بسم الله الرحمن الرحيم

اسعد الله صباحكم ومساكم بالخير والمسـرات

بعيد عن الخطابات المرتبه والمقدمات المملـه

من منا مايتابع جرائد ومواقع انترنت ( مواقع التوظيف )

وكل ماطاحت عينه على وظيفه يدري انه بيقرى شروط

وكل ماقرى شرط يحط يده على قلبه يقول عساه يوافق مع

مؤهلاتي وخبراتي ..

بس فيه شــرط 80 % منا مايقدر يعديه ( ان شاء الله ماكون بالغت )

شرط هو ( ان يكون لديه/لديها خبره لمدة 5 سنين او 2)

لا ويقولك في نفس المجال


انا احس الي يحط هالشرط يقول بخاطره افلقوني لو احد توظف ؟

اللحين حنا نجتهد ونتعب وندرس وسهر وثلاثه مليون طن

شاي ابو كبوس والا ليبتون وحنا جالسين على الكتب ونجيب درجات ونتخرج من المدارس والجامعات والكليات وفي الاخير تقولي خبـره 5 سنين

نعنبوا بليسك من وين تبيني اجيبها

اذا طول حياتي ادرس متى تبيني اجمع لك هالخبره عشان تقبلني ؟

تخيلو شخص يتخرج من جامعه بيكون عمره لو هو دافور ( يعني ذكي ) ولا رسب ولا مره راح يكون عمره 22

ولو هو قالب الجامعه ملاهي الحكير مره يحذف ترم ومره رسوب ومره انذار بيكون عمره 24

ولو هو من المدرسه بيكون عمره 18

يعني على مايجمع خبره هالوظيفه الي يتمناها صك عمره 30

تخيلو عمره 30 وتوه يتوظف ولاصار عمره 40 يتزوج

ولا صار عمره 50 جاب عيال ولا صار عمره 60 تقاعد

< في الحسابات خبره وراح حياته عشان هالشرط


وش هالشرط التعجيزي والله لو انه مغارة علي بابا يمدي عرفنا محلها

بس هالشرط انا محيرني ماعرفت له جواب للحين ولا ادري وش قصد الي حاط هالشرط

بس نصيـــحه ياشباب وبنــات

لاتزوجتـو وجبتو عيال من قبل مايدخلون الروضه والمدارس

شف لك اي شركه اي مؤسسه وحطهم فيها لو ان شاء الله وظيفتهم ( فتح علب بيبسي )

عشان لاتخرج من الثانوي يكون عنده / عندها خبره 10 سنين

صدقني مايمديه يطلع من اخر اختبار نهائي من الثانوي الا والشركات تتلاقط عليه


انا ماستهزئ ولا انكت

بس والله شي يقهر ويرفع الضغط

لما تتخرج/تتخرجين بعد تعب ومعاناه من الدراسه وقرف الجامعه والكلية

واملك بهالحياه كلها بوظيفه تحسها لايقه او مقبوله مع تعبك

وفي الاخير يجي شرط يعجزك

بتقولون اشتغل فتره وبعدين قدم على وظيفه مرموقه

اشتغل وين ؟

اذا اغلب الوظائف الي تناسب شهادتك لازم خبره

يعني بسئلكم غير وظيفة حارس امن / كاشير / بائع / مندوب مبيعات ( تاخذ سياره الشركه وتقعد تفر تقول دوريه وجالس توزع كراتين ) بتنفعك هالوظائف بخبرتها؟

تحياتي للجميــع

دمتم

اخوكم

اخذيني

اخوي اتفق معاك في الراي وهذي المشكله يعاني منها الشعب السعودي

المشكله انه مكتب العمل يطلب الشركه بتوظيف الشباب السعودي وعشان هم مايبون يوظفون يحطو هذي الشروط عشان عارفين انه مافي شاب عنده هذي الشروط


وبذلك اذا سالهم مكتب العمل يقولون لهم احنا وضعنا اعلان ومحد تقددم على الوظائف



اخوي نقلبها مقهي وكزنوهات ارجل لنا من الليل للفجر ونوم النهار الين ابهتنا يطردونا من البيوت ونام في الشوارع



خلاص خربت ياباشه




مشكور على الطرح

فعلا اخوي ...
القصد تعجيز...لكن على الاقل هذي شركات ويمكن راتبها معقول ...لكن المشكله
بعض المدارس الاهليه تشترط خبره 3 سنوات وليت الراتب يسوى ما يتعدى الفين ..

مانقول غير حسبنا الله ونعم الوكيل ,,,

المشكلة انه يوظف عليها بنقالي مزور خبرته مهندس ميكانيكي وهو مايسوى كناس الله المستعان الناس كلها اليومين مظاهر والقادم مذهل اكثر

أخي الكريم

أنا عرضت على عدد من مدراء مدارس أهليه بالرياض

أن تتوظف زوجتي عندهم وبدون راتب

بشرط إني أنا أدفع راتبها بدون ماتدري زوجتي

وذلك لكسب شهادة الخبره ورفع معنوياتها المحطمه

وجميعهم رفضوا.. واستغربوا من عرضي..!!

وتوقعوا أنها خطة لشي ما

بالتوفيق للجميع... دمتم بخير,,,