مـــــعانــــــــــــــاة عـاطـــل(قصيده)

حنيت لك ياديرتي · #1 (**permalink**) 29-11-2008, 05:54 PM

السلام عليكم ورحمة الله وبركاته

من باب المشاطرة لاخواننا الاعزاء العاطلون وبالاخص خريجي

الجامعات وكليات المعلمين خرجت هذه القصيدة .

قالو تنام وقلت وشلون ابا نام ---- هو ياجماعة تقل النوم عيني ؟
قالو علامك : قلت بالحيل منضام ----- تعبت واسهر والحزن محتويني
ضايق وهذا الحال عام وراء عام ---- من سبّة اللي ضيّق الكون فيني
ادرس واحسب ان الفرح دوم قدام ----واثر التمني مات يالمسلميني
النفس ملت والصدر كله اوهام ---- والناس ماترحم ولا لي عويني
اللي تخرج مالقى حتى الايدام ----- فقر وبطالة حال ماله وزيني
اما قعد بالبيت مأسور الاوهام ---- والا انحرف عن مسلك الطيبيني
طالت امانينا على روس الاقلام---- نصبر ونصبر وكل شيئ يشيني
واليّا صبرنا حظنا طاح ماقام ---- تعومست دنياك وطار اليقيني
هذا تراه الحال في طول الايام --- من دون شرح وكلنا عاطليني
اليّا هرجنا ماوصلنا للاعلام ---- من دوننا باب وقفل مكيني
هذا تراه الحال في بصمة إبهام ---- قلوبهم من يمنا ماتليني
اسلوبهم يزرع على دربنا الغام---- وعن حقنا صدو بها غافليني
الوضع كايد مابقى غير الاحلام ---- والوقت مايرحم ولاهو يعيني
تطاولت دنيا العنا والشقا دام ----- وبقعنا تلوعزنا بغبر السنيني
شمس التخرج كاسفه من وراء العام ---ولافي سمانا نجم واحد يبيني
اتحطمت كل السلع دار الارقام ----اكبر واعلى من طموح اليديني
الله واكبر ياتصاريف الايام ---- والله واكبر ياطموح الحزيني
تكفى ياابو متعب ترى الوضع هدام --- وانته ابونا وعزنا يالعويني
حنا بذراك اليوم ياعز الاسلام ---- ياملتجى المضهود في كل حيني
يافزعة المغبون يانسل الاكرام --- يالمنهل العذب القراح الثميني
انت الامل بعيون من بات منضام --- وانت الامل في مقبلات االسنيني

الشاعر : بدر العياضي

منقول