لا عاد بي قدرة على قطع الاشواط=انا احمد الله كان عديت لي شوط

الذيب له عادة مع الناس يحتاط=والا تمكن يصبح الذيب ممعوط

يوم الحصاني طبعها تسحب بساط=وشلون مثلي يمسي اليوم مبسوط

ياشيب عيني بالدهر صاير اغلاط=كني من الدنيا على الراس مخبوط

شفني مع الدنيا من احباط في احباط=لا عاد تنشدني الا صرت محبوط

أهملت في نفسي الى حد الافراط=وانا في جلد الذات كل يوم في سوط

لا تحسبن قسط الفشل مثل الاقساط=ولا تحسبن عَـدّه مثل عَـدة النوط

ماتت هقاوينا مثل موت الانباط=ما كن لهم نقش ٍ وتاريخ وخطوط

راحو عساكرهم جنود ٍ وضباط=في ليلة الوقعة غدى الجيش مسخوط

راحت مع البدلة كثيرات الانواط=حتى ان كبير الجيش شافوه زعطوط

يا اهل الزنود اللي شديدات ونشاط=اتلا العمر يبقى لكم عود مخروط

اللي يصرّ المال صرّ ٍ بمغاط=لا بد له يوم ٍ على قبر محطوط

يحط في ثوب ٍ ولا جاه خياط=يحط في كفن ٍ على الراس مربوط

يوم القيامة ما بقى دونه اشراط=شفت الحسد شايع ولا فيه مغبوط

ما ينفعك جدك ولا كثر الاسباط=الله نقذ لوط ٍ وأفنى مرت لوط

حاولت اعدلها وفي الخيط مرباط=يا من يحل الخيط الا صار مربوط

الشاعر : يحيى بن شيبان

قناة الشاعر على التيك توك
https://www.tiktok.com/@shiban84

__________________
ومن يعمل من الصالحات وهو مؤمن فلا يخاف ظلما ولا هضما