السلام عليكم ورحمة الله وبركاته

انا ابغى افهم ليه مقطوعة الضمان الاجتماعي متأخره وش الاسباب اللي تمنع صرفها لي الى الان؟

انا* ورب العرش العظيم وحده محتاجه انا ام عيال والعيشه ضاقت ضاااقت وكل مدخولي ١٩٠٠ ريال
واول ماينزل معاش الضمان يطير ولا يكفي ولا تسد الحاجه
ويمين بلله مايمدينا حتى نفكر نتسوق

ياعالم وصلت مرحله افكر الفين مره قبل لا اقضي مشوار واركب مع تكسي!!
صرت من كثر ما انا شاده الحزام استخسر امد العشره ريال ادفعها للتكسي البنقالي حق اي مشوار ابغى اروحه!!

والمصيبه وصلت بي المهانه الى ان حتى التكسي شاخ علي!!
اركب مع تكسي ما يرضى بالعشره ريال اللي أمدها له
ويشهد علي الله وهو وكيلي التكسي يا يصرخ في وجهي اويسب ويلعن فيني كني بايقه حلاله !!

والمشوار اللي حقه ١٥ يبي ٢٠ واللي كان ب٣٠ صار ب٥٠ ريال
خلاص بطلت اطلع و احيانا ماعندي ادفع والله !!
انا كم مره انزل من التكسي مغبونه اللي قال لي ان شاء الله انتي موت !!
اللي يقول سعودي هرامي !! واللي يسبني ويقول لي كلب !!

ماسوى علينا والله المشاوير كلهم يبون مني ادفع الدبل
وانا ياما بكيت من الإذلال .. لا تقولون لي اطلبي اوبر و كريم انا اذا حصل وصار عندي اشتراك انترنت بعت الجوال !!


انا مو هذا اللي مضيق صدري لا ..
بس اللي قاهرني و الذي نزل على صدر محمد انه احيانا مافي بوكي غير عشره ريال بس واللي فعلا يعور قلبي اني أمدها لتكسي وعقبها يسبني و يدعى علي !!


انا تراكمت علي الديون مطلوبه ايجار الشقه و تأخرت بالسداد
والحين تدبلت الأسعار وفواتير الكهربا
وفصلوها علي قبل اسبوعين في عز الصيف في شهر أغسطس خسنا انا وعيالي ٥ ساعات من ١٠ الصبح للساعه ٣ العصر يالله رجعت !!

يعني بذمتكم يا عالم شتبون وحده مثلي انها تسوي ؟؟

قدمت على المقطوعه وانتظر وانتظر ولا زلت انتظر !!

اخر مقطوعه استلمتها في سنة* ١٤٣٥ والحين سنة ١٤٣٨ والشهر الجاي بتكمل سنه ثالثه وبندخل سنه ١٤٣٩ سنه رابعه !! وكل ما شيكت الحاله لسه تحت الدراسة ؟ وش تدرسون ؟


سؤال بس إلى متى بنتظر ؟ وش تبون مني اتحمل اكثر من اللي تحملته ؟
بذمتكم هذا مو اذلال ؟


قلتو المقطوعه تصرفونها بس للي فعلا محتاج
طيب انا محتاجه !!

قلتو انها خلاص ماراح تكون سنويه انتظرو سنتين
طيب هذاني بغلق ثلاثه سنين وبدخل السنه الرابعه !!

قلتو اللي يتأخر يروح يراجع
طيب راجعت مكتب الضمان وكلمت المديره وقالت انا مابيدي شي و ما اقدر على شي !!

قلتو قدمي طلب للوزير صوتك مسموع
طيب كتبت ايميل للوزير وصوتي ابدا مش مسموع !!

انا ماكتبت هالكلام الا لاني خلااااااص فعلا متضايقه ياعالم بنفجر والحال ضاااااق

من شوال وكل شي صار ناار مرتفع سعره اذا مو دبل صار تربل !!
انا ورب البيت ورب العرش العظيم ما يمديني اترس الثلاجه والله !!


العالم تستانس في الاجازه واحنا ماكلين هم بس نفكر
احنا مانبي نسافر !! والله ثم والله اننا مابي اسافر

ومو لازم نتمشى ولا نتسوق
ولا نبي حتى نلبس جديد !! كل هذا مش مهم

احنا بس كل اللي نبيه بس نعيش بكرامه ابي اسدد الايجار !!
ابي اقدر اسدد فاتورة الكهربا بس
مانبي نعيش في قلق وتفكير وحيره مابي نحاتي تنقطع علينا الكهربا او يشتكوني الديانه !!


ترى والله مايصير اللي قاعد يصير
كرهت عمري الكل يحن على راسي
اللي يتصل واللي يرسل يبي مني اسدد !!

اقسم بلله ان حتى هاذي المقطوعه اللي حسيت بمهانه وانا انتظرها
هالمقطوعه اللي من ثلاث سنين وهي تحت الدراسة اقسم بالله انها حتى لو نزلت ماراح افرح فيها !!

لانها ما راح تكفي ولا بتسد الديون اللي قاعده تتراكم علي وكسرت ظهري !!

هاذي ماهي عيشه والله !!
استغفر الله العظيم واتوب اليه استغفر الله
يالله انك* تسامحني على كل كلمه قلتها في لحظه ضعف يارب لا تمتحن صبري ولا تكتبني من القانطين


انا يا مسلمين انا اختكم في الله انا ام عيال مراهقين عيالي طقت كبودهم وتبهدلو بالحياه
اذا تبون تسوون فينا خير وصلو صوتي للمسئولين يامسلمين خلوه مسموع !!


سؤالي :

اذا هاذي المقطوعه لسه باقي واجد على دراستها او لازم انها تكمل بكالوريوس
او انها ماراح تنزل .. ممكن على الاقل تعلموني ايش هي الحلول البديله ؟؟


وش تسوي الامهات السعوديات اللي مالهم حيله مثلي ولا يبون يتسولون في الشوارع ؟
وش تسوي الحريم الضعوف اللي مثلي عشان بس تعيش مع عيالها عيشه تحفظ فيها كرامتها؟


جزاكم الله خير وربي يصبرنا على الحياه ويرفع عني وعنكم الهم وعن جميع المسلمين

الله يرزقني ويرزقك ويرزق كل محتاج من واسع فضله الله يكون في عونا

كل عائله فيها ناس تجار وزكاتهم تغني فقيرهم
بس للاسف محد يهتم باحد وبعضهم يستكثرون ع الفقير الجوال القديم ماتشوفينه ولا مع شغالاتهم
الله يرزقنا من فضله

وعليكم السلام
للأسف لايوجد تكاتف بين مستفيدي الضمان لعرض مشكلتهم بالصحف الالكترونيه ولو تم عرضها لأصبحت مشكله رأي عام وينظر هؤلاء المسئولين بنظره ايجابيه لهذه المشكله نسمع عن ارقام فلكيه عن الاعداد المصروفه من المستحقين وهي في رأيي غير صحيحه اذا انه من غير المعقول ان كل شهر يصرف لمايقارب ل 30000 مستفيد وبالنهايه نرى ان المشكله لازالت قائمه واخبار تقول انه تم اسقاط فوق ال 400000 مستفيد واعداد المنتظمين بالضمان 850000 مستفيد فكم الباقي ؟
الى متى والمسئولين بالضمان في وادي والمستفيد في وادي
اعرضوا مشكلتكم على الصحف والى الله المشتكى

__________________
لااله الا انت سبحانك اني كنت من الظالمين .. استغفر الله العظيم
اللهم احفظ بلادنا وولاة امرنا وأمدهم بالصحه والعافيه
ان غبت يوما فتذكروني بدعوة صادقه وان اسأت او اخطأت بحقكم فكونوا كرماء
دخول للمنتدى قليل والمعذره

عليكم السلام ورحمة الله وبركاته الله يااختي يكون بعونك ويرزقك الرزق الحلال الطيب الوفير ويبلغك باولادك ويرزقك برهم وتذوقين نفعهم ان شاءالله لاكن احنا يامستفيدين الضمان ترانا في مركب واحد وانا مع اخوي محمد المفروض نتضامن مع بعض ونشوف حل ولاكن نحتاج التوجيه يعني المفروض نفتح موضوع نجتمع فيه ويدلنا اخوي محمد بأي صحيفه نكتب ووين ونتكاتف لعل يوصل صوتنا ولو ماوصل ع الاقل نكون جربنا

هل لديكم الاستعداد للشكوى من يرغب الشكوى
تفضلوا
https://al-marsd.com/contact_us
الشكوى يجب ان تتضمن الاتي
المقطوعه لها سنوات وهي لم تصرف ويذكر المشاكل المتعلقه بالمستفيد مثل الفقروعدم دفع الاجارات والتهديد بالطرد والامراض

عدم الالتفات للشكاوي من صوتك مسموع حيث لم يتم الرد على المستفيد من 7 اشهر
الغاء ارقام الاستعلامات 8001222777 + 0112915588 واستبداله بالرقم 19911 وهذا الرقم هو لتصريف المستفيد فقط الموظفه تفيده بمراجعه الضمان عند طلب المستفيد رقم الطلب الخاص بالمساعده وكان بالسابق يحصل عليه بمجرد الرد الالكتروني
اذا تم التكاتف من الجميع ونشر الشكوى فيمكن للمسئولين الاطلاع عليها وقد يكون هناك لديهم الحل تجاه الشكاوي

احد ارسل
الجواب

لااتوقع

وعليكم السلام
ي ختي اغلب اللي بالضمان يمرون بنفس المعاناه وانابقريه واروح على رجلي اجيب اغراضي مافي لموزرينات ولاغيره وينكسرظهري وبناتي الصغارمن الشيل حتى لاخرب شي بالبيت نقعدبالشهور مانقدرنصلحه واهلي بعيد وعيالي صغارومسؤؤليه تهدالحيل ومع كل هذا صابره وادعي بكل ساعه ربي يفرجهاعليناونعيش مرتاحين والمساعده فقدت الامل بنزولهالي سنتين وذي الثاالثه ولاجت بتروح كلها تسديد ديون محديسمع لنالامسؤؤلين ولاغيره صوتك مسموع كذب وكل الارقام كذب والوزاره بكبرهاكذبه عايشه على اموال الفقراوالمحتاجين الله حسيبهم ولايحللهم
والحمدلله ع كل حال
والله يفرجهاعليناوعلى كل محتاج

صدقتي - أختك في الله - وصفتي جزءاً من معاناتنا جميعا ..
الأسعار تزيد و الضرائب قادمة و المقطوعة لا تأتي .. نحن بحاجة الى ايصال صوتنا و الأخ الكريم محمد البلادي قدم لنا حلا قد يسهم
في تفريج مانحن فيه .. المهم أن نسعى في هذا الاتجاه ..

أكيد بعض المستفيدين و المستفيدات يعرفون صحفيين في الصحف السعودية لماذا لا يعرض عليهم مساعدتنا و ايصال صوتنا

رأيتم كيف صرفت لنا معونة رمضان بعد أن تحرك بعضنا في تويتر ..
المعونة جاءت بعد يومين من الهاشتاق ..

الإيجابية و السعي و التحرك أفضل لنا من لعن أوضاعنا ..
لدينا حكام يهتمون لأمرنا يجب أن يصل صوتنا اليهم لنتخطى العقبات التي يضعها بعض المسؤولين
لتكون من هنا البداية .. من منكم يعرف أحدا في الصحافة ؟
من منكم مستعد لانشاء حساب على مواقع التواصل لدعم قضايا مستحقي الضمان ؟

خلونا ننسق مع بعض و نشعل شمعة بدلا من لعن الظلام ..

جزاك الله خير اخوي المنتصر انا بكتب ويلا الباقين يكتبون خلونا يد وحده

تم الارسال جزاك الله خير والله ينور عليك وين الباقين




الاتصال بنا
تم ارسال الرساله بنجاح ٫ يتم التواصل معك قريبا
أو الإتصال على الرقم : 00966535467555
صحيفة المرصد مصرحة من وزارة