييييييه ومرت الأيام تلو الايام .. بعدها يا ناس

صار عندي عقده نفسيه .. وصرت اشك بعد إنه صاكيني عين :o
صرت إحس إن العالم كلهم يدرسون وموظفين إلا حضرة جنابي
مسنتره في البيت جمب أمي حشاشة جوفي >>> فاهمه غلط

صرت أطامر من مكان لمكان ومن منتدى لمنتدى .. أدور على وظيفه مرموقه تناسب مستواي العلمي ******** أمحق مستوى
وأهم شيء فيه بنات اسولف معهم
بس لا يطرون لي الدراسه .. يجيني غلقه لا قالوا لي إدرسي
صرت أنتفض إذا سمعت طاري وظايف
مدري ليش سالفة الوظيفه عششت في مخي
من كثر ما أنا أفكر بالوظيفه صرت أقعد قدام المرايه ,, وأتخيل نفسي بمقابله شخصيه خخخخخخ >>> تبالغ

إلى أن حصل وبيوم من الأيام دلني العم قوقل
على منتداكم الموقر
وأنا اللي اشوف ناس دارسين
وناس ضايقييييين .. وناااس صدق محتااجين

وأنا اللي يرتاح قلبي .. الحمدلله يا ربي أجل مو أنا العاطله الوحيده في الدنيا خخخخخخ
الحمدلله .. الحمدلله .. الحمدللـــــــــــــــــــــه


مايستفاد من قصتي :

1_ من الناحيه الصدقيه ترا مافيه شيء يستفاد من هذرتي أبد
سوى إنكم تحمدون ربكم .. عالصحه والعافيه ... والعطاله مشكله
بسيطه
لو شفنا بلاوي أخواننا المساكين في فلسطين والعراق والظلم اللي عايشينه
عايشين بخيام مشردين ويبون بس يحسون بالأمان والأستقرار

2_ سلامتكم

في الختام
أتمنى أكون ضيفه خفيفه تضيف لمنتداكم ولو الشيء القليل ^^

تقبلو هذرتي وففلستي برحابة صدر

إن ماعجبكم موضوعي .. عادي أطلعوا
وإن عجبكم إدعوا لي بالتوفيق وبالوظيفه
لأني بصراحه عقلت وصرت افكر جدياً إني أشتغل
وأكون عضوه فعاله في بلدي الحبيب >>> لايكثر بس

أختكم / مس . بسه
مــياااو ^^

يامراحب نورتِ المنتدى يابسبوسة
الله يوفقك يارب ماشاء الله عليكِ عندك رغبة بالتصميم جربي تشتغلي برغبتك
حتى تتقني عملك كثير شركات تطلب مصممات وبرواتب حلوة بعد
وعموما الوظائف المناسبة لخريجات الثانوي استقبال او سكرتارية او ادارية
او معلمة رياض اطفال او مساعدة معلمة في مراكز المعاقين
الله يوفقك يارب واهلا وسهلا فيكِ بمنتداكِ وعقبال ماتصيري موظفة

ماشاء الله عليك صراحة انا كنت طفشان وقافلة معي من جد....
من كثر ما قعدت ادور وارسل لها الايميلات ولكن الحمد لله اني مريت على قصتك الجميلة بكل ما تحويه من خفة دم واسلوب لذيد (اسأل الله لك السعادة كما ادخلتيها على قلبي وونستيني الليلة وأسأل الله لك زوجاً تنسين معه هم البطالة يعني معه فلوووووس)

مس بسه
انا من رأيي تكملين دراستك الجامعية >>> هه ابنكد عليك
الله يوفقك ويرزقتس بالوظيفه اللي تسرك