السلام عليكم ورحمة الله وبركاته

جتني وظيفه حكوميه تحديدا في كليه وطبعا صدر قرار التعيين وطلبو مني اباشر من يوم السبت .. طبعا انا كنت مقدمه على هالوظيفه وكنت انتظرها والحمد لله صارت من نصيبي بس اللي حيرني انا حاليا موظفه في بنك يعتبر من اكبر البنوك في السعوديه والحمد لله مرتاحه فيه وحابته مره على ان الدوام طويل مره وكرف بس مبسوطه فيه.

انا ألحين لما جتني هالوظيفه الحكوميه مره ضاق صدري وحسيت اني ماودي فيها بس اهلي ضاغطين علي ويبوني اترك البنك وكل شوي فاتحين معي سيرة عيوب البنوك وان الوظيقه الحكوميه اريح واحسن ..

احس اني احترت وتلخبطت اموري وجالسه اقارن بين الوظيفتين .. حابه اخذ رايكم وش تنصحوني فيه .. اسمع كلام اهلي واترك البنك ؟؟ والا استمر في البنك واعتذر عن الوظيفه الحكوميه؟؟

أختي العزيزة رأيي الشخصي إذا كان راتب الوظيفة الحكومية مثل أو أعلى من راتبك وقريب العمل من منزلك فأعتقد ان العمل الحكومي أفضل من البنك
صحيح إن البنك أتيكيت وتكييف مركزي وقهوة أمريكي وتركي وحركات بس لا تنسين إن البنك قطاع تجاري خاص معرض للخسارة والإفلاس في أي لحظة . بينما الحكومي أمان وظيفي وعلاة سنوية مقبولة نوعاً ما . بس إنه مافيه حركات إتيكيت زي البنك.

طبعاً أنا عاطل عن العمل ولا زلت أبحث وأنتي ما شاء الله محتارة في أي وظيفة تختارين والله أنتم يالبنات محظوظات

راتب الحكوميه اعلى من راتبي في البنك بشي قليل بس مو هذا اللي افكر فيه خوفي اطلع من مكان كله شغل واروح لمكان مافيه شغل <<< شي يذبح

الله يوفقك ويرزقك بالوظيفه اللي ترضي طموحاتك ..

يا اختي اتركي البنك عنك ونصيحه لوجه الله امسكي الوظيفه الحكوميه

ترى البنك شغلات الوساطه تدهر فيه وفي اي لحظه يتغير وضعك فيه

ومدري البنك الي انتي فيه يشتغل بفلوس حرام او لا ....؟؟؟

وظيفة حكووووووووووووووووومية افضل الف مرة ... لا تترددين ابدا وتوكلي على الله ... الفال لنا إن شاء الله قريبا ..

اتمنالك التوفيق اولاً

اول نقطه تسوينها صلي صلاة الاستخاره

وان شاء الله ترتاحين

اما وجهة نظري انا اشوف الوظيفه الحكوميه احسلك وافيدلك بكثيييير

عن البنك والاسباب كثيره

اول سبب انك راح تكونين مرسمه او يجيك الترسيم وتستفيدين احسن من البنك

ثاني سبب وش جاب لجاب وش جاب شغل الحكومه اللي ينتهي 2

عن شغل البنك الى الساعه 5

رايي الشخصي توكلي على الله وروحيلهم

اتمنى قدرت افيدك

لك خالص التحياتــ

اختي العزيزة عودك رنان :
انا بتكلم عن تجربتي الشخصية ليس القصد منها هو تحيرك او تخيرك و انما لكي تتكون لديك الصورة الكاملة وبالتالي تتخذين القرار ...

انا خريج محاسبة اول ما تخرجت كل اخوياي توظفو الي في الحكومة والا في القطاع الخاص ...انا نظرتي كانت رفض الوظائف الحكومية حتى لو يعطوني المرتبة 8 ..المهم توظفت في احدى الشركات العائلية ( مهيب لعائلتنا طبعا ) ..فانصدمت من الوضع اللي شفته كلهم سوريين مافي الا 4 سعوديين معي جامعيين ...المهم قلت ياولد اصبر هذا القطاع الخاص ...طبعا كان شعاري ( القطاع الخاص هو اللي يبرز الشخص ويكسبة الخبر اللازمة في اقل مدة من شغل الحكومة )..المهم كنت مبسوط في عملي لدرجة اني اتاخر في الدوام الى 7.30 مساء ..وحسو السوارية اني مجتهد واداوم 13 الى 15 ساعة ..قالو هذا لازم نكسر مجاديفة ..وفعلا وصلو لهدفهم الحقير ...لدرجة اني في نهاية السنة انضغطنا عشان الميزانية فكنت اطلع من الشركة الساعة 1 صباحآ وارجع الساعة 7 صباحآ ...ولاكن تفاجأت قبل اسبوع بقرار( فصلي ) ! ! ! !...مع العلم ان ماعندنا اوفر تايم وكنت ساكت ماقول شي...
وبعد اللي صار معي تحسفت على كل فرصة حكومية ضيعتها طبعا لاني كنت ارغب في العمل مع القطاع الخاص ....مع العلم ان عرض علي العمل في جهات حكومية مرموقة..وراتبها اقل من راتبي بشئ قليل ولاكن كنت ارفض...

الزبدة :
العمل الحكومي ممل ممل ممل لاخر درجة طفش x طفش...
العمل في القطاع الخاص صحيح كرف بس ولله كنت اداوم 13 ساعة تروح في لمح البصر...
لاكن زي ماقالوا الاخوان والاخوات ان الحكومة ضمان بعد الله ...والساعة 2 امسكي الباب..حتى انك تقدرين تطورين من نفسك بالدورات بعد العصر ..
لاكن القطاع الخاص ماتقدرين تطوريين من نفسك يالله يالله دوامك..حتى اني مرة سجلت في المعهد الثقافي البريطاني اللي في السفارات ..كانت الحصة تبداء 6 مساء ..اطلع من دوامي 5.30 وعلى ماأوصل السفارات وتفتيش 6 ..وارجع مرة ثانية للدوام واقعد الى الساعه 10 وارجع البيت هلكان ماشوف الطريق..شهر على ذا الحال..

الله يوفقك اختي واستخيري الله ..ولو اني ارجح العمل الحكومي ..لاكن يبقى القرار لكي........

مافي مجال مقارنه الوظيفه الحكوميه افضل بكثير يكفي الامان الوظيفي

لما قدمت على الوظايف في جامعه الاميره نوره قدموا معي بنات كثير موظفات ومنهم وحده اعرفها راتبها تقريبا 8000 ريال تشتغل في بنك اسلامي

قلت لها يله تبين وظيفه راتبها حوالي 6000 اقل من راتبك قالت كرفونا البنك هلكوني واخاف في اي وقت يطروني ابي امان وظيفي ودوام اقل

من رايي لاتضيعين وظيفه الكليه واهلك على حق

طبعا نصيحتي لكي الوظيفة الحكومية

اذا كانت الوظايف الحكومية ملل طفش

ليش احنا مانخلق الابداع والتميز فيها

ليش دايما الابداع للقطاع الخاص

ترى الحكاية في يدنا بس احنا شوي مستهترين

لازم يكون احد ورانا يكرفنا يعني

بالتوفيق لكي اختي ربي يقدملك اللي فيه الخير

توكلي ع الله وباشري دوامك بالكليه عمل حكومي ومكانه حلو

والله يوفقك اختي