السلام عليكم ورحمة الله وبركاته
انا عمري 19 معي شهادة ثانوي بس طبعا يمكن تستغربون يمكن تضحكون لاقلت اني انسانه ماعندي طموح وبنفس الوقت عندي طموح عاد حلوها يعني من داخلي محطمه ودايم اقول عن نفسي واكرر اني فاشله بس بعض الاحيان اتحمس وودي انقبل باي مكان واكمل دراستي واصيرر انسانه لي هدف بالحياه لي شي اطمح له بس مافيه ولاكليه ولاجامعه قبلتني سالت بالرياض رحت الخرج رحت الدلم رحت ضرماء ماخليت مكان خلاص تحطمممممممممممممممممممممممممممممممممت صرت محطمه بكل ماتعنيه هالكلمه ابي اشتغل طبعا زي ماانتو عارفين مافيه امل اشتغل والاقي وظيفه بشهادة ثانوي وانا صراحه ابي يكون لي دخل شهرري صحيح ابوي وامي مو مقصرين وربي كل شي ابيه يجيني بس لمتى بيصرفون علي ويكفي انه معي ثنتين نفس حالتي متخرجات من الكليه وبنسب عاليه ومراتب شرف وبالبيت خلاص ابي اشيل عن ابوي مصاريف وحده منا ارجوووووووووووووووووووووووووووووووووكم رجاا وتكفووووووووووووون الي عنده مشروع او فكره اي شي اصير منه ادخل مبلغ اصرف ع نفسي واساعد اهلي بليز مايبخل علي ابي تعطوني مشروع فكرره ع قدي ومنها اسد حاجتي والله يجزاكم الجنه ان ششاءالله
اختكم انسانه عالهامش

افتحيلك حساب في اي بنك

وفعلي محفظتك من الانترنت

واشتغلي في الاسهم

راس مالك 1000 ريال

شغلك وانتي في بيتكم على النت

هذا افضل مشروع واسرع لربح

العمليه سهله

اذا شفتي السوق نازل احمرر والناس خسرانه اشتري

واذا ارتفع بيعي

ترقبي نزوله مره ثانيه واشتري

ثم انتظري ارتفاعه وبيعي

يعني كم بيعه في الشهر ان شاء الله تكفيك وتغنيك عن اي شي

وبالتوفيق

شوفي اختي

انا فهمتك قصدك كيف طموحه و مو طموحه
انا كنت مثلك قبل كم سنه ودي اشتغل ودي اسوي شي
مترت المملكه كلها و شبرتها ما حصلت شي ابـــد

كثير قالوا لي خذي دورات تنفعك
اخذت الدورات اللي تصير في مدينتي
و لا دورة منها فادتني بشي صراحه غير اكتساب معرفه

انا اعرف نفسي اني انسانه بلا مواهب
غير اللهم الرسم و الرسم مايدخل شي

اتجهت للتصوير
لقيت عندي موهبه
بس ماعرفت استفيد منها
و لا اظنها تضمن لي دخل شهري

دخلت المطبخ اللي ادخله حسب المزاج
فكرت هالمرة اجرب نفسي في مجال الكيك
ياااااااااامااااااا كنت اشوف كيكات بالنت و اتهول منها :o
اقول هالكيك مستحيل يسويه انسان عاادي
لابد يكون عنده خبرات و دراسه طويله
و فوق هذا موهبه من الله وحده

و تصوري اني من فتره قررت اتعمق شوي في مجال الكيك
و ما اقصد الكوب كيك الخفيف هذا لا اقصد كيك الحفلات
إلى الآن أنا ماني مصدقه نفسي ان الطريق سهل قدامي
بحثت بالنت فتره لا بأس بها عن مكونات الكيك المطلوبة
المكونات اللي تميز كيك المناسبات الخاص عن الكيك العادي

كنت اتوقع يحتاج مهاره عاليه جداً و أدوات خاصه
طلعت السالفه مجرد إتقان أو اني انا اشوفها سهله و غيري يشوفها صعبه
المهم اني الحمد لله اكتشفت شي في نفسي ما كان ممكن اعرف عنه لو ما جربت

و الحين اقدر اقول لك ان كيكه مثل هالكيكه صارت سهله بالنسبه لي و اعتبرها كيكه مناسبه للمبتدأين و لو انتي مرررررررررة ما تفهمين بالطبخ شي سويها من طبق واحد بدل طبقين




مجرد تعرفين العجاين المطلوبه
و الفرق بينهم و متى تستخدمين كل وحده
و صدقيني السالفه مافيها لآ طبخ و لا أفران و لآ الحوسه اللي متصورتها
اللهم اللي بتطبخينه الكيك بس و تحتاجين يكون عندك شوية فن و خيال
عشان ترسمين و تسوين مجسمات لدباديب و عرايس و شغلات كذا

أنا تو بس بديت أفكر أحول هوايتي لـ مصدر دخل
لكن ماني عارفه كيف اخطط لها تخطيط صحيح
و ماعندي وقت لاني افكر بمشروع ثاني

فـ لو لا سمح الله و تعرقل المشروع
ببدأ أفكر بجديه أني أحول هوايتي لمشروع

سوووري طولت عليك
بس ابي أوصلك الوضع كيف
يعني انا وحده مثلي مثلك ماعرف شي
لكن يوم اني جربت و طولت بالي شوي
اكتشفت اشياء في نفسي ممكن تفيدني مستقبلاً
يعني شفتي كيف هالدورات اللي اخذتها ما فادتني بشي
لكن لما بحثت بنفسي و طولت بالي حبتين اكتشفت جانب فيني ماكنت اعرفه


يعني خلاصه الكلام
جربــــــــــــــــــــــــــي
لا تحطين توقعات مسبقه و تقولين هذا الشي بعيد عني
ترى و الله القدرات الكامنه في داخلنا ما يعلمها إلا الله


انتي جربي تزينين الكوب كيك
و تفنني و خربطي و مع التكرار
بتتطور عندك مهارة الاتقان ان شاء الله


الله يوفقك و يفتح لك باب رزق من عنده
و إيانا و المسلمين اجمعين إن شاء الله

اخواتي هذا احنا معانا شهادات
وش نفعتنا فيه
خليها على ربك بس ولاتضيعين وقت
ابدي باي مشروع صغير حتى لوكان ربحه قليل
يكفيك مجرد إحساسك بالإنتاجيه اللي مابعد جربته بس متأكده انه إحساس رائع

مشكوره اختي متعثره بس صراحه المطبخ وقسم بالله ماابالغ بس ماادخله الا لاجيت بسوي قهوة ماعرف شي ابد بالمطبخ يالله مكرونه مسلوقه تبيني ازين هالكيك
اذكر زمان يوم ناخذ اقتصاد منزلي بالمتوسط والابتدائي كنت اجي واقول يمه اخذنا كذا اليوم واجي اسويها طبعا كانو خوات يضحكون علي وع وش ذا وانا ويتطنزون علي لين الحين كرهته وربي ماابالغ الحين ماافكر حتى مجرد تفكير اني اتعلم اطبخ فشلون تبيني ازين هالكيك ،، ومره ثانيه اشكرك والله يوفقك ويرزقك

هلا بك تعبت ،، المشكله اني مدري وشو المشروع انا ابي مشروع صغير ع قدي بس ماحصلت

ادرسي فكرة كوفيه نسائي بسوق نسائي مزدحم بمدينتك
اعرف وحده بدت بهالمشروع والحين ما شاء الله عندها ثلاث كوفيهات
واعتقد هالمشروع كلفته بسيطه جدا
ربي يوفقك

كيف يعني اخوي وضح لي واشرك اكثرر عشان افهم ؟

صدقيني إلا ماتلاقين شئ انتي تحبينه بعدين حاولي تطورين نفسك فيه وعندك النت مجال واسع للبحث وتطوير المهارات اما انك تدورين على جامعة فلا تتعبين نفسك هي بس احساس انك جامعية لكن وظيفة سنعة مافيه وما يحتاج اقولك اخواتك بالبيت اكبر دليل على العموم التفكير بمشروع خطوة حلوة لا تخلينها تضيع منك ادخلي دورة في اعداد دراسات الجدوى وهذي تقدمها (منافسة ) مجانا بكل مناطق المملكة وتقدم ورش تدريبية وحتى الغرف التجارية القسم النسائي يقدم اشياء حلوة عن المشاريع الخلاصة ان هالدورة راح تخليك تعرفين كيف تخططين صح للمشروع اللي راح تبدين فيه وتعلمك ومن وين تبدين خطواتك وكيف تحسبين التكاليف والإيرادات وتعطيك تصور واضح لكل خطوات المشروع ..

وحبيت اقول للمتهثرة والله انك مو متعثرة بل ناجحة لأنك فكرتي صح استمتعت جدا بالكلمات اللي كتبتبها واتمنى اتمنى اتمنى تجيبين الاخ المشرف السروري على الطلب اللي طلبه ولك كل الود والتقدير ..