سلام عليكم ورحمة الله وبركاته
عندي أخت فيها شحنات كهربائية وتم تشخصيها أن فيها بؤرة
وكان هذا الشي مسبب لها نوبة صرع تفقد الوعي ماتدري عن نفسها
تطيح ويغمى عليها فجأه
يعني ( تمدد على الأرض مع خروج لعاب من الفم وفمها يصير أزرق وعيونها مفتوحة ومره جاحظه على براء )
وأعطوها دواء تقراتول ومازالت تجيها
رفع لها نسبة العلاج وأضاف لها كيبرا ونفس الشي ماتحسنت
بالعكس صارت تجيها حاله ثانيه تصرخ وتبكي تقول أحس شي يمشي بجسمي ولاأحد يمسكني
وتصرخ بصوت عالي جدا جدا وأضاف لها دوا اسمه لميكتال
بعد الأدوية هذه ( تقراتول + لميكتال + كيبرا ) صارت تشعر بالنوبة تجي تقول أحس نفسي بيغمى علي
وفعلا تففقد الوعي أقل من دقيقه وتصحى
الأغماء هذا يكون بنفس الطريقة السابقه المشروحة
تمدد على الأرض مع الفم يزرق وخروج لعاب وتنفض يده ورجلها كأنها تنازع
المهم رحنا لعيادة خاصه في منطقة مدحوا لنا دكتور
ورفع لها الجرعه
صار يعطيها
تقراتول 4 حبات كل حبة قوتها 200 يعني ( 800 )
كيبرا حبتين كل حبه قوتها 500 يعني ( 1000)
لميكتال حبتين كل حبة قوتها 100 يعني ( 200 )
يعني مجموع ماتأخذ كل 8 ساعات ألفين

وصارت بس دايخه ومرهقه وعلى الفراش ونفس الشي النوبه تجيها الأغماء
بالأضافه إلى حالة جديدة جاتها

تنفض يدها بقوة بطريقه نعجز أننا نمسكها أو نسيطر عليها يدينها الأثنين ورجلينها
يعني الأطراف ماتتحكم فيها كأن سبحان الله تجيها أشاره من المخ بأنها تحركها بس بطريقه قويه جد ومخيفه
نخاف انها تذي نفسها مع هلوسه في الكلام يعني الكلام يطلع منها كأنها سكرانه وصياح وصراخ

طبعا الآن هي مرقده في مسستفى تحت الملاحظه
طلبوا منها تحليل دم مدى نسبة تأثير العلاج في الدم
وطلبوا منها رنين مغناطيسي
وطلبوا منها تخطيط مخ

أنا ودي أحد يفيدني يكون عنده مريض صرع ويكتب لي وش الأدوية اللي يأخذها وهل مر عليه نفس الاعراض المذكورة
والله أننا في حالة هلع وخوف ولانعلم وش اللي في أختي وخايفين أن العلاج أثر عليها لأن العين أنا أشوفها ماهي ثابته النظر عندها مهتز شوي ومازالت تخبط بالمشي والكلام يطلع بصعوبة للحين
والمستشفى متحفظين على كل شي ينتظرون الأشعه تطلع ويرسلونها للأستشاري ويجي يعلمنا ولافيني صبر ودي أحد يطمني ويفيدني ولاحول ولاقوة لا بالله