سلام عليكم ورحمة الله وبركاته...

صبــــــــاح .... مســـــــــاء
الــــخـــــــــــيــــــــــــــــــر


العلم خير يالربع ....


مشيت من الدمام الى الرياض يوم السبت الساعه 5 المغرب ووصلت الريا ض الساعه 8 بعد صلاة العشاء . والحمد لله كان الطريق شبه جيد من ناحية الهواء والغبار .
وصلت الرياض الا واخوي مستقبلني رحت معاه البيت وجهز العشاء والعلوم الطيبة ........اقلطوااا

المهم نمت تقريبا على الساعه 12 ونص وصحيت الساعه سبعه ونص الصباح قمت وطلبت الله وافطرت وجهزت اوراقي وكويت ملابسي وصارت الساعه تقريبا 10 صباحا وانا ما اعرف وين ربي قاطني بالرياض سالت عن الناصرية وصفوا لي ورحت لحد مالقيت لوحة مكتوب عليها ادارة كهرباء الناصرية قلت اجل وصلنا دخلت عالبوابه مسوي اني وزير المالية . قال السيكيوريتي هلا طال عمرك عاد سيارتي تحمس اللي يشوفني يقول الولد خطير منصب وسيارتي هي عباره عن لكز

كامري 2008

متحمسين الشباب يفكرون لكزس 460

المهم قال عطني بطاقتك قلت تفضل قال اجل تعال بالضبط الساعه 2ونص بعد الظهر قلت له ابشر قلت اجل بروح لمقهى نت والا باروح اسوي لسيارتي صيانه في هالثلاث الساعات الباقيه . وعينكم ماتشوف الا النور محلات النت بالرياض تقريبا كلها مقفله ماتفتح الا بعد صلاة العصر ومحلات صيانه تويوتا قالو خل السياره هنا وتعال بعد صلاة العشاء استلمها قلت تبطون المهم رجعت البيت عند اخوي وحفظت شارعين ثلاث شوارع كذا منها المروج والناصرية والنخيل والمصيف ماخليت مكان بالرياض طبعا لاتفكرون اني ادل الاماكن هذي الاماكن كلها وانا مضيع ضعت لحد ماقلت بس يوم صارت الساعه وحده قال اخوي (ياعلي ) قلت له لبيه قال لازم تروح الحين لان الملك الله يحفظة بيطلع لجامعه الملك سعود ولبعض الاماكن بالرياض عشان يضع حجر الاساس لبعض الاماكن الجديده ويفتتح اماكن جديده قلت الله يسهل دربه ويحميه قال يالله توكل على الله لانهم راح يقفلون الشوارع تقريبا وقت خروج الملك ووقت رجعته قلت له ابشر .
الزبده مشيت الساعه وحده وربع تقريبا ووصلت الساعه 1وخمس واربعين دقيقه لاداره كهرباء الناصرية وابشركم وصلت بسرعه ماضعت

لقيت مجموعه من الشباب السعودي الطموح الله يوفقكهم انشاء الله واياكم .

جلسنا نسولف للساعه اثنين ونص تقريبا وشالوا البطاقات مننا وجلسوا يطابقون الاسماء بغرفة السكيوريتي وطبختنا الشمس طبخ اول مره احس الشمس حاره بالبرد المهم نادوا باسمائنا ودخلنا لحد ما وصلنا عند نقطة الادارة نقطة تفتيش فيها مجموعه من العساكر برضة طبختنا الشمس وحنا ننتظرهم الزبده تقريبا عددنا يالموجودين 36 بتقولون لي ماشاء الله عليك عديتهم باقول لكم لا والله بس ان المهندس المصري اللي جلس يوزعنا سواهم مجموعتين مجموعه انا ومعي 17 شخص رحنا لغرفة عند التوربينات والباقين دخلو غرفة ثانية داخل معمل نسيت اسمه .
الزبده المهندس المصري الحبوب متساعد جدا ومحترم جلس يتاسف عالتاخير وجلس ينادي باسمائنا ويعيد ارقام جوالاتنا علينا عشان يتاكد من صحتها في حال كلمونا انشاء الله للمقابله والفحص بان الله وبعدها قال جاهزين قلنا جاهزين قبل مايقدم الاوراق علمنا بعدد الاوراق وقال 6 ورقات وقال كل واحد يكتب اسمه بخط واضح ووزع الورق عالشباب ومسكت القلم وكتبت (علي) ووقفت واستغفرت الله وكتبت في راس الصفحة بسم الله الرحمن الرحيم واستعنت بالله وكملت اسمي وبدأت احل الاسئلة سؤال سؤال طبعا جلوسنا انا وزملائي المتقدمين كان كل واحد مننا يشوف ورقة زميله بس الحمد لله الثقة موجوده محد غش :o
المهم الاسئلة فعلا كانت مناسبة لعقول ناس متخرجين من كلية تقنية سعوديه فعلا اسئلة مناسبة متوسطة الذكاء والصعوبة مقبوله بشكل عام .
السؤال الاول كان عباره عن اختيارات
السؤال الثاني عباره عن مسألة حسابية للجهد والتيار والمقاومة وغيرها ...
السؤال الثالث عدد واكر مميزات وعيوب و و و و و الخ .
السؤال الرابع عن المحولات والقواطع وغيرها من الدروس الكهربائية
السؤال الخامس رسمة حدد عليها المطلوب وغير ذالك ارسم رسم توضيحي للنجمة والدلتا ...
السؤال السادس ترجم الكلمات الانجليزية التالية الى كلمات عربيه

طبعا اسئلتي تختلف عن اسئلة اللي جنبي بس اللي مقابلني انا وياه سوا سوا يعني وناسه .

المهم طلعنا من الاختبار بعد ماقدم لنا المهندس المصري اكوابا من الماء الله يسقية ويسقيكم من مياه جنته انشاء الله .

طلعت من الاختبار ولقيت واحد من الشباب كان معاي بالاختبار ماكان عنده سياره ووصلته لبيته على طريق خريص وبعدها مشيت للدمام تقريبا على الساعه 5 ووصلت الدمام الساعه 8 والحمد لله تعشيت بالمطعم ورحت وانخمدت لحد الساعه 3 الفجر وصحيت واخذت جهاز اللاب توب حتى تقراو علمي .


وسلامتــــــــــكم

ممكن سؤال تلاحظون شىء في وقت خروجي من الدمام للرياض ووقت خروجي من الرياض للدمام .


كلها طلعت خمس العصر ووصلت 8 في الليل يعني سرعتي نفسها 200 امزح 140 واشوف اني متهور انتبهوا لانفسكم اخواني ..





تحياتي لكم
علي ال حيدر
:o

وانت سالم، وحياك وعلمك، الحمدلله على السلامة، ولاتعبت.

..



الله يوفقك ويرزقك الوظيفه
وتنطق في الرياض هنا



..

دكتــــــــــور بريطاني مرور يثلج الصدر من سعادتكم



عبدالرحمن مشكور ياقلبي ولي الشرف والله اكون بالرياض ..



تحياتي لكم حبايبىىىىىى وعقبال مانرد على مشاركاتكم




علي ال حيدر

والله قصة شيقة

زميل لي اختبر يوم الاحد الماضي الساعة التاسعة صباحا

واتصلوا علية اليوم الاثنين (بعدها بيوم واحد فقط) وافادوة انة اجتاز الاختبار التحريري وعندة اختبار عملي في يوم السبت 19 / 2 / 1430 هـ
الساعة التاسعة صباحا

انشاءالله يتصلون عليك
الله يوفقك

بسم الله الرحمن الرحيم


اخواني اصحاب الردود الجميله

1-فهد الحبلاني / بارك الله فيك وابشرك وابشر الشباب انهم اتصلوا علي واختباري مع اختبار زميل اخونا الصعيب الزلفاوي ...على كل حال ودي لك قبل ردي ..

2-مدور الهيـــن / لا يسعني الا ان اقول لك ترا الكايد احلا... وعساك ترقا للطروق وتوفق بحياتك ..ولك ايضا كل الود قبل الرد .. والقادم من القصص مذهل اكثر .

3- الصعيب الزلفاوي / اشكر مرورك المتواضع ايها الرجل السخي والطموح وعسى الله يوفق كل من سعى واتجه الى عمل يرضي الله ورسوله اتمني دعائك لنا ولك الود .

الصعيب اتتني رسالة خاصه منك تفيد بانك خريج كلية التقنية قوى كهربائية وانك تريد ان تتوظف بشركة الكهرباء وسالتني عن بعض المعلومات والمتطلبات للتقديم لمثل هذه الوظائف التي بحول الله وقوته ان نكون من موظفيها .
اولا: شركة كهرباء الناصريه هي شركة تابعه لوزارة المالية يعني(شركة حكومية)وليست تابعه لشركة الكهرباء السعودية سكيكو .
ثانيا: سجلت في هذه الشركه قبل مده طويله جدا قمت بالبحث في قوقل عن وظائف لشركات الكهرباء بالسعوديه وكان من حسن حظي ان ذالك الوقت كان وقت تسجيل في شركة كهرباء الناصرية ويطلبون دبلوم مع خبره وانا املك من الخبره في نفس تخصص القوى الكهربائية 3 سنوات تقريبا .
ثالثا: لم يطلبو معدل محدد او طلبات تعقيديه وتعجيزيه بالعكس كانت طلباتهم في ورقة التقديم على الوظيفة الانفورميشن سهلة جدا وسبحان الله اتصلوا علي وسالني المتصل وهو يبتسم من متى يا علي وانت مسجل فضحكت وقلت منذ مبطي .

عموما انا خليتك اخر الاشخاص اللي رديت عليهم لكي اشرح لك كل شىء يالزلفاوي .
والشىء الثاني شكلك وانت تقرا الرساله تقول غريبه وش فيه علي مارد علي برساله خاصه وانا اقول لك ليش لان اصحاب منتدى هذا الصرح العظيم قالوا لي لابد ان تصل مشاركاتك الى 25 مشاركه وانا مشاركاتي للاسف 17 لذالك اطلب منك السموحه لاني لم استطع ارسال رساله خاصه .

تحياتي لكم

علي ال حيدر

الله يوفقك

ياعلي هلا وغلا فيك وفي الجميع
ودي استفسر عن الاختبار العملي كيف طريقته بالنسبة للقوى الكهربائيه
انا اتصلو على وقالو اختبارك يوم السبت الساعة 9صباحا
وش يسألونا عنه بالضبط افيدونا يالشباب الله يجزاكم خير