اول ماتسمع اسمك تقوم للجنة الاستقبال يعطونك ثلاث اوراق فيها بياناتك للمطابقة في المقابلة وبيانات الطول والوزن والثالثة الله اعلم والله اني نسيتها بس تقريبا بيانات المؤهل والشهادات .. اللي انقبل على تخصص اداري ومعه ثانوية بس بدون دورة حاسب او شهادة حاسب نصيحة لايتعب نفسه ويجي لانها ضروري جدا جدا والا بيقول لك توكل على الله <<اللي جامعي ومعه بكالوريوس يجيبه عشان يرفعون لك باعلى المؤهلات >> علما بان اللي جامعي وتخصصه حاسب مايحتاج دورة حاسب الي ..طبعا ملفك لازم يكون اخضر علاقي حق تقديمات زمان لازم منه وترتب اوراقك فيها من الاعلى للاسفل (صورك الشخصية مكشوفة الرآس ٨ نسخ ونسختين من اعلى مؤهل حصلت عليه وبعدين نسختين من شهادتك الثانوي وثم دوراتك وخبراتك واخيرا صورتين من الهوية مكبرة )وبسم الله بعد ماتسمع اسمك تاخذ اوراقك ويتاكدون من بياناتك ويطابقون هويتك بوجهك ويركز عليك كثير لاتختلف ملامحك عن صورة الهويةوبعد ماتخلص تروح تجلس عند باب اللجنة حتى ينادون عليك مرة ثانية .. اللجنة مكونة اربع لجان وكلهم ضباط يعني لاتحاول الاولى للطول والوزن <<اذا اقل من ١٦٨ الله معك ويكتب لك بورقتك غير مطابق وتسلمها عند الباب وتوكل على الله طبعا ثابت بالجهاز حق الطول وراسك مقابل الضابط اللجنة الثانية لمطابقة بياناتك اللي سجلت بها بالموقع مع شهاداتك واللي مسجل بيانات خطأ الله معه وكثير مشوهم بسبب هذا الشيء يسالونك ايش شهاداتك وكذا طبعا تعطيهم الاعلى شهادة للاقل .. وبعد ماتخلص من مطابقة الشهادات ومشت امورك تمام تروح للمقابلة الشخصية .. يتبع >>

نجي للمقابلة الشخصية اول شيء يعطيك ورقة وقلم ويجلسك على كرسي ويقولك اكتب الآتي طبعا يعطيك حكم وامثال من راسه يختبر كتابتك وبعد ماتخلص يقولك قم اوقف قدامي واقرا الكلام طبعا يركز على مظهرك وطريقة وقوفك امامه ياليت تكون وقفة عسكري ثاااابت وتتكلم قدام ثلاث ضباط يختبرون قرآتك وبعدين يستلموك اسئلة وشششغل مو طبيعيطبعا جاء وقت الاسئلة وكل ضابط يسألك ثلاث او اربع اسئلة على حسب ثقافتك اذا ماتعرف الجواب يكثرووووون لك اسئلة ويحشرونك وركز تراهم يعطونك اختيارات كلها خطأ ويشككونك كثثثير الاسئلة اللي تكررت كثير وسمعتها هناك هي : من هو وزير الداخلية؟ وكذلك الخارجية ؟ من هو مدير عام الدفاع المدني ؟ ماهي عواصم الدول حق الخليج طبعا يعكسوها يجيبون لك المدن وانت تقول الدولة وكمان يقولك مدينة ليس لها عاصمة ينرفزززوك قوةمثال يقولك صلالة عاصمة ايش؟؟ صلالة مدينة ياعقيد في عمان طبعا ركز على الرتب واحفظها زين من فرد الى ضابط لانهم يسالوك انا ايش رتبتي وهذا ايش والخ... واسئلة دينية كم عدد اركان الاسلام وعددها واركان الصلاة واركان الايمان وكذا وعدد الخلفاء الراشدين وترتيبهم من هو ثالث الخلفاء وكذاطبعا لاكنت واثق من نفسك واجابتك ماتكثر عليك الاسئلة ويركزون على الجامعيين واسئلة بتخصصاتهم
بعد ماتخلص مقابلة ياخذ ملفك جندي ويعطيه للجنة الكتابة والسكارتيرية يدخلون بيانات بالجهاز هذا اذا عديت اللجان كلها ويعطيك ورقة صغيرة مكتوب فيها موعد اليوم الثاني لاختبار اللياقة والسباحة مع احضار سروال للسباحةعند الساعة ٦ صباحا من اليوم التالي وهذااا المهم في الموضوع كله لازم تركزون باللي باكتبه عنها .. يتبع >>

اليوم الثاني والأهم لانك لو اجتزته ٨٠٪ انت بالدورة باذن الله >> طبعا تحضير الساعة ٦ وكمان بلبس رياضي وجزمة وانتم بكرامة لازم الكرت اللي عطوك اليوم الاول والبطاقة تكون بجيبك وسروال السباحة اول ماتدخل طابور وتحضير بالاسماء طبعا تقابل لجنة من ضباط وافراد بلبس رياضي ينادون بالاسماء يتاكدون بالحضور الكامل وثم على الملعب للاختبار اللياقي الكل يجلس ع المدرجات ونداء بالاسماء كل خمسة مع بعض ينزلون طبعا بدون تحمية ولاشيء ع طووووووول سبرنت على مسافة ١٠٠ يقولك جري حتى توصل نهاية المسافة بتحصل مدربين يجهزون لك ادوات التمارين البطن والبشم اختبار تحمل ولياقة يقولك بشم ١٠ مرات او اكثر ويعطيك الدرجة اذا نجحت يقولك اجلس بجهة محددة للمجتازين .. بعد ماخلصنا لياقة على المسبح طبعا المسبح كبير وفيه حبال بالوسط تساعد اللي مايعرف يسبح عشان مايغرق وعندك مدربين برى المسبح وواحد داخله لانقاذ اللي يغرق او مايعرف يسبح طريقة اختبار السباحة بالعرض يقولك انقز واسبح للجهة الثانية وخلاص كذا اجترت العمق طبعا مترين ونص للي يخاف وعنده فوبيا من المسابح نصيحة يتدرب قبل يجي لان اللي شفتهم عدد كثير ماعرفوا للاسف لكن لاتتردد متساهلين معنا لابعد الحدود وتحفيز بشكل ماتتصوره حتى تجتاز الاختبار طبعا اللي باقوله لكم وسمعته من ضابط ان الاختبار الهدف منه اولا يختبرون خوفك من النزول للمسبح وهل تقتدر تغامر او لا ولذلك غاااامر حتى لو ماتعرف تسبح لانك لو غامرت بيمشووووك لكن لو خفت مانزلت نهائيا يقولك امسك بطاقتك وتوكل ع الله غاامر ولاتخاف لان ادوات الانقاذ كثيره ويوجد مدربين حول المسبح كامل عشان ماحد يغرق يحشرون لك اذا ماتعرف تسبح وتهديد بالطرد لكن لاتستلم حاول مرة مرتين لو شافك المدرب تحاول بيمشيك ويعديها لك وهذا صار مع الكل للي ماجتازوا جمعوهم لحالهم حتى خلصوا من اللي اجتازوا ورجعوا لهم تدريب ونصايح حتى مشوهم ولله الحمد مافي تشديد طبعا انا اتكلم عن لجنة عسير مرررررة طيبيين ومايبغون احد يرسب ونصيحة للكل لاتتردد بالنزول حتى لو ماتعرف حاول حاول يعطوك فرصة اكثر من مرة لاترفضها نهائيا لانك لو حاولت صدقني ماراح ترسب .. طبعا بعد ماتعدي السباحة على دورة مياه مجهزة للشاور وتلبس وخلاص لاخراختبار وهو الحاسب الآلي وانا اتكلم عن اللي تخصصه اداري فقط.. يتبع >>>

بعد ماخلصنا من السباحة جمعونا واخذوا البطائق الشخصية حق الكل طبعا اللي ماعرف يسبح مشوه بالاختبار بسسسسس بشرط انه غامر ونزل وهذا اللي لازم تسويه عشان يمشيك .. جمعونا بباص وعلى مركز تدريب الحاسب الآلي اول ماتدخل قاعات دراسية ويعطونك اختبارين واحد نظري وواحد عملي ع الكمبيوتر .. النظري سهل جدا اسئلة من صفحتين الصفحة الاولى تكتب فيها بياناتك وطلب توظيف لدى الدفاع المدني ( اقدم لكم طلبي هذا للالتحاق بدورتكم التاهيلية.... الخ طبعا يمليه عليكم الضابط وانت تكتب وراه حسن من خطك لانه عليه نقاط والصفحة الثانية عشرة اسئلة صح وخطآ وكلها سهلة تتكلم عن الاختصارات في الحاسب الآلي وعن الطابعات وانواعها .. الاختبار العملي سهل جدا جدا يعطيك ورقة فيها جدول تسوي مثله وتكتب فيه اسمك ومؤهلك وقم الطلب والسجل المدني ولازم تكون حافظهم كلهم من قبل لانك لو ماعرفت رقم طلبك وسجلك تعتبر رررااااااسب وفيه ناس انطردوا بسبب ذا الشيء للاسفبعد ماتخلص ترجع مكان اليوم الاول تنتظر النتايج حق الاختبار لو اجتزت ينادون اسمك ويعطونك اهم حاجة كنته تنتظرها وهي اوراق الالتحاق بالدورةومننها اربع اوراق وملف طلب الالتحاق بالخدمة العسكرية في قطاع الدفاع المدني وورقة للادلة الجنائية عشان يشوفون سجلك نظيف او لا وورقة لعمدة الحي للتاكد من اخلاقك في الحي وورقة للاحوال المدنية للتأكد من انك سعودي اصلوورقة لولي امرك يوقعها لرضاه عنك بالالتحاق للعسكرية بعد ماتختمها من قائد مركز التدريب يعطيك موعد للكشف الطبي وبعييييد جدا الموعد نهاية شهر ذو الحجة يوم ٢٥/١٢/١٤٤٠ يعني بعد شهرين ويقولون لك خلص هذي الاوراق لك حتى يوم موعد كشفك الطبي بعد ماتجتازه بنجاح اخر شيء بنتحدث عنه وهو انه في حال ماعديت الكشف الطبي بيقولون لك بمستشفى قوى الامن انت عندك كذا وكذا لاسمح الله فمعليش نعتذر عن عدم اجتيازك وفي هذي الحالة قطع الاوراق اللي عطوك وتوكل على الله ولاعد ترجع للمركز حق التدريب نهائيا عشان الاوراق والله لايقولها ان شاء الله الكل يجتاز ونشوفكم يا احلى دفعة لدورة الدفاع المدني طبعا اللي يجتاز اليوم الثاني يروح بالاوراق اللي عطوه وجاهزة اللي ناقصة والا ماكملها الله يخلف عليه لان موعد التسليم بعد الكشف الطبي ضيق جدا جدا..
هذا كل اللي صار بالتفصيل اتمنى التوفيق للجميع وفالكم القبول النهائي .. دعواتكم لي وللجميع بالتوفيق

يعطيك العافية
بخصوص الصور الشخصية اتصور بثوب او طقم رياضي
والطقم الرياضي ايش يكون ؟؟
يعني اللون ايش هو

متى اعلان القبول النهائي