ياهاجس(ن) عنا علي طالبك مج

ذات أمل · #1 (**permalink**) 11-11-2017, 03:07 AM

ياهاجس(ن) عنا علي طالبك مج

وإلا تعال وراقي الذوق ناجه

الخيل للمغزى إلا مست السرج

والحيل بالله يامنوي هجاجه

دهام وأيام الزمن بعضها عرج

تضيق ضيق مفوهات الزجاجه

وأنا حريص وغيري أبرد من الثلج

وعزي لمنهو له مع الناس حاجه

تكفى يابن عمي ترا خاطري غنج

حرف(ن) جبرني مالنا فيه حاجه

لاشك قافي له مداخل ومخرج

سوقت سوق(ن) مالقينا خراجه

اما سفهك وحط موضوعك بدرج

وإلا تغلى جعل يفقد علاجه

يارب لاتجعل لنا موقف(ن) حرج

عند الخسيس اللي براسه نعاجه

ويارب لاتخلي من اللي لهم عج

بالطيب ووجيه(ن) غشاها ابتهاجه

الوجه يضحك والقفى مابهم فلج

طيب على ساس ومابهم عواجه

مثل النجوم وخل ماطال من هرج

كل(ن) يضوح للنشاما سراجه

وانا بخير وراس قوم لهم برج

يوم القشر والشر ثور عجاجه

الطيب ورثي لي عشاقه ومنهج

والله يجنبنا الرخم والحلاجه

والله ولا غيره له الصوم والحج

عليه شكوى همنا وانفراجه

سبحت باسم اللي بروقه تلاعج

من معسراته فج ماها وهاجه

بسيل يهول العقل لام(ن) تدرج

منيبها والصبح فلل حجاجه

في خايع(ن) لامن ربيعه تبرهج

وعذب النسايم روقت لك مزاجه

غرام غمر(ن) عن زحام البلد هج

قطع الخرايم يابن عمي علاجه .

الشاعر :علي بن رفدة .