السلام عليكم


اولا الستايل لونه ماهو عاجبني << عسى ماشر


ان شاءالله الموضوع بمكانه الصحيح لكي يطلع عليه الغالبية



في البداية
لم اكن اريد طرح ماحصل معي في توظيف الشباب السعودي
ولكن نصحني البعض بطرحه لإحتمال الإستفادة منه من قبل الإخوان الباحثين عن الوظائف
وممكن تكون الفائدة في المقابلات الشخصية


اعتذر مقدما لكل من لم يحالفه الحظ سابقا وان شاءالله يتوفق هالمرة



ابدأ وعلى بركة الله


الموضوع ومافيه اني سبقت ونزلت اعلان عن وظايف للشباب براتب 3000 الاف ريال مع زيادة 500 ريال بعد مرور 6 اشهر اذا اثبت الموظف كفاءة ومواظبة على العمل

وتم مقابلة عدد من الإخوان من هذا المنتدى
وحصل ان توظف اثنين منهم والباقين لم يجتازو المقابلة الشخصية

وسأتكلم بشيء من التفصيل

الإعلان كان بشروط كنت اراها سهلة
ثانوية عامة ويفضل دبلوم وجامعي
لغة انجليزية متوسطة
خبرة بسيطة في اي وظيفة او بدون خبرة
معرفة بسيطة بالحآسب الآلي

ومن أهم الشروط الجدية في التقديم على الوظيفة

وطلبت السيرة الذاتية من كل متقدم لكي اوصلها الى المدير وهو يطلب من يريد وانا أتصل على الإخوان وبعضهم والله اتصلت عليهم والمدير ماطلبهم وقلت لهم تعالو للمقابلة

والمدير أخ عربي وضد التوظيف السعودي لانه يرا عدم جدية الموظف السعودي وانا هو حرب وضرب على هالكلام
انا اجيب سعوديين وهو يجيب اجانب

الحاصل اني استقبلت لايقل عن 15 سيرة ذاتية
واتصلت على من تنطبق عليه الشروط

والله ثم والله ان المدير يضحك ويتكلم معي ويقول لك اسبوع وانت تتكلم وتقول بتجيب كفاءات سعودية وللحين ماحد جاا


ووقتها انا جتني طلباات كثيرة وبعضها يشكو قسوة الحال والبطالة

وصار الآتي


اولا بخصوص الإتصال على من تم قبولهم



الأول _

والله ولمدة 3ايام وانا اتصل عليه ومن جوالي الخاص وهو يقول انا في مكة ومرة انا في الطريق ومرة الراتب مايسوى
قلت له يالغالي في غيرك كثير تبيها والا لا

قال ارد لك خبر في المساء
قلت يالغالي رد خبر اكيد والا بشوف غيرك
قال ان شاءالله
انتظرته مادق
دقيت عليه 10 بالليل قلت له مارديت خبر
قال انا مسافر للدوادمي مدري قال مكة
قلت مع السلامة


,,


الثاني _

والله ثم والله ثم والله اني 4 ايام وانا ادق عليه وهو يرد ويسكت
الأخ يفكرني بنت مرسلتها خويته

ادق في الصباح والقى اتصاله آخر الليل :o

ارسلت له بعد كم يوم وقلت له انا حمد الشمري من منتدى البطالة
دق ويتعذر ويقول اللي مايعرفك مايثمنك

قلت يالغالي انت مقدم على وظايف لازم ترد على كل رقم يجيك
قلت له ياخي طلع رقم ثاني للمكالمات الثقافية وجوال للوظايف

قال ابشر ولايهمك

المهم الأخ سحب على سيفون اليم ومازلت اعاني آثار هذا السيفون



الثالث _

ادق عليه واقول له الموضوع كذا وكذا
رد قال مابي وظيفة
قلت الله يرزقك افضل منها

بعدها بكم ساعة دق اخوه الكبير
قال بخصوص الوظيفة ماعليك من فلان يبي يتوظيف
قلت يالغالي الرجال مايبي والموضوع ماهو غياب عن المدرسة

الموضوع وظيفة والتزام

قال ماعليك منه

بعدها دق الأخ الأصغر وقال انا موافق
قلت مبروك عقبال الملكة ههههههههه

والظاهر انهم اختلفو وماحد دق وادق ماحد يرد




بخصوص من تم الإتصال به وحضر للمقابلة


الأول

حضر وهو لابس نظارات شمسية طبعا الصباح
وسلمت عليه وقلت انا فلان قال هلابك
قلت كيفك مستعد
قال اي ان شاءالله
وبعدها غششته من المقابلة وقلت له بيسألك عن كذا وكذا
والأخ مصر على النظارة الشمسية
وانا اشوف انك اذا سلمت على شخص بينك وبينه عمل
المفروض تنزل النظارة
والاخ مانزلها ولا له نية
المهم قلت له المدير بيقابلك بعد عشر دقايق
قال طيب
وراح قابل المدير وهو لابس النظارة
وللأسف المدير تضايق منه جدااا
وماتم قبوله



الثاني _

ابو الشباب كااااااشخ كنه عريس ماشاءالله

وهالشاب اربع وعشرين ساعة وهو ماسك الجوااال ويكلم
اناديه وهو مايرد ويكلم
انتظرته لين خلص
قلت له المقابلة جا وقتها رح للمكتب الفلاني
قال طيب
والجوال في اذنه
ووصل لسكرتير المدير وقاله السكرتير استريح
والأخ ماسك الجوال ويكلم ويضحك ولاكنه بيقابل مدير بخصوص وظيفة
وقابل المدير والظاهر ان الجوال في اذنه عشان كذا ماوافقو عليه



الثالث _


والله انه جا وحالته يرثى لها
لا كشخة ولا لبس محترم
مادرري كيف قاط شماغه فوق راسه
وفاك الملكي مدري القلاب
والثوب من 38 سنة ماغيره
وانا هنا لا اشمت به
ولكن ليستفيد غيره فقط

الأخ لبسه اي كلام ولا عنده اهتمام بالهندام

وانا قايلهم كلهم ترا المدير يحب الكشخة المتزنة وبالشكل المطلوب

المهم مالله كاتب له نصيب

’’


وغيرها وغيرها

والله انا تفشلت من المدير
وقال وين الشباب السعودي

قلت لاتحكم على 10 او اقل او اكثر

قال مانحكم بس هذي عينة من شباب هذا البلد

المدير يقول

لو اسوي مقابلة مع كم مصري على سوري والله راح تشوف كل شي تمام

التزام بالمواعيد
تحضير جيد
اهتمام بالهندام

لكن الشباب السعودي
يأتي للوظيفة وهو يرا انه اكبر من وظيفة براتب 3 الاف ريال


بعدها قال ياحمد لاعاد تجيب لي موظفين سعوديين


قلت الا بجيب وراح اثبت لك كفاءتهم

المهم توظف كم واحد من اللي جبتهم


والله ان واحد منهم مايداوم الا عشر والدوام يبدأ 9

واسلوبه صعب مع الجميع
مع ان اوضاعه صعبة ومحتاج الوظيفة


لكن العقلية وماتفعل

والآن تركو الشغل كلهم

’’


المهم ان الآن حصل نقص والمدير بلغنا

قلت له انا بتحداك اني بجيب لك موظفين اكفاء

قال لاتحاول

قلت بنشوف

وانا احين طرحت الموضوع وان شاءالله القى شباب يبيضون وجهي


___


المدير العربي ليس سيء

لكنه حقاني
نظامي بشكل كبير
يهتم بموظفينه مهما كانو
طلب اجانب وانا رفضت وقدمت استقالتي
ورفضها وقال بيرفع راتبي الى الف ريال زيادة
بس انا قلت لا << مسوي مفاوض الاخ


وياويل من يفشلني



,,


السؤال هناا

هل الموظف السعودي غير كفء
ام ان الموظف السعودي يريد راتب جيد ومكان مريح



يوجد أكثر من شخص سعودي
حفرو الأرض حتى وصلو واثبتو جدارتهم ووصلو الى اعلى المراتب


,,


الله يوفق الجميع

والمعذرة على الإطالة

جزاك الله ألف خير بس ياليت تحط الشروط والمؤهلات
وأن شاءالله فيه شباب كفوووو ويبيضون الوجه .

الحمد لله والشكر الرزق جاي عندهم وارفسوه برجولهم
ليتني ولد كان قدمت
تمنياتي للجميع بالتوفيق

حمد أخوي الله يجزاك خير على تعبك
وألي مايبغا وظيفه ليش يغلب الناس معاه
لايطلب وظيفه خير شر
ماقصرت الصراحه وترك التعليق للشباب لأن الموضوع خاص فيهم بس حبيت أشكرك

فيه شباب شايف نفسه ومتكبر على الوظايف اللي بـ2000 او 3000

وهما مابجيوبهم ولا ريال مادري ليش

اخوي الله يوفقك وتلاقي شباب يبضوا الوجه

اولا الله يجزاك خير على مساعدتك لأخوانك العاطلين
ثانيا هذه مشكلة الشباب السعودي يشتكي واذا جات فرصه للعمل تعالى عليها

ربي يعينك , أشوف الفسق صآير كثير

انت مآقصرت إن شآء الله

وإن شآء الله يطلع لك كم وآحد يبيض الوجه

الله يوفقك ويسعدك ..

ووالله الوظائف ساعات يفشلونك السعوديين والسعوديات.. خصوصا اذا بتتوسط لهم..

وساعات رئيسك بالعمل يتشرط.. واللي انت تحاول تجيبهم مايقبلون بكلامك.. وعلى طول همهم الراتب.. اقبل بالقليل وبعدين ذا اثبت نفسك راح تترقى.. بس مين تفهم لاتفهم..

انت ما شاء الله عليك.. انا وحده وقفت اجيب وظائف..لا من النت ولا من القرابه..

اسكت واطنش اللي يبي يروح يدور..والعمل اذا يبون يسوون اعلان.. فعلا طفشت..


تعرف قرأت موضوعك.. وساعات العمل..6ساعات ونص.. وبراتب 3000ريال الله لو تحصل لي..والشباب رافعين نفسهم..

الله يخلف على زميلاتي شغل من الساعة 7 الصبح لين الساعة 9 بالليل متواصله وساعات دوام يوم الخميس.. والراتب مايوصل 1700 ريال..

[align=center][/align]اخوي حمد الله يكثر خيرك ويجزاك على سعيك ..
انا كنت موظف في شركة كبرى في الرياض لأكثر من عشر سنوات وكان الراتب لايستحق الاستمرار لكن مع ذلك تحملت وجلست فيه مع ان هناك من كان يستفزني بعملي ويحاسبني على اجتهادي ليس حرصا منه على العمل بل عدم رغبته بوجودي ومع ذلك تحملت واستمريت في هذا العمل ولكن بعد زواجي قبل سبع شهور زادت حدة المدير معي وغير دوامي للفترة الاخير من 11 ليللا وحتى سبع الصباح مع ذلك تحملت وكنت اخدم 300 الى 400 عميل في اليوم وهذا انتاج ممتاز بالنسبه للموظفين لكنه كان يحابي اخوي المصري وقدمت استقالتي بعدها بقترة اي قبل 3شهور تقريبا والان ابحث عن فرصة عمل مهما كان الراتب ولدي شهادتين في كيفية التعامل مع العملاء وشهادة انجليزي وشهادة استخدام الحاسب في الاعمال المكتبيه وخريج ثانويه عامة مع العلم انني احاول ارسال رقمي لكن اشتراكاتي قليله ونظام المنتدى لايسمح بأرسال اذا كانت اشتراكاتك تقل عن 25 مشاركة ولك خالص الشكر والتقدير