اللي بيفتح محل وعلى باله ذكي بيحط اجنبي ترا البلدية والجوازات شغالين غرامات توصل ل 5 الاف ريال واذا العامل مهوب على كفالتك تسفير وغرامة واذا على كفالتك ومسكوه وهو يحاسب ويمسك الفلوس بيديه راح تدخلون في قضية تستر تخليكم تبيعون اللي وراكم وقدامكم وشطب سجل وبلاوي ما تتصورونها
ولو مسكوا عامل التوصيل وهو مهوب على كفالتكم شالوه وشالوا الدباب معه وسفروه

اي محل خضار وفواكه تحصلون فيه اجنبي يبيع او يحاسب بلغوا عليه عن طريق تطبيق بلاغ (بحط لكم رابط التطبيق) واذا صادوه انتظر كم شهر ويجيكم على حسابكم البنكي نسبة من الغرامة 30% يعني لو غرموه 100 الف يجيكم منها 30 الف ريال بالتمام .

حتى الاجانب لو بلغوا على اي متستر يجيهم 30% من نسبة الغرامة لله درك ياوطنا ما اكرمك .

رابط القرار ومشروح فيه كل شي
https://mc.gov.sa/ar/mediacenter/New...-02-19-03.aspx


رابط "تطبيق بلاغ تجاري"
https://mc.gov.sa/ar/Pages/MobileApps.aspx

حملوا التطبيق وبلغوا وانتظروا نسبة 30% من اي غرامة بشرط يكون بلاغك صحيح يعني اذا شفت اجنبي يبيع في محل خضار وفواكه دقة بصورة بدون ما يدري ولا تنشروها عشان ما يرفع عليكم قضية تشهير بس ارسلوا الصورة او مقطع الفيديو عن طريق البلاغ وبس او كلموهم ويتواصل معكم موظف عشان يتأكد من الفيديو .

التبليغ بسيط ما ياخذ من وقتكم 5 دقايق بالكثير .

للتواصل/ s7080n@gmail.com
او عبر الرسائل الخاصة

العنوان: الرياض حي طويق

اذا ذكرت اي شي راح اضيفه في المشاركات القادمة ان شاءالله

السلام عليكم ورحمة الله وبركاتة


نجي اليوم لراس المال المطلوب اللي بنشري به الخضار والفواكه

انا كنت ابيع على السيارة يعني ما اشتري زي ما يشترون اصحاب المحلات لأني اشتري الانواع اللي تمشي بسرعه زي الطماط والبطاطس والبصل والكوسة والباذنجان والجزر والقرع ومن الفواكه 3 انواع شبه ثابته خاصة البرتقال والموز ..... التفاح احيانا اشتريه واحيانا يمر ايام ما اشتريه وفيه انواع تفاح امريكي احمر يجي كرتونه كبير وغالي وسعره غير ثابت وفيه تفاح ابيض يجي منه كراتين بأوزان مختلفه ..... عكس الموز الكرتون الكبير وزنه 14 - 15 كيلو سعره شبه ثابت والبرتقال كرتون وزنه 7 كيلو سعره شبه ثابت وهم اكثر تصريف من التفاح واكثر ربح .


فكنت احتاج لراس مال ما يزيد عن 700 ريال ونجي نحسبها بسعر تقريبي لان الاسعار تتغير غير ثابته خاصة في فصل الشتاء والصيف وفي موسم رمضان والحج والاعياد والدراسة والعطلة الدراسية ...الخ

30 كيس صغير بطاطس نقول الكيس ب 2 ونص ريال لأن الكمية اللي بنشريها قليلة 30 (ضرب) 2.5 = 72 ريال
30 كيس صغير بصل نقول الكيس 4 لأن الكمية اللي بنشريها قليلة 30(ضرب) 4 = 120 ريال

2 جرم قرع = 15 ريال * 2 = 30
2 جرم جزر = 15 ريال * 2 = 30
2 جرم باذنجان = 15 ريال * 2 = 30
2 جرم كوسة = 15 ريال * 2 = 30
حددنا سعرها بـ 15 ريال للجرم واحيان الجرم ينزل سعره الى 9 ريال واقل واحيانا يكون اكثر من 15 ريال فحبيت احط لكم السعر الاقرب سبه الثابت لهذي الاصناف


الطماط فيه انواع رخيصة طماط عادي طبيعي لونه احمر غامق يجي حجمه بيضوي مايجي زي الطماط المحمي اللي مليان ولونه احمر فاتح وكنه بينفجر من كثر السماد الكيماوي .
سعر الطماط العايدي الطبيعي احيانا تأخذ الفلين بريالين ونص واذا هو غالي من 3 الى 4 ريال للفلين للي حجمه 4 كيلو الى 4 ونص
االطماط المحمي سعره اذا السوق مليان تاخذونه ب 4 ريال واذا عليه طلب ما يزيد عن 5 ريال للفلين اللي حجمه من 4 الى 4 ونص كيلو .

فيه احجام للطماط فلين كبير هذي اسعارها اغلى يعني المحمي من 8 الى 13 ريال يزيد او ينقص شوي لكن افضل شي تاخذون الفلين وزن 4 الى 5 كيلو اسهل للتصريف واكثر مكسب خاصة اذا بتبيعون بالكيلو 4 كيلو * 5 ريال = 20 ناقص 5 ريال قيمة مشتراه الربح صافي من الفلين 15 ريال
يعي لو بعتوا فاليوم 20 كرتون نضربها في ربح 15 ريال = 300 ريال اضربوها في 30 يوم = 9000 ريال هذا ربح صافي من الطماط فقط والارباح والمبيعات ترا مهيب ثابته لأنها قابلة للزيادة والنقصان لكل نوع من الخضار .

خلاصة الكلام:
اذا فتحت محل لا تكثر من البضاعة في الشهر الاول لين تشوف كم مبيعاتك اليومية وكم يبقى من بضاعتك مايمشي وكم كمية البضاعه اللي تخرب وشوي شوي ومن الشهر الثاني وانت عارف كل الشغلة ان شاءالله وبعدها تضبط شغلك وتعرف كم راس المال المطلوب اللي لازم تنزل به للسوق وتشتريبه بضاعتك .


احب اعيد واكرر
1- اسعار الخضار غير ثابته نهائيا فلا تحط في راسك سعر ثابت .
2- اللي بيشتري 30 كيس بطاطس او بصل ماراح يشتريها بـ أسعار من يشترون 100 كيس او 200 كيس لأنكم كل ماشريتوا اكثر كل ما قل سعر الخضار لكن هذي الكميات تصلح للمحلات اللي مبيعاتها اليومية بين 3 الاف وطالع يعني انت توك جديد فالشغلة لا تتهور لأن الخضار والفواكه تخرب بسرعه .


وان شاءالله باقي تكملة للموضوع

السلام عليكم ورحمة الله وبركاتة

نجي اليوم ونتكلم عن موسم الرطب واللي بعده يبدا تحول الرطب الى تمر لكن الأرباح الكبيرة على ما اسمع فالرطب لأن موسم قصير ويصير عليه طلب غير طبيعي وارباح كبيرة

#### انا ما قد اشتغلت في الرطب لأني كنت ماسك مكان في احد شوارع الرياض وشغلي فقط على انواع محدده من الخضار والفواكه ولي زباين شبه دائمين وكنت معين خير والحمد لله

اول ما يبدا موسم الرطب تبدأ أسواق التمور بإستقبال الرطب من المزارع ومن الجلابه اللي يشترون من المزارع وينزلون للأسواق لأن حتى المزارع ما عندها إستطاعة انها بنفسها تنزل هذي الكميات الكبيرة من الرطب للسوق لأنه لو كان العرض كبير يمكن ما احد يشتري الرطب منهم وعشان ما يتورطون ويخسرون يبيعون لأصحاب الدينات والونيتات ويسمحون لهم يدخلون مزراعهم ويحملون لهم الرطب
لكن احيانا يكون في سرا عند بعض المزراع يوصل الى مئات السيارات على حسب ما سمعت من ناس فالسوق

الكميات الكبيرة هذي من الرطب تنزل للاسواق مثل سوق عتيقة بالرياض وسوق المدينة وسوق الاحساء وسوق بريدة ويكون السعر فيها يحدد على وفرة الكمية
(عرض/طلب) وعلى نوعية وجودة الرطب (التمر) .

واحد قال لي مره انه بيروح لسوق التمور في المدينة المنورة (وهو الارخص) يجيب رطب قلت سوق عتيقة اقرب لك قال هناك ارخص لأني احمل السيارة من المدينة ب2000 ريال (ألفين) واجي ابيعها في سوق عتيقة بربح اقل شي بين 3000 الى 5000 خمسة الاف ريال فالرد الواحد اذا فيه طلب عالي لأنه يقول ان البيع بالرد اسرع ربح من بيع الشوارع لكن بيع الشوارع بالتفريد أكثر ارباح يمكن لو يبي يبيع الرد بالتفريد ما يقل مكسبه عن 7000 سبعة الاف ريال فالرد الواحد لكن للي يبي يتحمل الحر والشمس والحين الشغلة فيها غرامات من البلدية لكن حبيت اوضح لكم كمية الارباح المهولة في موسم الرطب والتمور .


وان شاءالله باقي تكملة للموضوع

السلام عليكم ورحمة الله وبركاتة

نجي اليوم نتكلم عن الاكياس والميزان وغيرها من الاغراض اللي لازم توفرها اذا بتبيع خضار وفواكه

الاكياس وصحون الفلين وكراتين الخيار والميزان تحصلونها في المحلات اللي مقابلة لسوق الخضار من الجهة الغربية وهم تقريبا الارخض وفي محلات في الجهة الجنوبية وفيه محل داخل السوق برضه يبيع فلين وكراتين وفيه محلات على شارع الشرطة اللي ورا مسجد السوق
يبيعون الاكياس بالكيلو يعني كيلو اكياس لون ازرق بين 5 الى 7 ريال للكيلو
والاكياس اللي لونها اصفر واكبر سعرها بين 7 الى 9 ريال للكيلو
الميزان العادي سعره في حدود 40 ريال
انا ما كنت اشتري فلين او كراتين لأني كنت ابيع بالسيارة واحط الخضار في سطول لونها اسود واذا شراه الزبون احطه له في كيس
يعني ماقد شريت لا فلين ولا كراتين لأني ما احتاجها لكن ترا سعرها رخيص مره لا تشيلون همها ابدا .

الله يجزاك خير على هذه المعلومات المفيده وأسأله تعالى في هذا الشهر الفضيل ان يفتح لنا ولك من واسع فضله

الله يعطيك العافية على الموضوع الرائع.. وأقول لك شهر مبارك

الله يجزاك خير الدنيا والآخرة ، ويرفع قدرك ويوفقك ، معلومات قيمة ومفيدة، وقد إختصرت على إخوانك الوقت والجهد فبارك الله فيك وفي مالك وأهلك ، أنا طالب في الجامعة ولم يبقى لي إلا أشهر معدودة واتخرج وكنت أبحث عن من يدلني ويرشدني إلى طريقة دخول عالم التجارة وخصوصاً الخضار والفواكة فوجدت مقالتك النافعة هذه وقد إختصرت علي الكثير.

السلام عليكم أخوي ممكن تتواصل معي على الايميل ( sttam2005@gmail.com )
إيميلك غير صحيح

الله يجزاك خير ويرحم والديك والله كلامك صدق وانا قد جربت بيع الخضرة بالشوارع
ان كان فيه احد يبي شريك في محل خضار يراسلني على ايميلي
sulaiman600600@gmail.com
من عندك راس المال ومن عندي اساعدك واداوم فالمحل وقت الصباح كل يوم بإذن الله والمكسب نتفاهم عليه