والبيد لاقدام الخلاوي ركايب
وارواحنا لهموم بقعا معازيب
ومعزب الارواح قبر ونصايب
سبحان من يخفي عن العالم الغيب
وخلا الوعد من نازع الروح غايب
كلً يسوق الرجل ويروح ويجيب
احدٍ يجيك بسلم واحدٍ نهايب
واحدٍ يجيب الفود والعز والطيب
واحدٍ يذله كل ما كان جايب
من لا ستر وجهه عن الذل والعيب
ما عاد يلقى لذل وجهه طبايب
ومن لا حمى وجهه قبل طلعت الشيب
محدن يعوضه وجه لا صار شايب
ولا صار ذكرك فوق روس المراقيب
خلك على دربك ترى الدرب صايب
تصير بعيون النشاما كما الذيب
وفعيون عدوانك عطيب الضرايب
موت الفتى با لمرهفات المحاديب
اخير من حيً مع الناس خايب
موتً تباكا له عيون الاجانيب
ولا عيشـة تدعي عليها القرايب
ولي نفوسً ما تروم المواجيب
ولي يدين(ن) ما تسد النوايب
عذر الردي ما كل من يجهد مصيب
عود الحماطة كاسرته الهبايب
ما يخلف الهقوه طوال الاشانيب
صحيح من قال المراجل وهايب
غير النبي محدٍ بليا عذاريب
وكلً على الثاني سيوله جذايب
ليه؟ الحسد والغل والشك والريب
ليه؟ القطيعه واندلاع الحرايب
يولد الاحقاد شذب العراقيب
والغل سم ٍفالمعاليــق ذايب
شرارةٍ من ملحقين المشاهيب
من ناشته خلت ضلوعه حطايب
يومون با الامواس مثل القصاصيب
ذنبً يوقف منه قطر السحايب
ياعل من يفرح بشيل المشاعيب
ويصير في فرقا الرفاقه سبايب
تقطع عراويه من الرزق والصيب
ويموت ما تنظر عيونه حبايب
وتصف النفوس ويركدٍ المشاريب
لابه ذنب عقرب ولابه نشايب
هذا بعض ما علمتنا التجاريب
اللي من الايام جتني جلايب
لا كامل الا وجه من يعلم الغيب
ولا رابح الا اللي من الذنب تايب
[/frame]
23-01-2009, 03:56 PM
)
العرض العادي
