السلام عليكم ورحمة الله وبركاته

الموضوع ومافيه ان والدي الله يطول بعمره حاب يدخل شريك مع صديق له ويفتحون لهم مكتب استقدام وطلب مني والدي استخدام إسمي بحكم انه من ضمن الشروط مؤهل بكالريوس انا محتاره م ودي أرد والدي ابيه يترزق الله وبنفس الوقت خايفة ع مستقبلي لان ع كذا مراح اتوظف ولا اضمن ان مشروعهم ينجح هو قالي لك 10٪ من الأرباح وهم 45٪ لكل شخص منهم
اللي حابة اعرفه كيف اضمن حقي مستقبلاً بحيث اني م اندم لو تركوا هالشغله وعمري راح وبعد اضمن م اتورط بأي قضية قانونية ودوليه

انا شرطت انه يمشون لي 7000 شهري وأني اخلي مسؤوليتي امام محامي من اي قضية تخص المكتب سوا غرامات سرقات رشاوي وغيرها


انتم وش رايكم ؟ اعطوني اقتراحاتكم تكفون

كل هالشروط حاطتها لابوك
يا قو قلبك يا شيخه

الشغله ماهي لابوي لحاله معاه شريك هذا اولاً الشيء الثاني من حقي اضمن مستقبلي خصوصا اني راح أخسر التوظيف اللي هو راح يكون أمان لي بعد الله في هالحياة وهذا لا هو حرام ولا هو عيب ولا فيه عقوق واخيراً التجاره مافيها شيء اسمه ابوي او اخوي او زوجي حتى لو كان فيه بينا ثقة لازم الواحد يوثق لضمان حقوقه مستقبلاً لان محد يعرف وش راح يصير ف المستقبل ،، وطبعاً انت رجل ف مراح اصلا تفهم كلامي ذا راح يفهموني البنات

وياليت القى رد يخص موضوعي

استغفرالله بس الحين تركتوا المهم وركزتوا ع ابوي ؟ وش هالعقول !! صدق اللي إيده بالماء مب مثل اللي يده ب النار !
حبيبتي اذا انتي عندك تجاره وابوك تاجر ووراه ورث م تحتاجين بعده أحد مب كل الناس مثلك ،، انا ابوي م عنده شيء يأمن لي حياتي بعد عمر طويل ان شاءالله ومن حقي اضمن مستقبلي والا عارفته اذا ربي رزقه ان شاءالله مب مقصر معي واذا انتي من النوع اللي بـ تعتمدين ع زوجك يصرف عليك هذا شيء راجع لك انا ضد هالفكره ولا أحبها احب اعيش مستقله ماديا عن زوجي مب كل شيء اعتمد عليه فيه
لكن أفهموا انا اتكلم عن المستقبل م اتكلم عن الوضع الحالي لاني راح أخسر الوظيفة ولا فيه شيء مضمون ان شغلهم راح يستمرون فيه يعني لو فرضا لا سمح الله تقفل المكتب بعد 3 سنوات ؟ وش مصيري أنا ؟ لا اللي استفدت ودخلت لي مبلغ اقدر أبدأ فيه ولا اللي توظفت وضمنت لي دخل شهري امشي أموري فيه ف رجاء اللي بيرد ع الموضوع يركز هالمهم ويساعدني لا يجي يسوي ع راسي ابوك وابوك وخصوصا محدودين التفكير اللي بس يفكرون باليوم واللحظة بس احتاج نصائح ناس تفكر بعمق وتحسب حساب لكل شيء

اكيد الاستخاره م نسيتها اما بخصوص الوظيفة انا ترشحت لوظيفة وسويت المقابله يعني بنسبة 70٪ ان شاءالله بيقبلوني بالوظيفة عشان كذا انا محتاره وبين نارين والا اذا ع جداره م ترددت دقيقه وحده لاني عارفه ليلي طويل مع جداره ،، اما بخصوص الاوراق اكيد بتكون رسميه ومع محامي هذا منتهين منه ومتفقين عليه الثلاثه الاطراف لكن انا اقصد كيف اقدر اضمن حقي لو مثلاً م نجح المشروع وتقفل بيكون وقتها اكيد رفضت الوظيفه وراحت علي والمشكله مافيه احد معاه بكالريوس يحطونه بدالي كلهم دبلومات وثانوي وموظفين
والمشكله الوالد متأمل ومتحمس للمشروع وهذا اللي كاسر ظهري اني ارفض الفكره واحطمه عشان كذا ابي شيء اسويه يضمن حقي مستقبلًا عشان م اندم اذا لا سمح الله خسروا

انتي ركزي على الشريك خلي ابوك
هل هو قريب هل هو الي طلب من ابوك هذا المشروع
امبين ابوك طيب لازم ينتبه قبل مايدخل شراكه معه
وذا ثقه الشريك تعرفونه حق المعرفه لاتهتمين لاي شي ثاني توكلي على الله ومن توكل على الله كفاه
وماتدرين لو تحصلين على وضيفه والسبب انك ساعدتي ابوك
خلاصة الكلام انتي قاعده تنفعين ابوك كيف راح يكون الجزاء لك من الله يهنيااااالك
لاتفكرين بالخسارة ابد مثل هالمشاريع ناااااجحه وعليها اقبال بس هم يتميزون باشياء وخلاص يقبلون عليهم الناس تفائلوا بالخير تجدوه

لا الشريك م يقرب لنا ولا اعرفه يقول صديق له وتعرف عليه عن طريق هالشغله يعني هم عندهم خبره سابقة بموضوع الاستقدام
وفعلاً ابوي طيب وعلى نياته ومتحمس مره
بس والله مدري الفكرة فكرة مين فيهم ،، بس ليه قلتي ان مبين انه طيب ولازم ينتبه ؟ من وش ينتبه بالضبط ؟
اذا في شيء ببالك قوليه عشان نأخذ احتياطاتنا
والله يسعدك ريحتيني لما قلتي المشروع ناجح
والله يكتب اللي فيه خير .