اخواني ااخواتي انا من ذوي الاحتياجات الخاصه
ابى فكرة مشروع على قدي
جمعت لي 16 الف وطلعت لي سواق واللحين ودي اشغله يطلع راتبه على الاقل واذا حتجته اخذه
مع العلم اني في قريه والحين ابغى فكره ...

مراحب

سجليه في كريم

وحطي رقم خاص بالتوصيل خلف السياره

(توصيل مشاوير خاصه) والرقم تحته

اهم شي انتبهي من غرامات ساهرررر

وبالتوفيق

ماشاء الله تبارك الله
فكرة جداً جميلة، وخاصة عندك في القرية.
طبعاً اكيد فيه عندكم مدارس، وفيه مدرسات جايين من اقرب محافظة او مدينه لكم او قرية قريبه لكم فيها مدرسات جايين من برا القرية.

الخطة كالتالي:-
تروحين او ترسلين احد من قريباتك، يروحون للمدرسه او اذا تعرفين احد بالمدرسة, يشوفون المعلمات اللي جايين من برا القرية, وتعرضين عليهم توصلينهم من والى, واذا كانت وحده قولي بعطيك خصم اذا جبتي لي مجموعه معلمات.

الخطة الثانية:
شوفي الطالبات اللي في القرية عندك، واذا كانو قليلين شوفي القرية الثانية اذا كانت قريبه منكم، وتعرضين عليهم توصلينهم.

الخطة الثالثة:
المدارس/ مرات اذا كان مافيه عدد كافي في القرية من طلبه او طالبات، تكون دراستهم في اقرب قريه اذا قريبه، تشوفين لك احد

الخطة الرابعة:
تشوفين عندك من اهل القرية اللي ماعندهم عيال او مشغولين، انك تجيبين لهم اغراضهم من اقرب محافظة او مدينة منكم بمبلغ تتفقون عليه.

الخطة الخامسة:
انا ما ادري وش نوع السيارة اللي معطيتها السواق، اذا كانت صغيرة وحصلتي طلبات توصيل شوفي لك فان، واذا حصلتي مزارع عندكم ويحتاجون يوصلون ثمرة المزرعه او غنم تجلب للسوق، تعرضين عليهم، واشتري لك سيارة ددسن مستعمله قد فلوسك، وتعينين خير باذن الله .

///// نصيحة/////
السواق اذا زاد عليه الشغل حاولي تعطينه بين فترة والثانيه مكافآت او كل احد يوصله مبلغ مقطوع لو 25 في الشهر تزيد او تنقص، منها يتحمس ولا يصير يستهبل من تأخير وخرابات سيارة واعذار، ومنها تكون اخلاقه زينه مع الكل واللي يخدمهم، وتحصلينه يسألك كل فترة مافيه شغل ثاني، وممكن بعد يبتكر لك افكار عشان يسترزق الله معك.

الخطة السادسة:
حطي لك حوش صغير، واتفقي مع السواق اذا كان له في البهم والغنم، بعطيك ربع الارباح، عشان يتحمس ولا تشيلين همها نهائياً، وكل شهر تحطين لك كم راس في الحوش، وهو اللي يهتم فيهم مع شغله الاساسي التوصيل.

ونصيحة اخيرة///
اجعلي جميع الاتفاقات في اي شي معك انتي، وليست معه.

وربي يوفقك ويوسع رزقك وييسر امرك

ماشاء الله الاخوان قبلي ردوا عليك باللي فكرت فيه ,
1- فيه توصيل طلبيات برضوا انشري رقمه عن كل بقاله ووزعي كروت يشتري لهم اغراض البقاله وكذا
وماهو كل سواق يحب الغنم هو يجي على اساس انه بيسوق انتبهي لاينحاش عليك اذا ماوده
ترا اسهل شي النحشات بالقريه


2- عندك الله يرزقك حدائق ولا مكان تجمع وتنزه فيه نشاط سكاني خليه يبسط بأشياء يحبوها الأطفال العاب وبارد
اشتريها بالجملة مدخولها ترا مناسب ومجربة
او اشتري سياكل وسيارات صغيره للاطفال يلعبوا فيها ارخص لك وخليه يأجرها ربع الساعه ب 10-15 ريال .
لنعتبر كلفتك هذي الاشياء3 سيارات صغيره , 3 سيأكل صغيره 2000 ريال .. 10* 6 =60 ريال كل يوم لو كل سياره استاجرت مره ب أسوأ حال
60 * 25 يوم =1500 ريال , وحسب النشاط السكاني اذا ماعندكم ناس ماينفع ابدا , توي شايفته هذا المشروع ماشاء الله مايووووقف التأجير وبالدور طبعا عندنا باالرياض

وبس هذا اللي جاء ببالي .