السلام عليكم
اخواني انا متوظفه بنادي رياضي رسبشن يعني من شهر و10 ايام تقريبا مدري شفيني هالايام احس بملل رهيب من الدوام واحس بضيقه خلق واحس ماعاد ابي اداوم راتبي 3500 بس الحمدلله ابوي يوديني ويجيبني لانه قريب ولاراح اخسر شي لكن مدري احس انه كل وقتي يروح هناك مع انه ماعندي شي ابد مو متزوجه ومتفرغه بس الدوام المسائي في الايام العاديه من 2 الى 10 بالليل يعني ارتبااااط مره وبرمضان كنت اداوم اذا بالليل من 8 ونص الى 1 ونص واذا رحت بالنهار من 3 الى 6 يعني مرات كنت اروح بالنهار ومرات كنت اروح بالليل
انا لما كنت ادرس في الجامعه تركتها سنتين وقعدت بالبيت لاشغله ولاعمله وضيعت هالسنتين على نفسي وحسيت انها هي غلطه عمري فماودي اعيد مثل هالغلطه خصوصا ان نادر الحين الوظايف ماعاد احد يلقى وظيفه بهالسهوله
انا الحين مو محتاجه شي الحمدلله ابوي يعطين مصروف قبل مااشتغل وامي بعد يعني لو لاسمح الله تركت الدوام بيرجع لي المصروف
لكن ودي اجمع لي فلوس لبعدين لااحتجت مستقبلا شي يستاهل بدال القعده في البيت
مدري اللي فيني ملل ولااكتئاب وانا ترى اتعالج من عمري 17 والحين 26 والتعب النفسي هو اللي خلاني اترك الجامعه سنتين
مدري ملل ولااكتئاب ولادلع زياده عن اللزوم وحب للراحه ولاالشيطان يوسوس لي مدري شفيني
مع العلم لو تركت وظيفتي ماراح اقدم على وظيفه ثانيه لان عارفه نفسي مااستمر على شي زين قدرت اكمل الجامعه وواصلت
اكره الالتزام والبلاء اني متفرغه كيف لو تزوجت
اختي مشتركه بنفس النادي اللي اشتغل فيه
فكرت ادور لي وظيفه صباحيه بمدرسه عشان الويكند والاجازات واذا لقيت طلعت من النادي قال ابوي بس ترى انضباط وكرف مو زي النادي ترفيه وراحه
ساعدوني ودي استمر على شي ليش ارادتي ضعيفه بكل شي حتى متفشله اقول لاهلي بطلع من النادي من غير سبب مقنع او شي يجبرني اني اطلع بيقولون فيك بلاء خصوصا قعدت فتره ماعلمنا احد من اقاربنا اني اشتغل خفت يطلعوني بدون سبب بعدين علمناهم الحين بيقولون وش بها ذي مره تبطل دراسه مره تبطل شغل !!!
ولو بترك النادي حنا رواتبنا تنزل ب5 ميلادي يعني ب5 يوليو ينزل راتب يونيو
اترك نهايه شهر يونيو واستلم راتبي معهم في 5 الشهر والا اتبع اللي يريحني واتركهم بكرا واخذ الايام اللي اشتغلتها بس
مع العلم اني متردده ومو جازمه بترك الشغل بس نفسيتي زفت

السلام عليكم
انا انصحك تاخذي اجازة تسافري تغيري جو تطلعي شوي تزوري صحباتك اتوقع انتِ مضغوطه ومتشبعه من الدوام بسبب أنو اغلب وقتك فيه وخلاص مليتي منه فالافضل تبعدين عنه فترة اجازة عشان تشتاقين له ههههههههههه وترجعين بنفسية حلوة وتخف هالافكار
وكمان ابحثٍ عن وظيفة ثانيه اذا لقيتي وقتها فكري وشوفي الانسب لك ممكن انتِ مو عاجبتك بيئه النادي فغيرها مدرسه روضه شركة الي تحسي مناسب لك . او ممكن تسجلي فـ كورسات او اذا عندك هواية طوريها او افتحي لك مشروع صغنن كذا الخيارات كثيرة ومتاحه لك شوفي الانسب لك وقرري
لكــــــــــــن لاتتركين النادي وانتِ ماعندك بدددديل حتى لو وضعك المادي تمام , الشغل مش بس فلووس انتٍ كذا تشغلين نفسك وممكن ف دوامك تتعرفي على صحبات وناس جدد تختلطي بالعالم شي حلو فلوتركتيه وجلستِ ف البيت طيب وبعدين حتعجبك جسلت البيت ؟ خلاص جربتيها سنتين ماكفتك يابنت ؟
تعوذي من الشيطان واستهدي بالله اتوقع الموضوع مجرد ضغوط وملل يحتاج اجججازة
موفقة ..

استخيري الموضوع سهل استخيري تبقي واستخيي تتركي واي حاجة مضايقاك ادعي الله يحلها .
غيري هدفك شوي انا اشوف الناس في النادي اتعلم ثقافات مختلفة غيري واعملي تمارني اخر الدوام لتغيري من جوك وربي ييسر امرك .
غيري موضوع انك تريدي جمع المال للغد فقط اعملي جدول لبعض ما تريدي الحصول عليه مستقبلاً مثال : اشتري شقة -اشتري سيارة - اشتري ..... وكم المبلغ الذي احتاجه لذلك بعيد عن أن اهلك ماشاء الله متواجدين في حياتك.

تعوذي من الشيطان الرجيم لاتخلي الشيطان له فرصة عليك نصيحه مني لك لاتفصلي شوفي انا فصلت من عملي والله وتالله وبالله اني ندمت وليومك هذا واموري متدهور لا وظيفة ولا شي عاله على اهلي والحمد لله على كل حال خذي اجازة تريحين فيها

اذ انتي مرتاحه في شغلك واعيد واكرر لاتفصلي نصيحه لوجه الله


بــــالتـــــــوفيق

اتركي عملك نصيحة
بما انه امك تبغاك تكوني بالبيت معاها
وابوك يساعدك بالمصروف
اتركي العمل لوجه الله عشان امك تبيك تكوني جنبها
خاصة وانك مو مرتاحه بالعمل

إذا مرتاحة مع الموجودين معاك بالدوام إيش تبغي أكثر من كذا؟ صحيح الراتب مش ذاك الزود بس دام وضع العايلة المادي جيد فالراتب تقدري توفريه وتحفظيه لوقت الحاجة وتكوني حالك.. ومن شهر لشهر رفهي على حالك، أشتري لك شي تبيه بالراتب اللي تستلميه وسافري بالأجازات غيري جو.. وأطلعي من القوقعة اللي أنتي فيها وتعرفي على مصادر ترفيه وهوايات جديدة

حاولي تتواصلي وتتعرفي على البنات الموجودين حواليك متى ماصار عندك مجال يمكن تلاقي منهم اللي أهتماماته وهواياته مشتركة وبيمشي وقت الدوام سريع معاهم

بتلاقي وظايف أسوء من كذا.. بعضها مشاوير بعيدة وبعضها تعب وكرف، متعبة جسديًا واللي متعبة نفسيًا مع عملاء أو مدراء زفت، وبأسوء الأحوال كلها سوا فحاولي تشدي حيلك بالوظيفة اللي أنتي فيها لين الله يفرجها ويرزقك بوظيفة أحسن

وقت الفراغ هو الي يجيب الافكار والوسوسه و اكتئاب