السلام عليكم ورحمة الله وبركاته
اسعد الله اوقاتكم بكل خير
بعد انقطاع لفترة طويلة عن هذا المنتدى الرائع واعضائه الاكثر من الرائعين عدت لكم بعد ان تم بفضل الله تعالى افتتاح مشروعي التجاري الاول والذي عانيت كثيراً قبل افتتاحه لدرجة اليأس مانبغى نطيل في المقدمة لان الموضوع بنفسه طويل لذلك بندخل في الموضوع بشكل مباشر .
طبعا مشروعي هو مطعم متخصص وليس شعبي كانت بداية هذا المشروع من تذوق عن طريق ارتياد اكثر من مطعم مشابه لنفس مشروعي مع الوقت اصبحت محب لهذا النوع من الاكل ثم تطور الموضوع مع الوقت واصبح فكره ثم مشروع تحقق على ارض الواقع توكلت على الله وبدأت اخذت قرض ودفعت منه نصف الايجار والباقي بدات به تاسيس المطعم من تشطيب وغيره خلصت الفلوس اخذت قرض اخر كملت به شغل المطعم من ديكورات ومعدات ورسوم استقدام العماله الحكومية منها وماهو للمكاتب الخارجية التي يستقدم منها العامل مع الاسف لم يتبقى معي الا القليل هذا ولسه مافتحت نقصت علي فلوس وحاولت من هنا وهنا لين طلعت لي سيارة بيعه وكان يومها وقت وصول عمال المطعم وصلو العمال ولكم ان تتخيلو يااخوان جلسوا العمال 7 شهور بدون راتب وبدون عمل لاني وقتها تاخرت ايضا مافتحت المطعم وكانت مشكلتي في المطعم اني من النوع الي كل فتره وفتره اغير حاجه او اكسر شي واوسع وارجع ابني من جديد وهذي الامور كانت تسحبني فلوس وانا ماني حاس يعني حاجز البلك اللي كنت ابنيه ب 200 ريال كنت ارجع ابنيه واعدل ع تصميمه بمبلغ وقدره عطفا ع ذلك مصاريف العمال خلال ال7 اشهر من اكل وانترنت وكهرباء ولبس ووالخ كان تاكلني اكل في سحب الفلوس ومااخفيكم وصلوا العمال لدرجة الملل كانو يبون يشتغلون وبنفس الوقت يبون رواتبهم فكنت من ناحية رواتبهم اجي معهم باكثر من اسلوب بحيث اني اقولهم اول مانفتح المطعم راح تستلمون رواتبكم وراح اعطيكم بونص والخ من الامور المحفزة اللي كانت تهديهم شوي مع الوقت وصل بي الحال انه ماعد بقى معي شي من فلوس بيعة السياره حسيت هالقرض مامنه بركه لاهو ولا اللي قبله ولكن قدر الله وماشاء فعل ووالله يااخوان ماعد يبقى من الراتب الا 1000 ريال عشان كذا كانت اغلب مصاريفي من مبلغ بيعة السيارة واكبر مصيبه اني دخلت نفسي في ديون و3 التزامات وانا لسه مافتحت مشروعي مرت الايام مريت بقلق وتوتر وهم مايعلم به الا الله لدرجة ان مطعمي والله يااخوان اني امر في الشارع بالسياره من عند المطعم ولاني قادر افتحه لعدم توفرسيوله اكمل فيها الاحتياجات المتبقية حتى افتح المهم قلت مافي حل الا اتسلف مع اني مااحب اتسلف من احد ابدا ولكن الظروف حدتني قلت خل وجهك قوي هذا سلف مصيرك بترده المهم انها زانت الامور وحددت يوم للافتتاح وكان هذا اليوم بالنسبة لي فرحه مع خوف ولاكن خوفي اكثر من فرحتي كنت فرحان لاني شفت ان هذا انتصار بالنسبة لي وكنت خايف ان مشروعي ماينجح واتعثر في ديوني اللي علي طبعا جبت الوالده الله يخليها ويطول بعمرها ويخليلكم امهاتهم وافتتحت تخيلوا يااخوان افتتحت المطعم وعلي متأخرات رواتب للعمال 39000 الف!؟.
طبعاً في ملاحظه مهمه الشي اللي خلاني اغامر وادخل في الالتزامات الكثيرة هذي اني كنت افكر انه من اول يوم راح يكون دخل المطعم 4000 - 6000 ريال لاني كنت اسمع ان المطاعم فيها خير ودخلها عالي فقلت مو مشكله راح اسددها اول ستة شهور مادريت ان الواقع مختلف ومرير بعض الشي المهم كان اول يوم افتتاح لي دخله 900 ريال طبعا انا ماسويت أي اعلان كان افتتاح تجريبي عادي مرت الايام والشهور مرت علي 3 شهور تعتب فيهم تعب مايعلم به الا الله كنت كل يوم او يومين اخذ اغراض للمحل من دجاج ولحم وووالخ للمحل وهذا الشي كان مرهق جدا بالنسبة لي هذا غير ان عندي دوام بالنهار وشغل المطعم بالليل كنت كل يوم اويومين بسوق الجملة للخضار وماكان عندي سيوله اقدر اغذي فيها بضاعه للمطعم حق اسبوعين او شهر كنت اخذ بقدر الدخل اليومي اللي يجيني مرت الايام وبفضل من الله خلال تقريبا شهرين ونص قدرت اسدد جميع الرواتب المتاخره للعمال ولكن حدثت صدمة كبيره وهي انه خلال الفترة اللي كنت اسدد فيها الرواتب المتاخره للعمال هرب علي احد العمال ومو أي عامل لا، للاسف (طباخ)! واعتقد انه من الاسباب ان كان باقي له مبلغ 10000 رواتب متاخره طلبها مني في وقت واحد وقلت له ماقدر اعطيك اياها مره وحده اضافة الى انه كان اختلاطه بالجنسيات الاجنبية كثير ولكن في نطاق السكن اللي هو فيه رحت بلغت عليه وكنت منصدم وتعبان نفسيا بشكل ماتتصورون وجلست اندب حظي يعني ماكملت اقل شي سنه حتى اوقف على رجولي وبعدها يهرب ولكن في اول شهرين يهرب علي والله انقهرت يااخوان ونفسيتي ماتسوى لاكن من فضل الله كان في طباخ اخر قام بشغله واحسن منه بعد ماشاء الله وهذا الشي هون علي الصدمه قليلاً بالاضافة الى ان من المشاكل اللي كانت عندي ان العمال ماصدرت لهم اقامات لان السيوله اللي كانت تجيني من الدخل كنت اضعها في اغراض للمطعم ورواتب العمال وماكان عندي فايض من الدخل عشان اصدر اقامات واسدد الرسوم الهامه ولكن بعد هروب العامل هذا طلعت اقامة للطباخ الثاني عشان امسكه والاخرين بالطريق باذن الله لي الى الان 4 اشهر الدخل لم يتجاوز 2400 ريال ف اليوم ونادرا يوصل 2700 والسبب انا عارفه ان المطعم مافي شريحة كبيره جدا من الناس تعرفه لاني ماعملت ترويج اعلاني قوي له بمعنى اعلانات قويه لان مثلكم عارف الاغلب ياخذ مبالغ من 3000 الى 5000 وعلى وضعي هذا مااقدر اوفرها لاكن كاعلانات عاديه من دون مقابل عملت ولكنها لم تغير الشي الكثير ولكن بفضل الله الكل يثني ع جودة الطعام وعلى النظافة ونظافة العمال والديكور وغيره والاهم من ذلك كونت قاعدة من الزبائن تجيني باستمرار وتجيب ناس جدد معها وهذا الشي يفرحني كثير ولكن في المقابل مايحزنني اني احتاج ان الدخل يكون اعلى من كذا بكثيروالان الحمد لله ماعد صرت اتعب مثل البداية تعاملت مع موردين صار كل شي يجيني لين عندي ، ولكن صدمة تلو صدمة فبعد صدمة هروب العامل والخلل الذي تركه في نقص عدد العمال اتت صدمة مرض كورونا نسال الله ان يكفينا ويكفيكم ومن نحب شره .
الان مثلكم عارف الشغل توقف والشي الي انا خايف منه الان اني ارجع لمشكلة التعثر في سداد رواتب العمال كيف راح اطلعها اضافة الى ايجار المحل وراح تتلخبط علي امور كثير وماعندي سيوله كمدخرات ارباح من الاربع الشهور الاولى بسبب تدني الدخل وماادري الثلاثة الشهور القادمة ايش راح يصيرفيها .
لذلك واخيرا وليس اخرا طرحت كل مافي خاطري بكل بساطه وعفويه وبدون أي تحفظ لثقتي فيكم بارشادي لما هو انفع واصلح لي لذا كلي امل بعد الله سبحانه وتعالى في اخواني الاعضاء ممن سبقوني في التجاره ومن ذوي الخبره بعد قراءة موضوعي هذا ان ينصحوني ويدلوني ع الطرق الصحيحة الي اتبعها لانه قد يكون عندي اخطاء في الادارة المالية وهذا شي وارد وقد يكون عندي قلة خبره فمنكم نستفيد ، واعتذر ان كان تسلسل طرحي للموضوع غير متناسق ولكن قد يكون بسبب الضغط النفسي لتذكر ما مررت به وانا اكتب موضوعي هذا .
بانتظارمشاركتكم بفارغ الصبر .
والله الموفق ،،،

الله يعطيك العافية وان شاء الله .. الصبر والصمود هو طريق النجاح وانت ماشاء الله عليك مغامر وصاحب قرارات جريئة

هل جربت الاشتراك مع منصات الأكل اون لاين مثل هنقرستيشن طلبات او جاهز نقوة .. الخ
فترة رمضان موسم قد يكون لك خير ان شاء الله

حاول تقلل العمال بقدر المستطاع واذا استلزم الامر انك تطلب تخفيض ايجار المحل

والله يوفقك

نسبتهم عاليه لكن يكون لك مدخول في هذه الظروف ويكون مثل الدعايه لمحلك
وفقك الله

سبحان الله وبحمده
سبحان الله العظيم

في كمان تطبيق الاكل تويو - كريم - اوبر

الوضع الان ازداد سوءاً رواتب العمال ماعد قدرت ادفعها في بداية الجائحه دفعت نص الرواتب وبعدها ماعد قدرت الإيجار نفس الوضع ولاريال والشغل سيئ جداً والله لاتطبيقات ولاغيره ومن سوء الحظ المطعم توه جديد ماله أربعة اشهر يعني لسه الناس ماعرفتني اضافة إلى انه الان العمال متذمرين جداً يبغون رواتبهم ولأعندهم اي تقدير وهم عارفين بالوضع الراهن واكلين وشاربين ببلاش وإنترنت مجاني ومسكنهم شقه حول المطعم راقيه جداً بالنسبه لعماله ومع ذلك ضاربين بالوضع الحالي عرض الحائط والآن ماعندي اي قدره ماليه أني ارجع أقوم المطعم من اول وجديد حتى ب2000 ريال أغراض للمطعم ماني قادر أوفيها الراتب كله التزامات بسبب دخولي في هذا المشروع اضافة إلى انه باقي آثنين من العمال ماطلعت اقاماتهم وتراكمت علي غرامات التأخير يعني بدل مااطلع الاقامه ب750 مع رخصة العمل الان ادفع 1750 لكل واحد مطوف مرتين والوضع يرثى له الحمد لله ع كل حال جلست مع العمال وتفاهمت معهم انو هناك حلين ياتصبرون ونرجع نعطيكم رواتبكم المتأخرة إذا اشتغلنا أو اعملكم خروج نهائي والله يصبرني ويعوضني خير والواضح بهذا الوضع أني راح أبيع المطعم وهو الحل الأقرب والأمثل .