السلام عليكم ورحمة الله وبركاته


اولا اخواني بما اني عضو جديد عندكم اتمنى من الله ثم منكم ان تقبلوني في هذا المنتدى المبارك

انا بقولكم قصتي تعبت وانا اكتمها داخلي لعل وعسى ان تصل الى أي مسؤول


انا اسكن محافظة حفرالباطن وانعم الله علي ورزقني وضيفة مدنية بأدارة مدينة الملك خالد العسكرية

ولكن يا فرحة ما تمت ............؟

فحصت بالمستشفى العسكري ورحت بصمت بالرياض وكملت جميع اجراءاتي وخلصت كل الاوراق

ولما رحت لهم قالولي مبروك وانتظر اتصالنا وسئلتهم قلت متى تتصلون قالولي خلاص هالشهر هذا يبدأ دوامك وتقدر تروح تشوف مكتبك

ورحت شفت مكتبي وتعرفت على موضفين وصار بيننا اتصالات ودعوات وانا اقول ياربي لك الحمد

فرجت .

طبعا بنفس اليوم الي بصمت فيه دقوا علي مكتب التجنيد وقالولي تعال انت مقبول عندنا قلت ولله الحمد توضفت وضيفة مدنية



انتظرت لمدة شهر محد دق علي ... شهرين ..... ست شهور ....سنة ..... وللحين محد دق وكل ما اراجعهم

يقولون قرارك ما جا من الرياض صبرت ولكن بدون نتيجة كانت اكبر صدمة مرت علي بكل حياتي

بعدها بسنتين قلت شكلي ابي اتوضف بالجيش ومالي الا هو ورحتلهم للمرة الاخيرة قالولي للحين ما جا شي


طبعا رحت لمكتب التجنيد وفحصت وبصمت من جديد ودخلت الجيش وانتم تعرفون معاناة الجيش

الراتب 3200 ريال والدوام من 4 الفجر من قبل ما تقوم العصافير الى الساعة 2 الظهر والخط كل يوم

70 كيلو رايح و70 كيلو جاي

تعبت تعب عند الله عليمه دوام وخفارات شبه يومي يعني اطلع الظهر وارجع المغرب استلم وانام عندهم ومافي ضابط ولا فرد الا وجازاني وعلشان شنو كلها يحاولون يهينوني وانا ارفض مثل ( قوم صبلي قهوة ... قوم نظف الحمامات ......) واذا رفضت جازوني

صرت ما اشوف اهلي الا 3 ساعات باليوم وعلى شنو على 3200 ريال وفي يوم من الايام رحت الى مكان عملي بالادارة لقيت مكتبي جالس عليه هندي وقلتله انت تشتغل هنا قالي ايه انا توني جاي من الهند واشتغل هنا
قلتله منو الي جابك قالي نفس الادارة جابت فيز عندنا وجيت انا وحطوني هنا في مكاني تعقدت نفسيا

تعبت نفسيتي صرت اسرح بالشي لمدة ساعة بدون لا احس من الصدمات الي جتني وما اقدر افصل من الجيش

علشان اخاف من كلام الناس وش يقولون عني ؟؟؟؟؟؟؟؟؟؟؟؟


هذي نصيحة من اخوكم لاحد يدخل الجيش لو تبيع مكسرات على الاشارات


ودي اوصل موضوعي هذا للمسؤولين ولكن ما اعرف اتمنى انكم تفيدوني وان تتقبلوني ضيف عندكم


والسلام عليكم ورحمة الله وبركاته



أخوكم / ضحيــة بلا ذنــــــب

اخووي ضحية الله يعينك على ماابتليت به بس بصراحه ماكنت احسب ان الجيش كذا لها الدرجه يهينون الواحد ولله لوني خدام عند ابوه الله يعينك ياخووي ويجزاك خير انك علمتنا ماهو مستور ولله يوفق ولله يوفق دين ودنيا

مشكوووووووووووور والله مادخل الجيش لو أقعد باطل في البيت

يحقلك اشكرك على مرورك ومشاركتك الرائعة

ربي يعطيك الف عافية

لا للواسطة ياليت الكل يردد كلمتك علشان ينحدون المسؤولين على تحسين اوضاع الجيش

مشكور على تعطيرك لصفحتي

دايما قول : لا الله الا انت سبحانك اني كنت من الظالمين، وربي بإذن الله يفرجها عليك

Dazzling girl


اشكرك على مرورك الكريم


وانا ولله الحمد من المحافظين على الدعاء في السراء والضراء

الله يعينك على بلواك أنا يأخوك نحشت منهم ولكن وصرت كداد أمتر الخطوط مرا رايح ومرا جاي لكن ما معقدتني ألأشي واحد البطاقة مختومة ما يمديك تروح يمين ولا يسار لكن ياخوك انت شفت اللي فيه فقر فقر بفقر شوفهم قبل الكوبري حق المحطة خط الحفر _الرياض خيام عشرين واحد متقاطين بخيمة عمود واحد لأتضحك هذا الواقع أنا كنت جندي راتبي 2800 وعلى قسط 1400 وش يبقى مع العلم أهلي خارج الديرة للحسبان والباقي 1400وش تسوي أسلك بالله تقول طق طق والله لو تطق طق منيا لحد بكرا ماحد سامعك والسيارة ماتصلح حقت مكدة ددسن 2005 غمارة هل يرضيكم هذا الوضع والله لو تعطيني ذهب خلاص من حبكم يازين عزلنا

هلا اخووي

وش تبيني اقولك زميلي في القطاع

ياخووك والله انها معااناة

انا مثلك بالقوات البرية بتبوك خدمت سنتين ونقلت الجبيل بواسطة ودوامت عندهم شهرين تعقدت نفسيااا كل يوم انقرية انقرية ونحمل طابووق كسر ظهورناا لا والخفارة اربغ ساعات ومع التطبيق 8 ساعات وناس مافيها خير ..
جتني نصايح من اخوياي المقربين طبعا خارج محيط الدوام لان اخوياك اللي بالدوام مايبون الخير لك اهل حسد ونميمية ومخدارات وش ترجى منهم .. ونسيت بعد حرامية جوالات ..

المهم انصحوني المقربين اني مترك الدوام لين تحصل وظيفة ثانية ..

والنفسية بدات تسووء المهم قررت بعد ماصحيت من النوم فجر الثلاثاء بتاريخ 24--8--1429هــ بترك الدوام واعلان اجازة رسمية لمدة 45 يوم طبعاا كل مسالني احد اقولة اجازة ..

وانا ساحب من الدوام حتى اتصل على واحد من الشباب بالدوام يبلغني باصدار قرار الفصل بتاريخ 16--9--1429هــ ..

حزنت كثيراا لفصلي ومع ذلك حسيت بهم زال من صدري ..

المهم قلت الحين ابي اعدل المهنة شلون الطريقة وخذ يامرمطة .. من شهر 11 الى هذى اللحظة معاملة جاية ومعاملة رايحة ..

والان اسوي اخلاءت الطرف .. يعني تخيل خمس شهور حتى ترفع الملف كامل للرياض ومناك تصدر الوثيقة لتعديل المهنة ..

اخوي ادري انة في ظلم وادري ان فية استقماط عند الضباط ...

وادري ان الافراد العريف والجندي اول والجندي ماكلها بالجيش لااجازات ولا رخص ولااعفاء وجزوات ..
وادري ان الرقيب والرئيس يذلون الجنود .. خاصة بالانقرية حسبي الله عليهم ..

المهم اخووي لاتترك عملك بل اصبر وصابر حتى تجد عمل افضل منة ..



صدقت وجبتها على الجرح

استقماط من ضباط وانقرية انا ما اهانني وعقدني ونزل راسي الا الانقرية


مشكور اخوي على المشاركة المميزة

ربي يعطيك الف عافية

ودمت بود