للشاعر : يحيى بن شيبان

صك الخطوط ولا تبقـّي ولا خط=حتيّش لو ضاقت علينا الوسيعه

تعبت انا وياك بالشيل والحط=حرام تشري في هوانا وتبيعه

راح الربيع وصابنا شدة القحط=وين الزمان اللي تقفى ربيعه

لا يا سبب ضيقي وبلواي والضغط=شخصن شراك شلون تقوى تبيعه

وقف وصارحني على ويش بالضبط=كل يوم ترفع لي سيوف القطيعه

يا شيخ كانك تبدي الحل والربط=عطنا فتاوي من فتاوى الشريعه

يا شيخ تكفى بلغو كاتب الضبط=كوده يحطم لي سدودن منيعه

شِح المواصل يلحق نفوسنا حبط=ضاق النظر لو الفيافي وسيعه

اشوف في يده الكباريت والنفط=واخاف من نارن تجيني سريعه

زاد الحمول وحطها فوقنا حط=والنفس شالت شي ما تستطيعه

عجزت اعدل في المقامات والبسط=ضاع الجواب وضاع فكري جميعه

ضاع الجواب وصايب اوراقنا خلط=والكل منا يمسك ادنى ذريعه

قمت اجمع الأوراق تجميعها لقط=جمع الشفوق اللي يهاب القطيعه

الحقتني خبطن على سابق الخبط=ارضيك وترضى لي دروبٍ شنيعه

خليتني طرقي على مفرق الخط=ضيعتني بين الخطوط السريعه

حطيتني في موقفن صعب ينحط=ينحط فيه اهل النفوس الرفيعه

تاخذ ولا تعطي ولا قلت لك عط=عكس البنوك اللي تحفظ الوديعه

اخِشى الحليم الى دنت حالة السخط=ينسى هواك وكل شي ٍ يبيعه

يا شريم تتعبك المنافيخ والشفط=لأن حوبة المظلوم عجلة سريعه

البط له جنحان ولا يقدر البط=يكفخ جناحه والمسافة رفيعه

جدد هوانا دون قيد ٍ ولا شرط=قم وإستلم قلبي سوات الوديعه

شاعر وينظمها على قافي النبط=يعطي نصايح ليت يومن تطيعه