تسجيل الدخول
|
|||||||
تأسس الموقع عام
2006
Site was established in 2006
|
|||||||
| أضف رد |
|
|
LinkBack | أدوات الموضوع | انواع عرض الموضوع |
02-12-2008, 06:25 PM
|
||||
|
||||
|
عصر الإشتغالات..!!!!
 عصر الإشتغالاتسمعنا عن و العصر الجليدي و العصر الحجري و عصر النهضة الصناعية بس حد سمع عن عصر الإشتغالات!!! أكيد مش هتسمع عشان إنت عايش فيه!! يعني إلي كانوا عايشين ايام العصر الحجري كانوا عارفين إسم عصرهم!! ايوه….إنت عصرك إسمه عصر الإشتغالات….. لما تلاقي سلعة مكتوب عليها الثمن 99.99 جنيه أو دولار بدل 100 يبقى إنت عايش في عصر الإشتغالات..... لما تخش النت و يكتبلك Free download و بعدين يقولك حط رقم الفيزا أو الماستر كارد....يبقى إنت عايش في عصر الإشتغالات لما تفتح التلفزيون و تلاقي إعلان إتصل ب 0700 وكمان 0700 و إكسب 10000 جنيه...و تلاقي مسابقة سموره و ريكو....و أخيرا تلاقي موضه جديده طالعه... يقولك المفتش كرومبو و العميل 101 و اللغز يكون سخيف....كل هدفهم إن الناس تتصل عشان يكسبوا هما........يبقى إنت عايش في عصر الإشتغالات و للأسف حتى بعض المحطات الدينية بتروج لمنتجات تعبانه و بتستغل عقول الناس البسيطه يقولك المروحة إلي ب3 شفرات....و الحلة إلي بتطبخ ..و إيه كمان الحلة ليها خرم في الغطى!!! كله بيدور إزاي يشتغل الناس و يكسب.......عشان دا عصر الإشتغالات و إنت يا إلي بتقرأ الموضوع........ عايز يمشي حالك في العصر دا....روح إشتغل الناس روح إفتكس أي بتنجان..... حتى في الشارع.... الناس بتشتغل بعضها.... كان حصل موقف لواحد صاحبنا ... و هو دا السبب إلي خلاني أكتب الموضوع دا الموقف حقيقي و أنا هحكي القصة بأدق تفاصيلها ................................................. كان يا مكان...في سالف الأزمان كان صاحبنا دا لسه نازل من الميكروباص بعد سفر و هو ماشي في امانة الله في شارع مزدحم نوعا ما الساعه 12 بالليل لقى واحد بيقدمله برفام طبعا صاحبنا طنش.... لقى البرفام ممدود أدامه تاني فقال للراجل شكرا مش عايز قام الراجل إلي بيقدمله البرفام قاله دا مجانا..خده صاحبنا قاله لأ شكراا مش عايز الراجل بصله بإستغراب : يا إبني ما تخافش دا مجانا صاحبنا بصله...قاله طيب هاته و شكراا الراجل إلي إداله البرفام..... حضرتك شركة (...) بتقدملك الظرف دا هتفتحه و في جوائز كتير ممكن تكسبها..... صاحبنا مستغرب.... الراجل أخده على جنب و معاه 4 مساعدين و فتحله شنطة العربية إلي مليانه جوائز الراجل: حضرتك هتفتح الظرق ممكن يطلعلك يا إما تقم خشاف أو سخان أو مكوة أو لاب توب أو موبيل نوكيا N73 صاحبنا مستغرب و بيسأل: كل دا مجانا الراجل: طبعا مجانا بس هتفتح الظرف صاحبنا : طيب ماشي الراجل : موافق صاحبنا ماشي طيب الراجل :آخر كلام صاحبنا : و أنا خسران إيه طيب ماشي ..مش مجانا الراجل: آه مجانا طبعا الراجل طلع ظرف و قاله حطلي 50 جنيه في الظرف!! صاحبنا مستغرب!! : إنت مش بتقول مجانا!! الراجل: أيوه ما إنت إلي كسبان اقل هديه عندنا تمنها 70 جنيه و في هدايا ب200 و في موبيل و لاب توب و بدأ الراجل يقنعه..... و يقوله إنت هتفتح الظرف و لازم هيطلعلك هدية و هتفتح ظرف تاني و لو طلعتلك نفس الهدية هنرجعلك فلوسك طبعا الراجل كان بيتكلم بأسلوب مقنع وسريع.... و صاحبنا شايف الجوائز أدامه فقالك أما نجرب و ندفع ال50 جنيه خصوصا إنه كان لسه مسافر من بلده و جيبه مليان فلوس.... الراجل : حضرتك هتحط ال50 جنيه هنا في الظرف دا صاحبنا حط الفلوس في الظرف و الراجل فتحله الظرف التاني إلي كان لونه أحمر عشان يشوف حظه الراجل: مش معقول....إنت يا إبني حظك حلو...إيه دا مش ممكن!! صاحبنا فرح : إيه كسبت إيه وريني الراجل : طقمين خشاف ست أطباق يعني 12 طبق!! صاحبنا لسه مش مستوعب!! الراجل: دا طقم فاخر جدا و الأطباق مش بتتكسر و فتحله الكارتونه و بدأ يخبط الطبق في العمود عشان يثبتله و أعد يقوله دا غالي جدا ثمن الطقم الواحد 50 جنيه يعني إنت كسبت 50 جنيه!! صاحبنا المسكين مالوش في الأطباق و الحاجات دي...و مش عارف أصلا سعرها بكام و الراجل قاعد يقوله: إسأل حتى والدتك و إنت تعرف دي سعرها كام... و يجي راجل تاني بقى من ال4 يقوله كسب هو كسب إيه الراجل: طقمين خشاف... الراجل التاني: يااااااه ..مش ممكن يا إبني دا إنت حظك حلو أوي... صاحبنا مش عارف يستوعب لسه... الراجل: إنت هتفتح معانا ظرف تاني..... صاحبنا: .......... الراجل: المرادي ممكن تكسب نوكيا أو سخان ياباني أو مكنة حلاقة ياباني برضه و لو طلعلك طقم خشاف تاني هنرجعلك فلوسك و هتاخد هديتك التانيه صاحبنا: طيب يلا إفتح الظرف الراجل بإبتسامه ماكره ( زي الروايات هههههههه) : حط 50 جنيه في الظرف دا صاحبنا: تاني!!! الراجل: ما أنا بقولك حضرتك ممكن تكسب..........( و عادله الجوائز تاني) صاحبنا: ما أنا دفعت 50 مش معقوله هدفع تاني!! الراجل و صاحبه: حضرتك إحتمال كبير تكسب تليفون النوكيا و إنت مش هتخسر صدقني ...كدا كدا كسبان!! صاحبنا طلع 50 من المحفظه و هو في حالة من الغموض و التعجب!! الراجل يلتقط ال50 و هو في قمة النشوة و الحماس الشديد و يفتح الظرف و يبص في الورقة..... صاحبنا: طلع إيه الراجل: مش ممكن...مش هتصدق.... بجد إنت حظك حلو و الراجل يوري الورقه لصاحبه شوف كسب إيه صاحبه: لا مش ممكن إنت بجد حظك حلو و أمك بتدعيلك صاحبنا : إيه إلي كسبته وريني الراجل: مكنة حلاقة ياباني صاحبنا بقى متعجب!! الراجل :ألف ألف مبروووووك صاحبنا: مكنة حلاقة إيه الراجل: دي ياباني حتى شوف و قاعد يفتح العلبة بتاعت المكنة عشان يثبت .... الراجل: أهي شايف و دي علامة الجوده أهي.... دي شركة معروفه صاحبنا مش شايف حاجه و لا هو عايز يشوف و مش قادر يستوعب لسه.... الراجل: دي تمنها ما يقلش عن 700 حنيه صاحب الراجل: آه يا إبني دي ياباني ...دي توصل ل900 جنيه كمان صاحبنا: بس دي مكنة حلاقه يعني مش حاجه الراجل : لا......شوف حضرتك ... و قاعد يفتح في العلبة تاني و يطلع الملحقات بتاعت المكنة....دي بتحلق شعر و دقن..و فيها درجات...إلخ الراجل راح لصاحبة التالت إلي ماكنش مركز معاهم حقه يا عبده المكنة دي بكام؟؟ عبده: إنت كسبت مكنه!!...دي تمنها ما يقلش عن 800 جنيه الراجل : شوفت...دي ياباني ألف مبرووووك دلوقتي هتفتح ظرف تالت و هيبقى في جوائز إما لاب توب أو نوكيا أو سخان و لو طلعتلك جائزه مكرره هنديلك فلوسك كلها طبعا صاحبنا ما عتش مستوعب إلي بيحصل....و بقى بيبص حواليه و مستني يشوف كاميرا خافيه و لا حاجه....بس مافيش صاحبنا : أنا بيطلعلي اقل حاجه ...لا خلاص كفايه كدا الراجل : لا دا لازم حضرتك و زي ما بقولك تليفون النوكيا أهوو أو لاب توب .....هتفرق معاك كتير صاحبنا على أمل إنه يعوض إلي دفعه بجائزه قيمة الراجل و كالعاده طلعله الظرف صاحبنا طلع ال50 الراجل: المرادي لازم تحط 100 حضرتك صاحبنا : لا 100 إيه...ما عنديش فلوس...هي 50 الراجل: حضرتك الجوائز هنا قيمة إنت إلي كسبان صاحبنا: ما أقدرش أديلك 100 يادوبك أنا باقيلي 120 يكفوني اليومين دول الراجل : حضرتك ما ينفعش كدا صاحبنا : و الله مافيش فلوس معايا الراجل و هو بيضحك ...( ضحكة الفصال بتاعت البياعين) صاحب الراجل: خلاص خلاص...هات ال50 الراجل: خلاص ماشي بس و الله المفروض ما ينفعش كدا صاحبنا : أما نشوف إنت بتقول يا لاب توب أو نوكيا أو سخان.... الراجل فتح الظرف و كالعاده يوري الورقة لصاحبه الراجل : لا لا لا صاحبنا : إيه الراجل : كسبت معانا سخان صاحبنا مستني الراجل يطلعله السخان السخان طلع بس العلبة صغيرة و صاحبنا إتصدم... السخان سخان شاي!!! الراجل: ألف مبروووك دا ياباني على فكرة و فتح الراجل العلبة الصفرة القديمة عشان يثبتله إن السخان قيم كالعاده صاحبنا مش عارف يقول إيه!! الراجل: شوف حضرتك دا من السعودية على فكرة.....شوف مكتوب إيه صاحبنا جاب آخره خلاص..... الراجل: المرادي بقى هتفتح الظرف دا و عندك يا إما هتكسب النوكيا أو اللاب توب أو مكوى صاحبنا خلاص : خلاص إنتوا اصلا شكلكم نصابين.... الراجل: حضرت ليه بتقول كدا الهدايا إلي معاك قيمة جدا و تمنها يعدي ال1000 جنيه صاحبنا: يعني الشركة بتاعتكم بترمي فلوسها الراجل: حضرتك دا عرووض و هدايا بتقدمها الشركة عشان لسه فاتحه... صاحبنا: إفتحلي الظرف إلي معاك... الراجل و هو بيبتسم إبتسامه صفره : لأ ما ينفعش..حط ال50 الأول صاحبنا: خلاص ما ينفعش يادوبك دول يكفوني اليومين دول الراجل و بصوت منخفض : بس حط ال50 صاحبنا : مش هحط خلاص مش هينفع إفتح الظرف إلي معاك ....إنت بتقول الهدايا إيه؟؟ الراجل : نوكيا أو لاب توب أو مكوى ألمانية اصلية صاحبنا : طيب إفتح الظرف هتطلع مكوى....إفتح الراجل يفتح الظرف و يحاول إسترضاء صاحبنا صاحبنا: أهي طلعت مكوى مش قولتلك صاحب الراجل : ألف مبروووك يا بيه على الهدايا صاحبنا و هو كاتم غيظه : ما إنتوا نصبتوا عليه الراجل و اصحابه: لا إزاي دا إنت معاك....كذا و كذا......( إلخ) الراجل: شوف حضرتك إحنا في الشارع أهوو و واحد تاني أهو بيشوف حظه معانا بس إنت كسبت معانا كتير صاحب الراجل وقف لصاحبنا تاكسي و لفله الهدايا في كيسين و صاحبنا ركب التاكسي و ضميره بيأنبه.... و بيقول في سره: و أنا هعمل إيه بطقم الخشاف و لا بسخان الشاي!! الراجل: ألف سلامه يا باشا...مع ألف سلامة ................................................. صاحبنا بعد ما روح البيت....و قاعد يحاول يراضي ضميره و فتح الهدايا و بدأ يتفحص فيها بص على أول هديه كسبها.....طقم الخشاف .. لقاه Made in china بص على سخان الشاي....العلبة بتاعته صفره و العلبة زي ما تكون مفتوحه 10 مرات قبل كدا بص على السخان مكتوب Made in japan بس في الآخر دا سخان شاي!! بص أخيرا على آخر هدية و هي مكنة الحلاقه الياباني إلي ب700 أو 800 أو 900 جنيه زي ما كل واحد فيهم طلع سعر لقى الشركة مش معروفه ...إسمها غريب.... جابها يمين في شمال لحاد ما لقى كلمة Made in china صاحبنا وصل لمرحلة شبه إنهيار و تأنيب للضمير... و قعد يسترجع إلي حصله و إزاي إستدرجوه..... و ما قدرش يصبر في البيت لوحده.... نزل في الشارع و أخد معاه مكنة الحلاقة عشان يسأل عن سعرها راح للسوق عند محلات الأجهزة دخل المحل صاحبنا: لو سمحت حضرتك المكنة دي لو هبيعها هتجيب كام؟؟ صاحب المحل بص على المكنة بنظره و على طول كان رده : 15 جنيه!! صاحبنا هيتجنن: أنا حضرتك مش هبيعها أنا بس هسأل عن سعرها صاحب المحل: إنت جايبها منين؟؟ صاحبنا: واخدها هدية صاحب المحل: يعني بالكتير 25 أو 30 ...آخرها 35 جنيه ..دا يعني لو آخرها.... بس دي تجيب 30 صاحبنا المسكين ...تأكد دلوقتي إن هو إتنصب عليه بإستدراج و سأله عن مكن في المحل لفت نظره صاحبنا : طيب المكنة دي بكام؟؟ صاحب المحل: دي ب45 صاحبنا في حالة إنهيار و في حيرة من أمره و في سره كل الشتايم إلي بتخطر على باله : يا ولاد ال....(تووووووووووووووووت) و سأل محل تاني و لقى نفس النتيجة روح البيت و قاعد يفكر تاني و شاور عقله إنه يرجع للمكان إلي كسب فيه الجوائز!! رجع المكان.......بس مالقاش العربية و لا الراجل!! صاحبنا رجع البيت و أدرك حقيقة واحدة حقيقة تثبت إن إحنا عايشين في عصر الإشتغالات و أتمنى ما أكونش طولت عليكم.... بس القصة دي حصلت فعلا لصاحبنا بكل تفاصيلها لكن الأسلوب بصياغتي فقط التعديل الأخير تم بواسطة TicTic ; 02-12-2008 الساعة 06:27 PM سبب آخر: الموضوع اختفى بعد معملت اعتمد المشاركه :) 
|
| أضف رد |
|
(( لا تنسى ذكر الله )) |
|
|
|
|
العرض العادي
