سلام عليكم ورحمة الله وبركاته...

صبحكم الله بالخير جميعاً

انا عانيت كثير في حياتي من يوم انا صغير وكنت شايل حمل اني (رجال البيت) وكنت مع امي واختي واخوي الصغير في قرية بالقصيم في بيت طين وكنت انا اللي اهتم فيهم واروح البقالة واعبي الخزان مويه الخ وكل هذا وعمري ماتجاوز6 سنوات ..امي جاها نقل على الشرقية وبدت تتحسن الامور والقصة طويلة جداً لكن بختصرها ..

كنت شاطر بالدراسة ونسبتي ماتقل عن 97% ..كبرت ووصلت الثانوي وبديت اضيع وفشلت بالدراسة في ثاني ثانوي وجبت نسبة 50% ! بسبب ظروف ووقفت الدراسة وعدت السنة وجبت 70% تقريباً الفصل الاول .. اخذت اغراضي وتركت امي واخواني ورحت جدة كملت الثانوي هناك لحالي والحمدلله تخرجت بنسبة 86% وقدمت على الجامعات وقبلتني لكن امي اصرت اني ادخل برنامج التدرج حق ارامكو وسمعت كلامها والحمدلله كانت خيرة لي وصرت موظف ارامكو وراتبي الحمدلله كويس وهذي باختصار شديد ..

من بعد ماكنت معدم وماعندي فلوس وتوظفت في ارامكو وصرت استلم راتب فوق 10 الحمدلله بديت اضيع الفلوس واشتري من هنا ومن هناك وماعندي شيء اسويه .. كلمني واحد من الشباب وعرض علي بدل لا اضيع فلوسي في عطور وملابس وكلام فاضي اني ادخل مشروع والفكرة كانت من عندهم وهي مشروووووع النقليات ..امي عارضت وقالت ياولدي لاتدخل هالمشروع وساعدني نبني الارض (مشروع استراحات) وقلت لها لا . التريلات احسن .

كان ناقصهم راس المال وفعلاً اخذت قرض واشتغلنا ورحت المانيا وجبت التريلة من هناك واشتغلت شوي وقررنا نجيب 3 تريلات ثانية ورحنا المانيا وجبنا 3 زيادة ولكن بعدها نزلت الميزانية وتوقفت المشاريع وبالعامية اكلنا هوا وشركائي وللامانة ماكانوا مهتمين في شيء وعندهم اشياء تغطي خسارتهم وصرت انا اكبر خسران , صارت بيننا مشاكل بسبب البرود اللي فيهم وفضينا الشراكة والحين انا اطارد وراهم عشان التريلات تنباع وكل واحد ياخذ حقه ولكن لاحياة لمن تنادي وانا بعيد عنهم وما اقدر اتصرف . عموماً اخوياي على عيني وراسي واحبهم واقدرهم لكنهم ماقدروني وماهم حقين مشاريع لانهم غير مهتمين لكن يبقون غاليين عندي ..

الان انا احتاج سيارة والسيارة اللي نفسي فيها تسوى 110 الاف تقريباً مستعملة قليل .

والاستراحات يحتاج لها 200 الف تقريباً عشان تخلص , والبنك يقدر يعطيني مبلغ 200 الف ريال بس اني بنضغط شوي بالقسط .. وابي مشورتكم

التريلات وش اسوي فيها وهل البيع فكرة كويسة ؟ مع العلم ان نوعها غير مرغوب والسوق طايح وماراح تجيب حتى نص راس المال .. هل اخذ وحدة وابدا اشتغل فيها لحالي ؟

الاستراحات يا اني اضحي بالسيارة ,, يا اني اضحي بالاستراحات وهل الاستراحات مشروع كويس بالوقت الحالي ؟ مع العلم انها في منطقة سكنية زي باقي الاستراحات (العزيزية-الخبر) ؟

فكرت في مشروع مطعم مضغوط ايضاً ولكن ماعندي اي خلفية عن التكلفة والموقع والايجار حق المحل والعمال الخ من الامور المتعلقة بهذا النشاط الحقيقة ...

فأبي مشورتكم لاني بكل صراحة ضايع وماعد ادري وش اسوي

المعذرة على الاطالة ..

وعليكم السلام
بنسبة لقصة حياتك
الحمدلله الذي عوضك خيرآ في الدنيا اجر ماصنعت لاهلك وان شاء الله في الاخرة لك اجر اعظم

بنسبة للمشروع
انا برائي تبداء بداية بسيطة في اي مشروع ترغب في تنفيذه حتى تتفاد الخسارة وعندما تشوف المشروع مشي معك وسع من مشروعك

ونصيحة
لا تعتمد على دراسة الجدوى وتفتح مشروع بكل ما لديك مهما كانت دراسة الجدوى مطمئنة لانها تظل نظرية على ورق والواقع يختلف عن النظرية وتظل التجربة خير برهان لذالك غامر براس مال محدود واعتمد على التجربة لا على دراسة الجدوى

بنسبة للمشاريع
ركز على المشاريع الضرورية في الايام القادمة فالضرائب على الابواب والناس راح تعيش تقشف وتبتعد عن الكماليات والاستراحة من الكماليات والاكل في المطاعم ايضآ راح يقل

انت اذا نفذت مشروع الاستراحة في الوقت اللي طلبت منك والدتك حفظها الله لكم قد يكون مجدي ام في الوقت الراهن او القادم اعتقد ببكون غير مجدي

والمشاريع اللي اشوفها مجدية وافكر اني انفذها عندما يوسع الله علي في الرزق
هو مشروع الصيدلة الحديثة او الشعبية محل عطارة
لذالك بقترح عليك تفتح محل عطارة لبيع انواع الاعشاب الطبية والبخور والعود وانواع الشاي والقهوة هذا المشروع مربح او افتح صيدلية استاجر محل صغير في حي مذدحم بسكان

وبنسبة للقرض
انتبه تورط نفسك وتتحمل فوق طاغتك احذرك مليون مرة احذر تاخذ قرض 200 الف وتضيق على نفسك صدقني راح تكرها حياتك وخاصة اذا المشروع مانجح معك راح تجيك الامراض لذالك فكر الف مرة قبل ماتورط نفسك محد بياكلها غيرك وشوف حال الديانة لا لليلهم لليل ولا نهارهم نهار واغلبهم يقول ياليت ماورط نفسه بديون انت اعتبر منهم ولاتخلي حماسك يقضي على مستقبلك

بنسبة للمشروع مطعم انا برائي
لاتفتح مطعم البلد كله صار مطاعم وفي اكثر من شخص وجدته يشكو من قلة الربح

وبنسبة لسيارات اللي اشتريتها مع اصحابك اجتمع معهم وكلمهم بطريقة ودية عشان تبيعو السيارات وكلنا ياخذ نصيبه قبل ما تصدي السيارات وهي واقفة بدون عمل وان رفضو لاتسوي معهم مشاكل ممكن هم متاملين يقوم سوقها من جديد المهم اذا رفضو خلاص شيلها من دماغك وعيش حياتك وحتى لا تتذكرها كثير عشان ما يدخل الشيطان بينكم وتصير مشاكل حاول تنساها وان تذكرتها ردد ( حسبي الله ونعم الوكيل سيؤتينا الله من فضله ان الى ربنا راغبون)

هذا واتمنى لك التوفيق

انا اقترح عليك تفتح صيدلية بمكة لاني اراء مشروع الصيدلية مشروع ناجح جدآ لانها من ضروريات الحياة

ومشروع الصيدلية مافيها خسارة كثيرة لان لو سمح الله ومانجح معك المشروع تقدر ترجع الادوية الى نفس الشركة اللي شتريت منهم

وفي مكة يوجد حي خالي من الصيدلية او بالاصح الصيدليات متباعدة عن بعض وهذا الحي كان فيه ثلاثة صيدليات وكان عليهم اذدحام الان مع مشروع الهدد كسرو المحلات وصيدلية اللي كانت في الحي شالوها واصبح الحي شبه خالي من الصيدليات
الان في مول قريب من الحي ماهدو تقدر تفتح فيها صيدلية وايضآ صاحب المول رجل مرة طيب راح يعطيك اجرة المحل بالشهر هو الايجار في المول بالسنة وستة شهور لكن لو طلبت بشهر كتجربة يعطيك نحن كنا بنفتح محل في نفس المول المذكور رتبنا كل شيئ وبعدين ماحصل لنا

الموهم اذا تبغى تفتح صيدلية في الحي اللي ذكرته لك لانهم بحاجة للصيدلية راح اذودك بالمعلومات وكذالك رقم الشخص المسؤل عن المول وهو وكيل مباشر من صاحب المول

هذا واعتذر على القافة الذايدة فقط اردة لك الخير واجري على الله
وانت فكر وشوف اللي يعجبك سويه

موفق خير

السلام عليكم
شيل فكرة المشاريع حاليا من رأسك
حاول تنهي موضوع التريلات ترا ما راح يطلع سوقها ألا لو استقر الوضع بعد 12 سنة ممكن
أذا قدرت تدبر سيولة لوالدتك دبر واذكر شورها عليك بالتدرج وفتحها الله بوجهك
شور امك الله الله فيه
+ ليش قلت لك لا تفتح مشروع
سدد قروضك ركز بأدائك المهني بوظيفتك
أدخر من مخصصاتك المالية واتعلم كيف تقتصد
تجرد وذوق كاس المر الآن حتذوق الكأس الحالي عمرك كله
المهم مشروعك ابداه بأموال أدخرتها مش بقروض
اذكرك بدراسة الجدوى مش على كلام أختنا حبر على ورق
من اسمها (جدوى) مهم تعملها وتكون بعيده عن لغة الأرقام وتشوف مختصين يفهمون لها
عشان تكون دراسة حقيقيه
أذكرك موضوع التريلات وأراهنك أنه شور واحد ومهو دراسة جدوى هذي هي شفت عواقبها
أذا كنت بتشتغل بحاجه مهنية أو حرفية في هذاك الوقت نقولك أشتغل بيدك حتى تكسب خبره وتجربة مش دراسات
لاكن اهتم بالقيمة السوقية لمشروعك قبل تبدا فيه اكيد ومو شرط مشروع نجح فيه غيرك تعمله
ابحث عن شي فريد تسبق فيه عصرك تتميز بخدماتك تستقطب خبراء فيه او تنشئ خبرات حتى
شيل السيارة من رأسك برضو أشتر سيارة تمشي الحال اقتصد وادخر واستخير قبل كل شي تعمله

ما خاب من استشار ولا خاب من أستخار

الله يسعدكم جميعاً ياشباب راح افكر في كلامكم وارد على كل فقرة ...

اخوي الله يرزقك من واسع فضله
لا تتشت كثير ركز على شي واحد وابدع فيه حتى لو راس ماله قليل
انحش من القروض في الوقت الحالي .. الجاي ادهى وامر