السلام عليكم ورحمة الله وبركاتة

في هذا الموضوع ان شاءالله بعرض لكم بعض ارباح بيع الخضار والفواكه من واقع خبرة لتجربتي في الشراء من سوق العزيزية لبيع الخضار والفواكة بالجملة والبيع في الشوارع وعند بعض الجوامع قبل تشديد البلدية على جميع الباعه اللي يبيعون بالشوارع بسياراتهم .

انتهيت من البيع على السيارة بسبب تشديد البلدية قبل شهرين او اكثر بشوي من حدوث جاحة كرونا وجت كرونا وجانا الحظر وبعد الحظر مباشرة بعت سيارتي الونيت لأن غرامات البلدية صارت توصل ل 5 الاف ريال واحيانا حجز السيارة لمدة شهر .


قبل كم شهر كنت بشارك واحد ثرثار طلع ما عنده سالفه ازعجني كل شوي نبي نسوي مشروع ويوم قلت له على الخضار والفواكه وشافني صامل بطلع سجل تجاري هج الرجال ولا عاد جاب طاري للمشروع .



*لأن الشغل في السيارة اسهل من الشغل في المحل بوضح بعض النقاط لكم:

المحل يحتاج له وقفه ولا يقدر واحد يغطي على المحل خصوصاً اذا كان بينزل للسوق على قبل صلاة الفجر ويبي يحمل من هناك ويالله يوصل محله على الساعة 8 او 9 صباحا وعلى بال ما ينزل البضاعة ويرتبها ويغلفها ويصفها يكون قد اذن الظهر

فـ مستحيل انه يقعد مواصل لين المغرب خلوا عاد انه بيقدر يواصل لين الساعة 10 المساء فهذا شي مستحيل
فشغلت محل الخضار اقل شي لازم يشتغلها اثنين والا الله يعوض على من بيفتح محل واكبر دليل شوفوا موقع حراج كل يوم تحصلون اعلان او اعلانين او ثلاثة اعلانات لناس تهوروا بدون خبرة تحصلونهم عارضين محلاتهم الجديدة للتقبيل لأنهم يحسبون الشغلة بسيطه وتلقى اكثرهم من بداية افتتاح محلة ما كمل شهر حتى لأن الشغله مهيب بسيطه ...... اكمل لكم الباقي بكره او بعده ان شاءالله

السلام عليكم ورحمة الله وبركاتة
تكمله للموضوع.....

انظمة البلدية لمحلات الخضار والفواكه وشروطها ما عندي والله خبرة فيها لأني كنت ابيع على سيارتي الخاصة ولا قد فتحت محل بإسمي
حتى اني قد نزلت موضوع استفسر من اخونا السلاطين عن السجل والرخصة يوم كان يبي يشاركني الرجال اللي انحاش وطلع كلامه خرطي ما عنده سالفه

لذلك بعطيكم بعض النصايح اللي مالها دخل في انظمة وشروط البلدية اذا احد منكم ناوي يفتح محل والباقي عليكم ..... وراح اذكر لكم ارباح بعض الخضار والفواكه اللي ماراح تصدقونها لين تجربونها بأفسكم

### اذا بتستأجرون محل للخضار والفواكة لازم تنتبهون لهذي النقاط عشان ماتخسرون ان شاءالله ..... وهذي المعلومات عرفتها من بعض حقين محلات الخضار يوم كنت اسولف معهم لأن بعضهم فتح محلات وخسر وكنا نسأل بعض عن الاسباب ..الخ وحبيت افيدكم بكل ما اعرفه ولا تنسوني من دعواتكم:


1- عقد الايجار حاول انه ما يقل عن (5) سنوات ويكون ملزم على المؤجر (صاحب العمارة) وغير ملزم على المستأجر اللي هو (انت) عشان لو صار محلك يدخل ذهب ما يقعد مالك العقار يرفع عليك الايجار لين تطفش وتطلع او تصير كل ما تكسبه من ارباح يروح له فلا يمشيها عليكم صاحب مكتب العقار ويقول لكم ان صاحب العمارة طيب قولوا له اذا هو طيب خله يعطينا عقد 5 سنوات وبس .

2- لا تستأجر نهائياً في عمارة ما فيها أقل شي بقالة من فتحة وحدة او سوبر ماركت أو اسواق او قريب منها فالعمارة اللي جنبها بالضبط والا راح يفشل المحل .

3- حاول يكون الموقع قريب من احد ( الجوامع ) لأن يوم الجمعة البيع فيه يعادل عن بيع عن 4 ايام او اكثر فقرب محلك من الجامع يضمن لك 4 ايام فالشهر تبيع فيها أقل شي 80% من بضاعتك .

4- اذا فيه امكانية تستاجر فتحتين يكون افضل من فتحه وحده خاصة اذا الله وفقك وصار عندك زباين واجد تقدر مع زيادة طلباتهم انك تزيد في بضاعتك وتعبي محلك عشان ماتنزل للسوق يومياً .

5- لازم يكون المحل اللي بتساجرونه قريب من مكان سكنكم والافضل يكون في نفس الحارة او اقرب حارة لكم عشان تكسبون زباين من جيرانكم واللي يصلون معكم فالمسجد .

6- الاسعار المعقولة هي اللي تمشي البضاعة وتجيب لكم الزباين خاصة بعد منتصف الشهر اذا قلت عمليات الشراء لأن اغلب الزباين على الرواتب فإذا كانت اسعاركم غالية ماراح احد يدق مشوار عشان يشتري من محلكم لأنه راح يشتري من اقرب محل عند بيته لكن اذا اسعاركم رخيصة راح يجونك حتى من بعيد .

7- اذا مر على بواقي الخضار والفواكه اللي جبتوها من السوق ثلاثة ايام وبدت تنكمش وتغير لونها وشكلها علموا الزباين عنها وحاولوا تبيعونها عليهم براس المال او حتى بأقل من راس ماله عشان ما ترمونها فالزبالة اكرمكم الله وكفانا وياكم من شر زوال نعمته .

8- المحل يختلف عن بيع السيارة لأن السيارة الزباين يجونك بأنفسهم عكس المحل يجونه الزباين وفيه زباين يبون توصيل فلازم توفر توصيل طلبات لمحلك والا راح تخسر عدد كبير من الزبائن خاصة اللي بحارتكم .


ذكرت لكم هذي النقاط ولو فيه نقاط ناسيها راح احطها لكم في المشاركات الجايه ان شاءالله ...... نجي الحين لأسعار الخضار والفواكه .

أسعار الخضار والفواكه في سوق العزيزية تعتمد على العرض والطلب .... كيف يعني ؟

يعني اذا السوق مليان من مثلا الطماط تحصل سعر الطماط رخيص مره ويوصل احيانا سعر الفلين الى اقل من 3 ريال وفيه من 4 الى 5 كيلو طماط يعني مكسبك واضح ولا يحتاج نحسب الارباح وانا متأكد ان ما فيه واحد منكم قد شرا كرتون طماط بأقل من 10 ريال واحيانا يبيعونه عليكم الحراميه اللي مايخافون الله ب20 وب 25 ريال وانا متأكد من كلامي هذا وهو طالع عليه كرتون الطماط الفلين ب 3 ريال احسبوا انتم الارباح .

يعني كل نوع من الخضار والفواكه اذا كان المعروض منه كمية كبيرة فالسوق يصير سعرة رخيص واذا الكمية المعروضة قليلة يصير سعره شوي مرتفع يعني لو كان الطماط قليل فالسوق ما تحصل سعر الفلين اكثر من 5 ريال للي وزنه من 4 الى 5 كيلو فلا احد يلعب عليكم .

بذكر لكم بعض اسعار الخضار والفواكه اللي كنت اشتريها بإستمرار

وزن جرم الكوسة والباذنجان والقرع والجزر ..الخ = بين 13 الى 14 كيلو للجرم الواحد والجرم عبارة عن صندوق بلاستيك عشان تفهمون معنى الجرم

طبعا سعر جرم الخيار والبامية والفاصوليا(لوبيا) غير ثابته وتراها هي الاغلى فـ احيانا سعر هذي الانواع يوصل الى 50 ريال واكثر لكن لا تكثرون منها يكفي تاخذ لك جرم واحد من البامية والخيار والفاصوليا .

اذا قلنا ان سعر جرم الكوسة والباذنجان والجزر ..الخ بين 13 الى 17 ريال ووزن الجرم 13 كيلو هذا يعني انك اذا بعت الكليو ب5 ريال راح يكون مكسب كالتالي:

13كيلو (ضرب) 5 ريال = 65 ريال (ناقص) سعر مشترا الجرم وهو تقريبا نقول 15 ريال مثلا = 50 ريال صافي الربح من هذا الجرم .

يعني لو تبيع فاليوم 3 جروم كوسة و3 باذنجان و3 جزر بس بيكون ربحك الصافي منها يوميا 450 ريال هذا من (ثلاثة) انواع فقط ولا ذكرنا لكم الفواكه ولا الورقيات ولا (الجح) الحبب اذا جاء موسمه ولا التمر والرطب اذا جاء موسمها تخيلوا بس الارباح هذي فاليوم ونضربها فالشهر تدرون كم تطلع ؟

450ريال ارباح يومية (ضرب) 30 يوم = 13500 ريال ولا راتب موظف فالمرتبه السابعة او الثامنة فلا تخلي طموحك الرئيسي والاول هو الوظيفة ترا ما ورا الوظيفة الا الفقر لا احد يكذب عليكم .


سعر كرتون الموز كنت معامل واحد اشتري منه بإستمرار وكان يبيع لي الكرتون ب 38 ريال اذا عنده كمية كبيرة واذا هو مصرف اغلب الكمية يبيع علي الكرتون ب 40 واحيانا ب42
كرتون الموز فيه تقريبا 15 كيلو يزود شوي وينقص شوي احيانا

مكسب الموز واغلب الفواكه يعتبر قليل لكن لازم توفره للزباين هذا شي ضروري لأن ما احد يشتري برتقال وتفاح الا لازم يشتري موز .
نحسب ارباح الموز
15كيلو (ضرب) 5 ريال = 75 (ناقص) 40 ريال = 35 ريال ربح صافي من الكرتون الواحد ..... يعني لو تبيعون 3 كراتين موز يوميا يصير الربح 105 ريال ضرب 30 يوم = 3150 ريال صافي ربح من الموز فقط .... بعض الحراميه يبيعون كيلو الموز ب 7 ريال وب8 وانتم اكيد قد مرت عليكم هذي الاسعار .

وللموضوع تكمله مستمره ان شاءالله

واصل بارك الله فيك

ممتاز ومعلومات قيمة جداً

بعطيكم اسعار بعض الفواكه والخضار على السريع وانتم قارنوا بينها وبين اسعارها في محلات الخضار اللي داخل الاسواق الكبيرة اللي يديرونها المتسترين والمتستر عليهم

كرتون البرتقال فيه تقريبا 7 كيلو يشترونه من سوق الجملة اذا هو غالي ب 17 ريال
7 كيلو (ضرب) 5 ريال = 35 ريال لو بتبيعون الكيلو ب 5 ...... ولا تحصلون احد يبيعه بأقل من 7 ريال واغلبهم مثبتين السعر 8 ريال لكيلو البرتقال سواء برتقال عصير او برتقال الاكل ابو سرة (صرة)

كيس البطاطس الصغير اذا السوق مليان تشرونه بأقل من 2 ريال وقد شريت اكثر من مره الكيس ب(ريال وربع) ولا يقل سعره عن 5 ريال والحراميه يبيعونه عليكم ب6 وبعضهم مايبيعه بأقل من 8 ريال

كيس البصل الصغير اذا هو غالي مايزيد سعره عن 3 ونص وهو ضروري مستحيل تمشي بضاعتك بدون ما توفر بصل يبيعونه الحراميه على 6 ريال أقل شي واكثر من مره احصله في قسم الخضار بأسواق جنبنا يبيعونه ب 7 ريال

الحبحب (الجح) اذا جاء موسمه تاخذونه على حسب العرض والطلب انا ما اشتريه من سوق العزيزية الا نادرا لأن شغلي في الخضار والفواكه على السيارة وكنت اوفر اصناف شبه ثابته لكن امر عليهم اذا نزلت للسوق واحصله يبيعونه بالكومه واحيانا الكومه تكون من 5 حبات او من 13 واحيانا 25 حبه ويحسبون الحبه عليكم بين 15 الى 20 ريال وكل ما كان حجم الحبحب كبير ولونه احمر زاد سعر الكومة .


اللي معه سيارة وفاضي اذا جاء وقت الحبحب يروح لـ ساجر او لأي مدينة فيها سوق حبحب وهناك يبي يحصل الحبه سعرها بين 7 الى 10 ريال والددسن تشيل في حدود 120 حبه لكن لو كان الحبحب حجمه كبير يمكن ما تشيل اكثر من 80
الحبحب سعره وقت موسمه شبه ثابت من 20 ريال واكثر للحبه وعليكم الحساب .

ولو تعرف احد من حقين المزراع راح تحمل من عندهم الحبه ب 3 ريال لكن اكثرهم ما يقبل الدداسن والهايلوكسات يشترط عليكم دينه 4 طن ونص والا ما يدخلكم المزرعة ولا يمكن يرد عليكم .

ارجو من احد المشرفين حذف الصورة اللي بأول مشاركة لأنها تسبب تكبير للصفحة

السلام عليكم ورحمة الله وبركاتة

نجي لطريقة التحميل من سوق العزيزية لجملة الخضار والفواكة

افضل شي تجون قبل اذان الفجر وتصلون الفجر في مسجد الخضار والفواكه لعدة اسباب:

- ما تحصلون زحمة عند بوابة الدخول ويمكن ما تلقون قدامكم ولا سيارة وحده تدفع رسوم الدخول وكم مرة اجي قبل الاذان ولا القى احد قدامي .

- بتحصلون موقف قريب في مواقف هناكر(مظلات) مباسط بيع الخضار والفواكهة والورقيات ويصير يوم تطلع من السوق سياراتكم ما تبعد 50 متر لكن لو تأخرتوا بعد صلاة الفجر يمكن ما تحصلون موقف الا في اخر السوق يمكن مسافة 200 الى 350 متر عن مبسط الهناكر فإذا كانت سيارتك قريبة من السوق يمديك تخلص بدري ولا يضيع وقتك وانت قاعد تمتر رايح جاي من الهناكر اللي يوصل طولها الى 150 متر الى موقف سياراتك فكل ما كان موقف سيارتك قريب كان افضل .

- دخول السيارات مع البوابة الشرقية اللي مقابلة المسجد للي بيشترون من اصحاب المحلات وغيرهم .

- رسوم دخول السيارة كان ب10 ريال بعدين زادوه الى 15 ريال قبل كورونا الحين ما جيتهم .

- ضروري يكون معك صرف اذا جيت تدفع رسوم دخول السيارة مع البوابة ويمكن وفروا شبكة لكن ما اعتقد لأنها راح تسبب زحمة خاصة بعد صلاة الفجر تقعد اكثر من 25 دقيقة فالزحمة واحيانا اكثر اذا تصادموا عند البوابة عاد الله يعينكم يروح يومكم ما خلصتوا من السوق .


### يوجد هنكر فيه مباسط خاصة للبيع بالمفرق يبدا البيع فيه من الساعه 6 صباحا للي يبي يتقضى لبيته .


اكمل لكم ان شاءالله في المشاركة الجاية: كيف تنقلون البضاعة من مباسط الخضار والفواكة وتحملونها في السيارة وافضل طريقة لدفع رسوم عربية التحميل وكيف تتعاملون معهم .

قبل نقل الخضار لازم يكون معكم كاش (نقد) عشان الشراء من المباسط بالنقد هذا قبل كرونا الحين ما ادري لكن الله العالم ما غيروا شي ومازال الدفع كاش

اذا شريت خضار او فواكه لازم تنقلها للسيارة ولا يقدر احد يقعد ينقل 40 كيس من الخضار او 40 كرتون من الفواكه للسيارة مسافة 200 متر رايح جاي هذا مستحيل لأنك ما تقدر تشيل اكثر من 3 اكياس او كراتين مره وحده
هذا من غير اكياس البصل والبطاطس كيف تشيل 100 كيس صغير واكياس الورقيات ..الخ . فلازم تستأجر عربية من العمال اللي يدورون في هنكر الخضار او في هنكر الفواكه او الورقيات .

افضل شي لو قدرت تشتري الخضار او الفواكه وتخليها عند صاحب المبسط هذا بعد ما يوافق لين تجمع بضاعتك عند كل مبسط كمية..... وبعدها تستأجر اي عربية فاضية تشوفها قدامك وتمر بها على كل كمية قد شريتها وتنقلها مره وحده للسيارة

بالعادة ياخذون من 10 الى 25 ريال وبعضهم اكثر لكن اذا تبيه يحمل ويصف معك البضاعة في سيارتك زود له فالسعر على حسب كل عامل عربية بعضهم يشترط مبلغ معين وبعضهم يكاسر ..الخ انا اعطيهم والمعطي الله بين 35 الى 50 ريال على حسب الكمية اللي انا شاريها .

لو استأجرت عربية قبل ما تشتري الخضار او الفواكه وقعدت تدور على المباسط وتكاسرهم راح يقلقك عامل العربية ويشغلك ويقرقر على راسك لين راسك يصدع وما تسمعون الا هالعبارة (سرعه صديق صديق سرعه) لأنه يبي ياخذ اكثر من مشوار نقل عشان يطلع 90 ريال اقل شي باليوم .

ملاحظة حبيت اوضحها لكم:
# كل جرم من الخضار سواء كان جزر او قرع او باذنجان او كوسة بعد ما تشتريه يفرغونه لك في كيس وبعضهم تلقاهم معبين الاكياس وجاهزة اختصارا لوقت الزباين .

للتواصل/ s7080n@gmail.com
او عبر الرسائل الخاصة