عندي استفسار طويل شوي وتحملوني جالسه افكر بمستقبلي
انا معي بكالوريوس واشتغل الحين دوامي مسائي من 2 الى 10
قدمت على مدرسه اهليه الثلاثاء وشرحت درس اجتماعيات بس ماردو لاامس ولااليوم وممكن يردون الاحد بس انا ماردو الاحد معناته خلاص راحت الوظيفه
المشكله الغو عقود الموارد الجديده وصارت المعلمات بدل 5100 طبعا بعد خصم التأمينات صار مافي موارد ولاادري كم يصير بالضبط بس شفت ناس تقول 2500 واللي تقول 2200 ممكن على حسب المدرسه
اختي تقول اذا بيعطونك 3 الاف عادي لان راتب المكان اللي اشتغل فيه 3500 بس بتكون المدرسه صباحي وويكند واجازات وساعات دوام اقل لكن بالمقابل تحضير الدروس ابتدائي ومتوسط وثانوي بامسك لان المديره قالت كذا فبيصير احضر دروس كثيره باليوم الواحد واختي معلمه تقول اعداد الاسئله بتتعبين ومناهج الترم الاول غير الترم الثاني وكل يوم غير ولاعندي خبره في التدريس ابدا فيبلي اأسس نفسي صح وودي اكسب خبره في التدريس
قلت لاهلي ان مادقو الاحد بسجل بدبلوم صباحي دقيت على معهد عند بيتي اروح مشي حتى قالت لي دبلوم الموارد البشريه ب16 الف سنتين تدفعين كل شهرين ونص الفين والدراسه تبدا الاحد واخر يوم للتسجيل الاثنين سالت اهلي ودي ان مادقو علي المدرسه الاحد اروح اسجل قالو عادي بكيفك وبدفع انا وبيساعدونن امي وابوي قالو عادي بنساعدك هم ماعليهم قاصر بس انا بعد بدفع عشان التزم واتشجع اكثر مو اتكيسل واغيب بعض الايام
المهم مدري هل دبلوم الموارد البشريه له مستقبل حلو هل باستفيد ؟ هل هو مطلوب بكثره عندكم فكره واسعه عنه انا عندي فكره لكن بسيطه عنه
المهم قال ابوي بتقدرين تدرسين وتشتغلين ؟ فكرت عندنا قوانين بعملي خلتنا نوقع عليها الاداريه انه
( في حال كانت الموظفه طالبه يتعين عليها احضار جدول المحاضرات الخاص بها معتمد من جهه الدراسه الى الاداره لتنسيق ساعات العمل بما لايتعارض مع دراسه الموظفه )
اني بقولهم بما ان موظفه الصباح تداوم من 8 الى 4 العصر والموظفه الثانيه من 1 الى 9 وانا من 2 الى 10 الساعتين ذي نكون 3 موظفات فانا بجي من 4 الى 10 وعادي بيخصمون من راتبي 500 ريال يصير راتبي 3 الاف انا راضيه في حال باستفيد شهاده بعد
وانا اصلا مقدمه على حافز وباقي 29 يوم عشان اعرف مؤهله ولالا لكن في حال سجلت بالدبلوم مافي حافز لان اسمي بيصير طالبه
انا بصراع نفسي وبس افكر مابين وظيفتي او وظيفه المدرسه المدرسه باكتسب خبرات لكن وظيفتي ولاشي
اختار حافز لااختار الدبلوم
اتمنى فهمتوني بتقولون انتي حره وراجعلك واستخيري اكيد ماقلنا شي بس مررررره محتاره لان كلها فرص حلوه وكل وحده لها مميزاتها
وجزاكم الله خير

وش تخصصك ؟
وهل عندك تربوي ؟
وكيف معدلك ؟

حرام والله 16 الف ودبلوم سنتين
خذي ماجستير احسن لك
اصبري شوي لاتستعجلين وتحصلي ماستر ب 50 الف مدفوع
انتي باي منطقه؟

تخصصي للاسف جغرافيا غير تربوي ولااختبرت قياس لانه تخرجت الترم الاول العام والاختبار كان قبل تخرجي
معدلي 3.3 من 5
الماجستير مااقدر لان جيد تقديري وعارفه قدراتي زين والماجستير يختلف من جامعه لجامعه الرسوم وكلها خياليه
الدبلوم 16 الف بسنتين مااشوفه خيالي لان جامعه نوره عندهم الموارد البشريه الترم 3500 و5 اترام يطلع 17 الف وخمسميه وبدفع مواصلات لجامعه نوره كان سواق الباص ياخذ 3 الاف بالترم يعني 750 بالشهر
والدبلومات الثانيه ببعض المعاهد ب25 و30 الف
انا مو مشكلتي الرسوم انا اتكلم وش الافضل
انا بالرياض