احس بندم وحسره للي صار لي
اشتغلت سنه ونصف بنادي رياضي اول سنه و3 شهور كنت من غيرعقد ولاتامينات وكنت استلم راتبي كاش واوقع المهم من اول مااشتغلت وانا طول الوقت قلبي ناغزني منهم لدرجه كنت وانتم الكرامه من الخوف والتوتر ادخل الحمام 3 مرات من الخوف ومرات اقول لابوي واهلي كيف اشتغل بدون عقد ؟ يقولون وش تبين بالعقد ؟ تقول لي صديقه اختي احسن لك مافي عقد متى بغيتي تطلعين تطلعين وماكنت اقتنع بس اقول اصبر واشوف وش اخرتها ويقولون لي النادي مريح وقريب الخ من السي دي المشروخ مرات يجون البلديه ومرات يجون مفتشات من وزاره العمل وكنا نسكت ونتستر على النادي وقعنا معهم عقد بعد سنه و3 شهور لان جاء مفتشات من مكتب العمل وعرفو عن العقود قالت بنوقع معكم عقد يوم قلت في نسخه قالت لاونسخه ولاشي هذا بس قدام مكتب العمل وبكره اوقعكم عقد جديد على مزاجي !!! !!! وقفلوه شهرين يرممون المكان ولاعطونا راتب الشهرين وسكتنا وجتني وظيفه بمستشفى ورفضتها لان قلت بسمع كلام ابوي وياليتي ماسمعت كلامه وحكمت عقلي
انا الحين وصلت لسن ال28 اقدر اتخذ قراري بنفسي ليش كنت كل مره اسالكم وتنصحوني ولااسمع الكلام وارجع اسمع كلام ابوي اللي بس يطهرهم ولايبيني اقول شي بهم الحين يوم الخميس 1 نوفمبر فصلوني فصل تعسفي
( الصباح دقت المديره علىُ الاداريه قالت قولي للمشتركات يلبسون عباياتهم بيدخل صاحب المكان ومعه واحد من البلديه وبيرجع يدق علي ياكد لي قبل يدخل ودخل ودرعم والمشتركات بعباياتهم ماعدا ثنتين ماتغطو على مهلهم يلبسون صرخو عليه قالو هيه انت اصبر ماخلصنا قال انا مبلغ ياسيده يقولي قلت محد بلغني قال كيف محد بلغك ايش هذا الكلام ويصرخ وينفض ايدينه قالت الاداريه الحين يعصب اكثر هو ترى بس انحرج ) يوم جاء العصر وقرب يخلص دوامي قالت لي الاداريه المديره تبيك دخلت وقالت مرتاحه عندنا قلت الحمدلله بكل ثقه قالت في ملاحظات ومعك شهر انذار وبننهي خدماتك !!! قلت ليش قالت الوالد قلت عشان اللي صار اليوم قالت لاوالله بس هو يرسل ناس للمكان على انهم زائرات يقيمون شغلكم ويقولون مهي اجتماعيه ولاعندها قدره على اقناع الزائرات !!! قلت حرام عليكم مااقتنعت بالكلام قلت شفتي مني تقصير شفتي غياب تاخير قالت لاغياب ولا تاخير وخنقتني العبره وبكيت قالت حنا مهنا نهايه العالم والخ المهم قلت للاداريه وانا اصيح جتني وظيفه مستشفى ورفضتها عشانكم فوق معلقينا شهرين من غير راتب وانتظرناهم
احس فوق اني كنت اسمع كلام الجهله اللي حولي احس اني انا بعد مغفله والقانون لايحمي المغفلين
انا مره ندمانه على هالتجربه المريره اللي من اول يوم وانا فيها وانا اشكي واكتب هنا وهنا وسبحان الله ماقدرت افتك منهم بس لما كانو مقفلين مركزهم وابوي مصر اني ارجعلهم دعيت ربي يفكني منهم واستخرت كثير بس لما انظلمت تاثرت
كانو يكلفوني بمهام اكثر من المطلوب مني ولانقول شي
الزبده اني جالسه اقول لنفسي اخذت درس اني لازم قراري اخذه بنفسي بعد الاستخاره انا مو طفله عشان اسمع كلام ابوي مو شرط الاباء صح والابناء غلط ويوم قلت قدامه شفت الحين قال كل القطاع الخاص كذا
الحين لي مستحقات وكلمت الاداريه وقالت برد لك والله يستر لاياكلون حقوقي بعد غير الظلم اللي ظلموني اياه طلعت يوم الخميس اصيح صياح لاني انظلمت وكانت صدمه كلمت الاداريه الاحد اللي راح وقالت بكلمهم واقولك وش صار ولاردت كلمتها الاربعاء قالت بس يومين اصبري ومن يوم الاربعاء ماكلمتني مو مشكله اصبر شوي بس الله يستر لايكونون ناوين ياكلون مستحقاتي
لان في راتب يوم من نوفمبر +مستحقات اجازات سنويه +مكافاه نهايه خدمه لانهم فصلوني لو انا اللي استقلت كان مافي مكافاه لاني ماكملت سنتين بس سنه ونص
كلمتني وحده من زميلاتي مو زميله عمل هي مشتركه بالنادي وصديقتي وصديقه اختي
وقالت لي اذا جيتي تاخذين فلوسك قولي للاداريه السوريه ترى اقدر ابلغ عنك السعوده عشان تعرفين وشو الفصل وتكلمي وردي قلت ماقدرت اتكلم ذاك اليوم من الصدمه وقالت انهم جايبين وحده جديده وقلبت شوي علي المواجع 😔
الحين العقد اللي وقعته معهم وراح لمكتب العمل بدون لااستلم نسخه هل لو رحت لمكتب العمل ومعي شهاده الخبره مكتوب فيها اشتغلت من 6 مايو 2017 الىً1نوفمبر 2018
وكذا هل اقدر اشتكي لان سمعت انه اذا الفصل تعسفي يعطوني مده رواتب الاشهر الباقيه من العقد 6 شهور بس انا وضعي صعب انا مو في التامينات
وفرضا مااشتكيت وعطوني المستحقات اللي ذكرتها قبل لكن ابي ابلغ عنهم انهم يشغلون الناس من غير عقود وش اسوي ولاحسابهم عند ربهم ؟ احس بقهر شديد واحس اني غبييييه المفروض الواحد يسمع كلام الناس الفاهمه ومو كلام الاهل بحكم انهم اهل
ارجو من اي احد يشوف موضوعي يرد لاني في هم وضيقه لايعلم بها الا الله