السلام عليكم ورحمة الله وبركاته
دخلت المنتدى جديد ولله الحمد ربي اكرمني بوظيفة والان ادعولي تكتمل اوراقي لوظيفة حكومية
لكن مو هذا ولا هنا بتكون نهاية مشواري...
كلامي شوي بيكون كثير بالتفصيل شويتين عشان توصل الفكرة.. فسوري ومتأسفة لو مليتو وبحاول اقسم الموضوع لأكثر من رد عشان اشمل لكم كل التفاصيل اللي محتاجينها وعشان الاقي تفاعل في موضوعي لأن غرضي الأول والأخير الفائــــــدة
حبيت ادخل افيد زي مااستفدت من كثيرين في حياتي.
انا لاني مندوبة ولا مسوقة ولا تاجرة ولا من هذا القبيل .. انا شخص جرب وطاح ووقف وطاح برغم من صغر سني ولكني مريت بتجارب كثيرة بحياتي لين قدرت احقق النجاح اللي كنت ابيه ومازلت اكمل لتحقيق اهدافي
من دون مااحتاج احد بحياتي
دايما نقرأ أو نبحث عن كيف تبدأ مشروعك من دون رأس مال - والا نقرأ ابدأ مشروعك برأس مال بسيط
وللأسف انه يالله بالعافية نقدر نوفر مبلغ وباعمار صغيرة حتى المبلغ البسيط مايكون متوفر ...
الحمدلله عائلتي كريمة ومقتدرة ولكن كان عندي شوفة نفس شوي اني مو انا اللي اخذ من اهلي فلوس لبقية حياتي.. لازم اوصل لمرحلة اني انا اللي اجيب هدايا وانا اللي اصرف من فلوسي عليهم وانا اللي واللي واللي
ومن هنا بديت ادور وادور ومافيه شي ماجربته
بقولكم وش جربت وبقولكم الاشياء اللي فادت معي
من زمان ماكتبت في منتديات لهذا يمكن تلاقون كلامي متلخبط ومخربط بس بحاول ارتبه
اولا خذ هذه المعلومات البسيطة وحطها حلق باذنك
عمره مارح يكون في شغل ناجح لشخص ناجح من دون ماتبدأ من الصفر .. لا تتوقع انه لو معاك مبلغ كبير معناته انت الحين بتفتح مشروع جبار وناجح
فعلا ممكن يكون جبار وكبير بس مارح تكون كل جوانبه ناجحه من دون خبره سابقة فيه...
وثانيا اتذكر انه "الشغل مو عيب" والقرش الحلال يرجع لصاحبه وفيه بركه "هالكلام مو فلسفة ، صدقوني من واقع تجربة"
وثالثاً لاتتوقع نجاح بدون تعب .. كل شي بيكون فيه تعب وسهر ودخل بسيط لين تكبر ..
ورابعاً واخيراً اذا انت مانت جاد في تحدقيق حلمك انصحك ماتكمل قراءة لأن الكلام بيكون تافهه وماله معنى ومضيعة وقت لك اذا ماكنت فعلا بحاجة للنجاح
خذ ورقة وقلم واكتب معاي:
وش الهدف الرئيسي من حياتك العملية ..!! وش تبي تشتغل .. ووش حلمك في حياتك .. منصب .. محل .. مال !! حدد هدفك بالضبط مهما كانت الفكرة صعبة ..
مثلاً: ابغ يكون عندي مشروع مريح لراسي ومايتعبني - ابغ مشروع يدخل لي ربح عالي - ابغ اسوي شي مميز مافيه احد سوا مثلي - ابغ اسمي ينذكر بالصحف اني مالك لمعرض سيارات
المهم "حدد بالضبط وش هدفك النهائي من حياتك العملية "
وخذ وقتك بالتفكير - احيانا تكون عندك فكرة وحده واحيانا تكون عندك اكثر من فكرة اكتبهم كلهم وبالتفصيل اللي تقدر عليه..
وحدد معاه توجهك .. مثلا - بحر - اكل - سفر - بر - سيارات - سياكل - جوالات- خشب - اثاث - ترفيه - حدد مسارك
بعد ماتخلص من كتابة افكارك ولاتتوقع انها بتاخذ ساعه .. انا اخذ الموضوع معاي اكثر من اسبوع ..
المهم بعد ماتحدد هدفك بالضبط ننتقل للنقطة الثانية:
حدد امكانياتك .. وش اللي عندك ووش اللي مو عندك
وحتى لو كان تافه... مثلا..
عندي سيارة - عندي لابتوب - جوال - نت مفتوح- مبلغ بسيط قيمته (كذا)- واكتب مهاراتك
اعرف استخدم اللابتوب واعرف لبرنامج كذا وكذا واعرف اسوي اعمال يدوية .. او مثلا اعرف اصلح الاشياء جوالات او لابتوبات او اي شي - اعرف اقنع الناس - انا محاور جيد
حدد كل قدراتك بالكامل...
وبعدها اكتب سلبياتك بكل صدق وامانه
انا عصبي - مااتحمل الانتظار - احب النوم - انا انسان ماالتزم بالمواعيد - اكتب كل سلبياتك بالكامل واحصرها
بوقف لهنا لين الاقي تفاعل...
بعد ماتخلصون هاللي قلته اتمنى انه كل شخص حاب يبدأ صح يقول لي انه كتب مالا يقل عن صفحة لكل نقطة من اللي فوق....
باخذ استراحة وبرجع لكم يارب الاقي تفاعل يحمسني
وحتى لو مالقيت بكمل لأن اكيد بيوم بيكون مرجع لناس مو مسجلة بالمنتدى
20-11-2019, 04:14 PM
قصتي مع مشروع ماكان معاي فيه ولا ريال لرأس المال.. اذا تبي تحاول ادخل
العرض العادي
