سولافتنا راح تكون عن شخصية عبارة عن خليط من عدة شخصيات تصادفنا في حياتنا اليومية دمجت هالشخصيات بشخص واحد هو محور سوالفنا القادمة فأتمنى لكم متابعة طيبة >>احس اني مذيع بالقناة الأولى

تنويه :الموضوع جديد وطازج من دميجتي الى ايديكم على طول يعني همسه للحلوين بلاش لطش اوكيه
بسم الله

نبدأ ..........

الأسم : زاحف بن داج بن عربج المهايطي
العمر : غير محدد لكنه يتراوح ما بين 24الصغرى و38 الكبرى
محل الميلاد : في بيتهم الطين في احدى قرى نجد
لون العينين : نفس لون عيون جده عربج
العلامة الفارقة : كله علامة فارقة بهالحياة

نبذة مختصرة :
زاحف انسان بسيط جداً ذو نخوة وشجاعة يمتاز ببعض الدلاخة والدفاشة لا يعرف شيئاً من الحياة سوى المصاقيل وعيال ابو دحيم وغرسه الفتاة الحسناء التي أحبها منذو خشونة أظافره .

ظروف ولادته :
كانت امه في حوش بيتهم تخض اللبن في القربة وحبات المطر قد شبعت جدران المنزل الطينية فكانت تخض شوي ثم تأخذ لقمة من طين الجدار ذو الرائحة الزكية وتستطعمها بلذة كما تستطعم حقات الاعلانات الجالكسي, وأثناء تمتعها بأكل الطين يقطع هذه اللحظات
صوت أبو زاحف وهو ينادي: عمشه ياعمشه وينك يامال الصمخ
أبو زاحف (داج ): هو ذلك الشايب المزواج الذي تزوج 6 نساء على امل ان يحظى بطفل يقول له يا بابا ولكنهن توفينا بعذرهن فلم يستحملن العيش مع هذا الوجه الأشلح الأملح بطباعه الحاده والصعبة فلم يستحمله سوى أم زاحف عمشه المسكينة ....

عمشه : خيـــــــــــــــــــر وش تبي ماغير تصارخ
: ليه البقرة مابعد حطيتي له ماء.
عمشه : وجع ! ماتشوفن حامل و تعبانه ومابي حيل اتحرك من مكاني
: أقول يامره اقصري هرجتس وروحي حطي له ماء قبل اوريتس شين مايسرتس .
عمشه : زين زين عويذ الله من شرك .

وأول مااقتربت أم زاحف من البقرة تقوم الأخيرة بتسديد ضربة من رأسها على بطن أم زاحف لترديها أرضاً تتلوى من شدة الألم

وهكذا ولد زاحف بعد ضربة قوية أخرجته إلى الحياة زاحفاً على بطنه ولذلك اطلق عليه اسم زاحف .

زاحف الطفل :
عاش زاحف طفولة سعيدة حيث انه كان وحيد والديه والمدلل لديهم فكان كثيراً مايتلقى لمسات حانية من عصا والده التي ياما غنت على ظهره ..
: زاحف ياالدلخ تعال >> اسم شهره منذو الطفولة
زاحف : ســـــــم يبــــــــه !
: أبيك تروح لم المزرعة وتاخذ صندوقين برحــي واحد توديه لم عمك أبودحيم بالدكان والثاني للبيت .

وبما ان زاحف كان طفل ذكي وفطين فقد فعل ماأمره به والده بالضبط لكن على مايبدو انه اخطئى قليلأ في فهم المقصود بالبيت حيث انه توجه بالصندوق الآخر إلى بيت العم ابودحيم بدل ان يحضره الى بيتهم ,
( أبا دحيم ) ذلك الرجل البخيل اللي يحب الريال اكثر من نفسه فكان من الصعب استرداد صندوق التمر من عنده وفي تلك اللحظة غنت العصا الأغنية المعتادة
طراااااااااااااااااح .

زاحف والمصاقيل :

كان زاحف طالب مجد ومجتهد وكل علاماته تبلغ مادون الحد الأدنى فلذلك هو محبوب لدى الأساتذه فكان من الصعب عليهم التخلي عنه بسهولة فجعلوه يدرس في الصف الرابع الابتدائي الى مالا نهاية ,وطبعاً بحكم خبرته في هذا الصف فكان هو العريف في فصله . وكان كثيراً مايحب الجلوس بجانب راشد ولد الأستاذ سليمان مدرس العربي ليستفيد من خبرته وخبرة والده وفي أحد الأيام شاهد زاحف مع راشد شيء غريب اول مرة يشوفه فقرر ان يسأله
زاحف : وشو ذا إللي معك ؟
راشد : هذي مصاقيل ؟
زاحف : وش يعني ؟
راشد : كور قزاز نلعب بهن ؟
زاحف : ايييييييه أجل ابقول لأبوي يجيب لي مثلهن >> مسيكين يحلم
زاحف : تكفى سلفني وحده بس وحده
فحصل على واحدة سلف والأخرى نطت في مخباه بدون قصدن منه >>> وش ذنبه هي اللي نطت .

في المنزل وأثناء الغداء :
زاحف : يبه
: خيــــــــــر وش تبي ؟
زاحف: ابي مصاقيل
:عصاقيل هههههه ماظن فيه أحدن معه أحسن من عصاقيلك ؟
زاحف : لا يبه مصاقيل الأستاذ يقول لازم تجيبونهن ولا ترا تصقطون
: إييييييييييييييييييه أجل أصقط وانا ابوك ماهنه شين جديد >> تحطيم

ومن هنا نما عشق زاحف للمصاقيل وكرهه الشديد لعصاقيله التي كنهن عصاقيل رقية في طاش ماطاش .




وبكذا اخذتم فكرة بسيطة عن بطل سولافتنا زاحف وإن شاء الله سيكون هناك قصص تحكي سيرة حياة هذا الإنسان تابعونا الحلقة الجاية ستكون بعنوان
(( زاحف والمدرس الخصوصي ))

اتمنى ما تحرمونا اطلالتكم وردودكم

هههههههههههههههههههههههههههههههههههههههههههه
ههههههههههههههههههههههههه
ههههههههههههه
انا اوووول وحده اتعررررررر ف على زاااااااااااااحف
بصراااااااااااااااااحه حلوووووووووه
وانتظرررررررررالسلسه
مشكووووررر

جاي انشاء الله سيرة كامله لزاحف بس انتظري

يعني ولولا ضربة البقرة ماشفناااااااا زاحف ,,,, كثر الله خير بقرتهم اللي عرفتنا عليه ......

الله يسعدك دنيا وأخرة

وننتظر الحلقة القادمة من مسلسل زاحف ,,,و

(( زاحــــــف و المُـدرس الخصوصي ))


كان زاحف منسدحاً في حوش بيتهم يشرب شاهي ويقشم فصفص على ضرسه اليمين اللي قدام لأن اليسار انكسر يوم صقع بعمود الكهرب وهو ينحاش من نعلة ابوه الطايره بالهوا >>كني دخلت بسالفة ثانية
وبينما هو مستمتع بأكل الفصفص والكراث والروائح الزكية تعبق في المكان يدخل والده
: يا الدلخ ابشر وانا أبوك
زاحف بوجه مفهي ومبتسم : هلا خير وش البشارة >> على باله شرا له مصاقيل
: اليوم بتروح لم الأستاذ شعبان عشان يدرسك كودك تنجح وتصير دختور >>> مليون سنة يفحط برابع ابتدائي ومتفأل يبيه دكتور
زاحف : هه , بس يبه أنا شاطر ودايم الأستاذ يقول الله يعظم أجر والدينك فيك
الأب : أييييييييه وهو صادق , قم قامت عصبك خذ قراطيسك و رح للأستاذ يدرسك .

في بيت الأستاذ شعبان ....
الاستاذ شعبان : أهلن يابني إزيك وإزاي بباك ؟
زاحف : والله ياستاذ ماعندنا غير بقرة وعنزن عرجا ومعي نبيطة موزيها بالزير فوق السطح عشان ابوي مايشوفه بس ماعندنا بباك
أبوي يعيي يقول ماتصلح >>> كل هذا اجابة
الأستاذ : بتئول إيه خلاص خلينا نزاكر أحسن
طلع كوراست العربي
زاحف : ماعندي هذي اللي تقوله . عندي كتاب ودفتر ابو وجه و وجه منشق الغلاف حقه شقه حمود ولد ابو دحيم ذاك ولد جيرانا يوم انه ......
الأستاذ : يابني حرام عليك انت بتحكي لي إصة حياتك
خلاص اكتب قوملة أسمية
زاحف : ايييييييييه اعرفه ذي قملة . ذاك اليوم لقيت قمله هذا كبره بشعري وامي بخت لي راسي بفليت عشان يروحن
الأستاذ : يابني مالك.. انت فمخك حاقه ..انت مش طبيعي.. إيه ده ؟
زاحف : وش رايك تقول لأبوي اني شاطر ولازم يشري لي مصاقيل


وبعد ساعتين قضاها زاحف يذاكر عند الأستاذ عاد إلى المنزل ليتفاجئ بأن أباه قد أحضر له هدية >>>خير وش الطاري
زاحف : صوت شهقة قوية ... يبه جبتهن لي
: إيه وأنا ابوك لك لحالك بس هاااااااا شد حيلك ابشوفك دختور >> ايه هين
زاحف : أوعدك يبه أصير أحسن من دختور والله لأكون بياع بمقصف المدرسة >>> أمحق طموح
ونام زاحف تلك الليلة قرير العين محتضناً مصاقيله الجديدة .

وذاع صيت زاحف في المدرسة بأنه الولد المدلل عنده مصاقيل و يدرس عند مدرس خصوصي لا وبعد لابس ***ريات جدد وصار يجيب معه مصروف ويشري من المقصف يعني تغيرت أوضاع الولد 180درجة فهرنهايتية >> والله ماني بسيطة
واصبح يعد من أبناء الأثرياء والكل يرغب في مصادقته بعد شعبيته الواسعة ..>> اوباما على غفلة

وبعد شهر حانت نتائج الأختبارات الفصلية وزاحف ينتظر سماع أسمه من المتفوقين الخمسة
وبعد مناداة حوالي 15 طالب نادى الأستاذ :
زاحف بن داج بن عربج المهايطي
زاحف : حـــــــــــــاضر
: الشهر هذا تحسنت درجاتك وبدل ماكنت تاخذ 5 من 15 صارت 6 من 15 رح بشر ابوك >> امحق بشارة

في المنزل وبعد الغداء

زاحف : يبه وش ابشرك درجاتي الشهر هذا زينة بالحيل يقول الأستاذ بشر أبوك
: ابعدي وانا ابوك ايه كذا هذا ولدي اللي يرفع الراس هالحين أقدر اكسر خشم أبو دحيم إللي بازن بولده اللي يدرس بالأردن
>> بيكسر خشمه عشان 6 من 15

وهكذا مضت الأيام وزاحف كل عصرية عند استاذ شعبان يذاكر له والأب سعيد بتغير احوال ولده إلى الأفضل حتى أنه لاحظ انه ماينزل الدفاتر أبد وبس قاعد فوق السطح يذاكر >> مايدري انه يرسم قلوب ام سهم بالدفاتر وينبط على عيال الحارة من فوق السطح
وجائت اللحظة الحاسمة التي سيكرم فيها زاحف أو يهان
زاحف قاعد أول واحد كاشخ ومشخص حتى النظارة الشمسية لابسها >> يحق له الشاطر
واستاذ سليمان ينادي على الطلاب :
محمد صالح صلوح ..مبروك
راشد سليمان .. مبروك
حمود سعد .. مبروك
... .... .... مبروك
انتهى جميع الطلاب ماعدا زاحف لازال ينتظر شهادة الشكر

زاحف بن داج المهايطي ...
زاحف بكل ثقة : بشر استاذ مبروك صح ؟!
الاستاذ : اكيييييد مبروك , مبروك علينا وجودك في فصلنا لسنه الخامسه على التوالي ماشاءالله محد سواها قبلك

عند باب المنزل ...
الاب : ابفهم دام إنك صاقط صاقط وش كنت تسوي عند الأستاذ
كل يوم ماخذ قراطيسك ورايح

زاحف : شسوي يبه كان الأستاذ يقولي( الأوستاز شعبان تعبان) و يخليني ألعب مع عياله وأحل واجباتهم

الأب : هذا من رداك يالغبي وانا قاعد اصرف على الناس عالفاضي بس خلاص ماهنه تعليم من بعد اليوم وخلك مع البقر وتلقيح النخل أزين
وغنت الخيزرانة ...


وهكذا ضاعت كل الامتيازات التي كان زاحف يتباهى بها وتلاشى طموحه في ان يصبح بياع في مقصف المدرسة
واصبح بلا شعبية او مميزات بل مجرد طالب مخلوع لا حول له ولا قوة >>مخلوع قوية
نعم فقد قام ابوه بخلعه من المدرسة بعد خبرة ألف عام قضاها في خدمة هذا الصرح , خلعه أبوه كما يخلع النعل القديم المهترئ ويلقى به في درام الزبالة الأخضر المنعفط من الأسفل والمصدي من الجنب .
وبهذا انتهت قصة زاحف مع التعليم وإلى اللقاء في الحلقة القادمة

تشاهدون في الحلقة القادمة ...>>> هنا يعني مشاهد من الحلقة القادمة عاد تخيلوا وعيشوا اللحظات

(( زاحف و الحب ))

زاحف : ياحبي لتس ولخشتس والله انه ازين خشة قد شفته بحياتي
فديييييييييييييييييييييييتك والله
............................................

؟؟؟ : ودي تمشيني عالبحر هيهيهيهيهيه >>> ضحكه ناعمة

.............................................
ياترى مين هالناعمة إللي تبي تمشى عالبحر

تعرفون الحلقة القادمة >> أوخص يالتشويق

***********************************
تـــــــــمــــــــــت