السلام عليكم ورحمة الله وبركاته



اخواني الاعزاء انا ناوي بإذن الله افتح مشروع مطعم برجر لأني اشوف مطاعم البرجر سوقها ماشي ماشاءالله
والمنطقة الي انا فيها مافيها مطعم برجر مختص فجتني الفكرة إني افتح المشروع


الي ابغاه منكم تساعدوني وتفيدوني كم يكلف

ومن وين اقدر اجيب المعدات مثل الكائن والشرايح اللحم ومن هالشغلات

واذا فية احد يساعدني تكفون لاتبخلون لان هالمشروع اول مشروع لي بحياتي

والف شكر لكم

ياربع مافي احد يفيدني 💔؟

مرحبا اخوي

الله يوفقك ويكتب لك اللي فيه الخير

حبيت افيدك بموضوع المكائن الخاصة بتجهيز الطعام, تحتاج في العادة لمشروع زي هذا شواية كهربائية كبيرة او صاج او خلنا نقول الاثنين
ومكينة قلي البطاطس تكون كبيره عشان تناسب المشروع وتعمل كمية كبيرة بقلية وحده, وثلاجة كبيرة لحفظ الاجبان وفريزر لحفظ اللحم

بالنسبة لها انا اعرف بعض الاماكن اللي ممكن تفيدك مثلاً في الرياض بحي البطحاء يوجد اكثر من محل يوفر معدات تجهيز الطعام من الافران والقلايات الخاصة بالبروستد والبطاطس إلى ثلاجات عرض الطعام, يعني مكان واحد تروح له توقف سيارتك وتتمشى ع راحتك فيه تقارن بين الاسعار وتشوف الانسب والافضل وتاخذ اللي يناسبك

وبالنسبة للخبز الخاص بالبرجر, تقدر تتفق مع احد المخابز اللي تشوف مخبوزاته طازجة دائماً وممتازة على كمية محدده يوفرها لك كل يوم بحيث يتم التوصيل إلى مكان المطعم ويأخذ حسابه على اساس يومي او اسبوعي او شهري حسب الاتفاق مع مدير المخبز

الأجبان طبعاً مايحتاج اشرح لك من وين توفرها, تشوف لك شركة مناسبة مثل المراعي او اي شركه اخرى وتحاول تتواصل معهم عن طريق رقمهم في الموقع الالكتروني ممكن يفيدونك اكثر

اللحوم, من الأفضل انك تتواصل مع ملحمة تكون لحومها طازجة ومحلية

انا ماعندي اي خبرة عن المطاعم ولكن كانت في راسي فكرة نفس فكرتك بالضبط وهذا اللي طلع معاي وعشان الدعم المادي ماقدرت اسويها

الله يوفقك ويكتب لك اللي فيه الخير

اذا حبيت افيدك أكثر بموقع محلات تجهيز المطاعم (الشارع اللي هي فيه) انا حاضر

الله يوفقك ويسدد خطاك امين

اهلا اخي
نصيحتي تأجل مشروعك الى بعد 6 اشهر حتى تتضح لك الرؤية لان هناك قرارات سوف تؤثر على المشاريع الصغيرة منها رفع الدعم عن الطاقة وفرض رسوم على العمالة وكذلك الضريبة المضافة سوف تزيد من الاسعار غير الركود الحاصل في الاسواق شوف كثرة المحلات والمطاعم لتقبيل والان طبقو النطاقات الجديد صار سعودي مقابله 5 عمال بدل ماكان 9 واغلبب المؤسسات الان في النطاق الاصفر والاحمر
واذا كنت ناوي تفتح المطعم لازم يكون عندك مبلغ احتياطي بغطي لمدة سنة من ايجار ورواتب عمالة الشي الثاني اضمن العمالة قبل ماتفتح عشان ماتتورط والله يعينك على تعقيدات وزارة العمل في التأشيرات وابتعد عن العمالة العربية حاول ان لايكون الايجار اكثر 35 الف لان وراك رواتب ورسوم وفواتير وسكن عمالة
بالنسبة للمعدات في الرياض
طريق المدينة مع تقاطع شارع البطحاء يسمى شارع الخطاطين
وعندك شارع الخزان والضباب وكذلك في محلات في حراج بن قاسم مقابل الكبري الحراج الثاني
بالنسبة لشركات ممولة لمطاعم البرجر عند شركة اليسرة تمول اغلب مطاعم البرجر هذل موقعهم تواصل معهم وهي شركة كويتية موقعهم في الرياض العزيزية خلف سوق الخضار
http://www.alyasrafoods.com/ar/locations-contact-info/
اتمنى لك التوفيق

من ناحية اللحم والاكل والمنيو كلمني خاص وانشالله مايصير خاطرك الا طيب
بعطيك كل معلومات نجاح المنيو