للشاعر يحيى بن شيبان


لا جــاتك البلـــوى مــن الله ترضى
الموت لا جاتك من الناس يا سعود

وأنا مريض وأغلب الناس مرضى
حــدتني الدنيا على أيامهــا السود

شقـيت بالايــــام طـــول ٍ وعرضى
عجـزت اكافـــح لكن الحـظ مقرود

من حر ماجاني ترى القلب ينضى
ولا قلت هــانت عود الحال في زود

الــراس مليانن شعـــورن وفوضى
والى انفـــرج قيــد تحل جملة قيود

يا راسـي اللي من قبل عام يشظى
ويا جاشي اللي من عنا الوقت ملهود

حِر السعـــاير منها الجـــاش يلظى
تتعب بها قلوب ٍ وتظمى بها كبود

والله لو ارضي الخـــلايق وترضى
يجــيك من اقصى المخـاليق بارود

احنا علينا يفــرض الطيب فرضى
الخـــال موصيني مع العـــم والعود

متى على الله بدورة الوقت نحظى
ودنـا إنتهنى بتالي العمر يا سعود

الوقــت يمشي لكن العمــر يقضى
والجسم ما ردّه على مناقـش الدود