السلام عليكم
انا شاب ودي استغل هالموسم وابيع التمر بس مالقيت طريقه اصرف به التمر ، نزلت اعلانات بحراج ماحد تواصل معي وولا ادري وش اسوي.
انا اجيب التمر من عنيزه وساكن بالرياض ، التمر بدون كيماوي حسب كلام الرجال وانه الي يبي يفحص يفحص وينزل به هو لسوق عنيزه ، وولا ادري شلون افحصه وكم بيكلف الفحص، لاني ماودي ابيع شي يضر الناس واصير كسبان بذنوب.
وكان عندي فكره بيع التمر بالكويت بس مادري شلون اشحنه وولا اعرف شلون اصل للزباين الي هناك
ماعندي راس مال الا 1000 ريال وودي باي مشروع ، سبق وان فكرت بالجح والمنقا لكن نفس الفكره مادري وين اصرف البضاعه وخصوصا انه بضاعه حساسه وممكن تخرب

وسؤال اخر ، كم يقعد التمر على بال مايتغير ؟

والله يجزاكم خير

ماعندي اي خلفيه الا كان واحد من اصدقائي كان يبسط فيه على طريق فيه حركه وكان يمشي معه وعندك في صلاة الجمعه تبسط فيه وتقدر بعد الصلاة تتوجه للحراج مادري حراج الرياض مثل الحفر او لا لان بالحفر تقدر تبسط بالحراج وفي زباين وبتربي زباين وبيعرفون مكانك وحبيت اقولك الله يرزقك ويوفقك تحياتي لك

الجمعة والاثنين عند الحراج ولا عند سوق الحمام
بالرياض والخرج واذا عندك صور نزلها خل الكل يشوفها حتى يطلب منك
والله يوفقنا وياك .

البسطه فكرة حلوه لكنها جدا محدوده
انصحك انك توزع على المحلات وتعرض عليهم التمور ومميزاتها..لف على كل محلات التمور والخضارواعرض عليهم
وعلى محل الحلويات او الاسر المنتجه

اقترح يكون عندك حسابات بالتواصل الاجتماعي، موبس حراج حتى تقدر تسوي دعايه وتجيب متابعين..تقدر تسوي اعلان عند التاجرات بالانستقرام اللي حساباتهم فوق 50 الف متابع بمبلغ بسيط 50 ريال وحولها

وبالتوفيق