للشاعر : يحيى بن شيبان

القلب عن شوق الغنادير مغلوق=بس صابني غرون بسهم ثلاثي

يمشي وخطواته على كامل الذوق=في جرّ خطواته يغيض الإناثي

اللي عليه الطول والعود ممشوق=ويصيب من يبغى بدون اكتراثي

سهوم يرسلها على قلب محروق=عاثي ولا مثله مع الناس عاثي

عرّض عليّ والخد مافيه مسحوق=جينات حسنه فيها شي وراثي

فيه الحسن غطى على كل مخلوق=وغطى على بنت الخواجات كاثي

قفى وخلاني مع الناس مسروق=عروق قلبي جث فيها اجتثاثي

زاد السهر عندي ولا غمض الموق=تقول صايبني شديد الغلاثي

لا يابعد من جال في قاصي السوق=لِد النظر للي يريد الغياثي

طوعتني طرق ٍ وحطيتي لي طوق=وخليتني فوق الاراضين جاثي

ان قلت انا حي ٍ وان قلت مشنوق=ولاّ السبات اللي حلومه ضغاثي

لك صورتن بين المعاليق من فوق=مرسومتن عندي في بعدن ثلاثي

جريت لي بعدك ثلاثين طاروق=موروثنا الأول بشكل ٍ وراثي

يا كود تسمعها وانا يمكن آروق=منها الحديث وفيها شي ٍ تراثي

العام لك عهدن وصنته عن البوق=صون العهد صونه بليا نكاثي

حلاة رقع الثوب لا صار مشقوق=في رقعتن وحدة ولا هي ثلاثي