السلام عليكم ورحمة الله وبركاته

اخواني عندي مشروع بسيط او تقدروا تقولوا شغل اربعاء وخميس واللي راح ابدأ فيه بنفسي ان شاء الله من الاربعاء هذا .

الا وهو تعبية هواء كفرات السيارات

الظاهر انه ما يخفا على اهل الديار اللي فيها تطعيس وتجمعات التطعيس

تستأجر كمبرسر هواء من الصناعية (محلات تاجير معدات الحدادة والمواطير تبع الكهرب ) يوميته ما يقارب 50 ريال بس وتامين حوالي 800 ريال يرجعلك لما ترد الكمبرسر

اوكي معي الى الآن

حلو

تروح لم تجمعات التطعيس وتنزل المعدات ولمبة عشان الليل والظلمة

وتعبي للي خلصو تطعيس هواء الكفرات وتاخذ منه خمسة ريال

وشوف عيني ياشباب نظرا لكثرة تواجدي في اماكن الغراز والتطعيس والتحفير والدف في هالسيارات المغرزة <<<<<< اخلص

الاحظ انه شغل التعبية شغال ما شاء الله شغل ما تلقاه فاضي بس الوقت اللي كنت فيه عنده تقريبا من منتصف العصر الين بعد المغرب بشوي تقريبا اذا ما تصدقون حوالي 40 سيارة هذا في زمن يقدر بساعتين الا ربع تقريبا غير باقي الوقت والقهر ان اللي شغالين اجانب مو سعوديين ابو يمن وبنقلة مو زعلان حسدا لا الله يرزقه بس زعلان انه اهل البلد ما استغلوا هالفرصة .

باذن الله انا بستاجر المعدات ونازل ها الربوع ابشتغل من الظهر الين 12 الليل بجرب حظي .

وما هان علي اترك اخواني واحبابي بدون مايدرون بها الفرصة عسا الله ان موضوعي يكون سبب في رزق مسلم .

والسلام خير ختام ودمتم سالمين

الله يوفقك

وشكرا على الفكرة

مشكور على الفكرة الحلوة

الله يوفقك وأتمنى موافاتنا بالأخبار لاحقاً

السلام عليكم أخوي "عسى ماشر"
والله الفكره موجوده لها أسابيع في بالي لكن متردد لكن أعتقد انها فكره ناجحه بإذن الله
عموما بالتوفيق يارب ولا تنسى تحكينا عن تجربتك

في أمان الله

اشكر كل اخواني اللي مروا على الموضوع واللي شاركوا معي لا عدمناكم

اشتغلت امس واليوم في الثمامة (طعس التحدي) اللي في الرياض لكن للاسف ماحسبت حساب الوقت كان اختيار الوقت غير موفق لانه مصادف ايام رواتب والناس مشغولة في الاسواق وقضاء حاجات البيت والاهل لكن على كذا الحمد لله قبل كل شي وبعده .

كان صافي الربح اليوم الاول اللي هو امس 96 ريال واليوم الخميس 147 صافي ربح بالضبط .

واتكلمت مع واحد يمني راعي ماطور هواء قالي انه الاسبوع هذا مافي شغل بالعادة كل نهاية اسبوع يصفي ما يقارب ( 400 -600 ) ريال اربعاء خميس جمعة ، واعتقد انها اكثر من كذا لانه جيته اخذ منه صرف 100 ريال وقتها طلع اللي في جيبه لقيت عنده اربع جيوب في الجكيت اللي لابسه كم ورقة خمسمية وميتين ومآت وخمسينات بعد غير الفكة ما شاء الله انا ما حسدته لكن واضح انه الشغل يكسب .

في النهاية احبتي واوخواني في الله الاسبوع هذا ما الله كتبلي فيها مكسب كبير والحمد لله . لكن الاسبوع القادم ان شاء الله بجرب ولازم باذن الله احقق اللي في راسي .

ودمتم سالمين

والسلام خير ختام

تحياتي لك ولطموحك وهمتك العاليه .