السلام عليكم
كل عام وانتم بخير
انا تخرجت ضابط بوزاره الدفاع وانا جامعي تخصصي لغات وترجمة وطبعا حطوني بسلاح ميداني وعمله متعب ع كلام الغالبيه المهم قدمت قبل سنتين ع وزارة الخارجية ملحق دبلوماسي المهم تو جتني الموافقه ع الوظيفه اللي هو الترشيح والزبده ابي استشيركم هل استمر علما ان بدايه السنة استحق ملازم اول ومحتار هل فيه مشكلة لو فصلت ورحت لهم لان حتى قراري ما جاء للحين بتعييني وباقي استلم المكافاه ببتتاخر شوي لين ينزل القرار وش رايكم ي اخوان اروح للخارجية مدني ملحق دبلوماسي او استمر في الدفاع علما انهم حطوني في غير تخصصي وعمل متعب جدا اللي له خبره في طريقه الفصل وافهمو قراري م جاء وهل يلحقني شي لان سالت النقيب عندنا يقل اتوقع مايلحقك شي لان باقي م نزل قراراتكم للحين فافيدوني الله يعطيكم العافيه ابي الحق قبل م يروح العمر يمشي ونبي نتزوج وناسس حياتنا وناس يقلون اطلع ورح هناك والوالد رافض ولا ادري والله افيدوني ي اخوان

الي يدور الراحه ما يشتغل احسن له في كل مكان تعب مافي شيء اسمه وظيفه على مكتب و نوم حتى الي في المكتب يتعب


و الحين ما عاد فيه رجعه لوراء

و لا تصير مثل صاحبي جامعي خلص كل اوراقه في الحرس الوطني و عطوه رتبه وكيل رقيب

و جته وظيفه في الاحوال مدني براتب كويس

و راح لهم و لا قبلوه و رجع للحرس قالوا قدم من جديد و عينوه بعد 6شهور برتبه جندي اول


الي تستفيده من هاذي القصه

((الطمع قلل ما جمع))و ((امسك قردك لا يجيك اقرد منه)) و (( عصفور في اليد احسن من 10 على الشجره))

ياخي أتق الله في نفسك ملازم اول ومحتار !! باقي في راسك طمع الناس متزوجة ومديونة وماهي لاقية حتى جندي أحمد ربك
على الوظيفة الي من الله عليك بها وتعوذ من الشيطان وأقضب أرضك لاينتهي بك الوضع في مكاتب التجنيد مع ملف علاقي

اذا انت ضامن الخارجية روح لهم واترك العسكريه واذا منت ضامن خلك ملازم اول افضل لك الف مره راتب مغري

طيب حاول تغير مكان عملك .,, استفسر من رئيسك خاطب قوة ثانية .. كلم يمين يسار يمكن يتعدل مكان عملك

وللعلم كل خريجين وزاره الدفاع الجامعيين اللي جا تعيينهم برية عليهم [ سنه- سنتين ] ميدانيه الزامية ثم يوجهونك على تخصصك بعد ماتخلصها