06-03-2009, 06:08 PM
|
 |
عضو مميز
|
|
تاريخ التسجيل: Jul 2008
المشاركات: 728
معدل تقييم المستوى: 332402
|
|
|
مؤمل خير والعطاله هههههههههههه
في البدايه نسمي بالله
اربطوا الأحزمه إستعدادا للإقلاع
العطاله كنز لايفنى , ياعيني على هالعباره!!
اكتب يومك , الله اكبر يا حمد بيل قيتس!!
لكن الشكوى لله باعني قصدي يعني مو مشكله الله يعينكم على حومت التسبد!! (وفي روايه الكبد لمن
لا يعرفون اللغه النجديه وتحديدا جيل البودي شوب والعثيم<<<شطحه  )
طبعا كان ودي والله بصور وكذا عشان صدق والله تسوون حمله لحظر هذا العضو المخيس
لكن للأسف داهمني الوقت!!
كيف داهمني؟!!
كنت ماشي على الدائري الساعه 2 في الليل وفجأه الا وراي دوريه و بعدين<<<يالأخو ترى
اللي داهمك الوقت ما قالولك قلنا قصة القسم
تخيلوا عاد عاطل ويداهمه الوقت!!
الله!!
قسمن بالله أول احتري تجيني لحظات أحك راسي فيها!!
ألحين من قوة الفراغ لو يقول ابوي ترى بكره بيجي عامل يصلح المكيف الصحراوي وبيغير
القش حقه رحت طقيت في المفكره حقت الجوال الصيغه التاليه :
عامل مكيف يغير القش الساعه الخامسه عصرا بتوقيت مدريد العاصمه<<< اما قش ومدريد استريح
ولا العاده سهر مع العيال وكذا بس يومها طقت الساعه 12 الا أقولهم يالله يا عيال استأذنكم!!
العيال طيروا عيونهم!!
سلامات وش فيك؟!!
عاد انا وقتها يعني عندي شي مهم وكذا وارفع خشمي عليهم كأن بوش داق علي
والله مشغول!!
الا واحد من العيال يمون يصكني بالمنديل على علباي يقاله يمزح<<<مشكله لين جلست مع سعوديين!!
<<<اقعد ياليوناني
احلى حمد مشغول وش عنده?!!
عاد هالسؤال سبب لي أزمه نفسيه خلتني مقعد الفراش ليومين من الزمن<<<يسمع بها
والله وراي توقيع عقد في إسطنبول مع شركة لميس , حسيت ان البناء بيوقف قلت حرام ما اكسر
خاطرها وبكره اروح لها خط واخلص الأمور واشوف كم تبي وارجع!!
حرام يا جماعه كسر الخواطر!!
عاد يا عليها وجه لين صاحت قسمن بالله ودي اطب في الشاشه وفي يدي فوطه
وامسح خشتها<<<ابوك يالرومنسيه
<<<اما وانا اقول فوطه حسيتني خباز
مالكم بالطويله إلا طفايه ماشيه مليون من واحد آخر من الأسبان اللي جالس معهم بس الحمدلله
جت سليمه , ودقت الباب وقلنالها الحريم مناك<<< اخبارك
وألتفت عليه وش فيك يا بن الناس؟!!
قال يلعن ام الخياااااانه!!
طيرت عيوني انا وغدت كنها ركب مشهبه<<<الله من زين التشبيه
اجل تروح لتميس ولا تاخذني وانا قايلك اني احبها ومستعد أبيع ما وراي ودوني عشان أسلم عليها
وفي الأخير تمسك خط لحالك؟!!
قلتله اول شي اسمها لميس التميس وجهك والله اللي لو دخلنا مطعم ولقيناك فيه مسكناه وقطعناه
نبي نفطر
اما انك تحبها فما ألومك قروي أحسن شي شفته في الحياه قميص هبه الدري في دارت الأيام
وتقول تبيع وراك ودونك؟!! يعنبوا بليسك كل اللي تملكه في الحياه جوال العنيد وشاشته مكسوره!!!
وبعدين تعال انت بتسلم على لميس؟!!
ياخي استح على وجهك تروع بنت الناس!!
وحده تشوف كل يوم وجيه تشق الوجه حتى لو حامت تسبدها من اللي عندها طلعت على المسلسل
الثاني وقزت مهند ابو وجه كله شعر تقول قنفذ لبناني وألحين تبي تسلم عليها انت وخشمك
اللي من كبره تقول شاحن لاب توب؟!!
تخيلوا يا جماعه اول ما تخلص البطاريه حقت الاب توب الا انا ماسك السلك وداسه في مناخره
اللي من كبرها لو يدخلون بزرين فيها ينومون كفتهم!!
الزبده الرجال حمر وجهه وصار كنه قلاية تيفال اللي لين احتمت طلعت نقطه حمراء في النص
وشوي بدا دخان يطلع من العبارات (المقصود خشمه)!!
انا وقتها بديت اكتب لأمي رسالة جوال : أمي الحبيبه , الأيام الحلوه بتعدي في ثواني , والواحد
مايدري متى يموت , ترى جعفر الزيدي راعي البقاله يطلبني 23 ريال تكفين لو جاني شي ذبيها
على جبهته اللي كنها تلفزيون بلازما 46 بوصه!!
وبعدين تم الإرسال!!
وأناظر إلا أشوف واحد وده يهج علي تقولون ثور شاف لون احمر!!
وتخبروني عاد انا خدودي حمراء فشكيت في وضعي<<<ايه بالحيل
والركب أبد مهيب سود كل من شافها قطعها معي
مالكم بالطويله قلت خلوني اختصر الموضوع واعترف بالحقيقه المره!!
وازبن ورا اقرب كنبه واصرخ قسمن بالله امزح منيب رايح لها أصلا موتري خربان<<<يسمع
بالتصريف
انا توقعت اني بندبج بنطق بموت لكن حصل مالم يكن بالحسبان<<<قسم اني ابي اكتبها من بدا
الموضوع يلعن ام الفله
الا الرجال يصيح!!
ولا مهوب اي صياح!!
الرجال يناشق يا جماعة الخير!!
عاد مشاءالله مع المناخر ويناشق مشكله!!
لقيت نص الأثاث في خشمه والنص الثاني وراه جاي طاير
وتطقني البتسوه(البكوه لحد يجي ويقول ترجم لابو من  ...<<<مشفر)
وش فيك يا بن الناس؟!!
قال حرام عليك تلعب في مشاعري وأحاسيسي وتعشمني اني بشوفها!!
مشاعرك واحاسيسك!! الله اكبر يا حياة الفهد<<<يلعن ام التشبيه
والله صارت علوم طويله وديته لشيخ يقرا عليه وحوسه خلوها على ربكم!!
تخيلوا من كبره يوم دخلته على الشيخ قال مشاءالله هذولي العائله
قلت لا صخر!!
طبعا طقني الشيخ لين قلت بس
المهم نرجع لمحور حديثنا اللي هو يومي الله يحييني<<<خليت فيها محور انت
طيب يا جماعه المفروض تحددون!!
تبون اليوم اللي اقوم فيه الصبح؟!! ولا الظهر؟!! ولا العصر؟!! ولا المغرب؟!! ولا العشا؟!!
ولا تالي الليل؟!! قسمن بالله مريت فيها كلها
لكن يالله بصير ولد محترم وأقولكم من الظهر لأني مستحيل مهما وصلت درجة من درجات الإحترام
ما راح اقوم الصبح مثل الآوادم
لحظه بالله صرخه على شغالاتنا ميرا تجيبلي بيره!! 
لحد يفهم غلط محلي ترى 
تدرون انا والله مااشرب بيره ابد ولا اطيق ريحتها!!
بس من العطاله والفضوه جربتها ومسكت معها خط
ورحنا لتركيا سوا<<<لين ألحين مصمم
طيب خلاص يالله بقووووم من النوم!!
هكذا يبدأ الشاب اللطيف حمد يومه , يصحى في الساعه الواحد ظهرا بتوقيت مدريد<<<برضوه مصر
الله لا يفوتكم شكلي وانا قايم!! , كشه منتفشه!! الفراش محيوس!! المخاد خارج نطاق السرير!! حشا
تقولون مصارع مو نايم
على طول أنصى دورة المياه وانتم بكرامه واناظر وجهي كذا في المرايه واحمد ربي على ما عطاني
وبعدين كذا اناظر زياده وتحوم تسبدي من وجهي واتفل عليه في المرايه واقول لو فيك خير كان
توظفت مو تاكي لين ألحين<<<يسمع بالعقاب الشخصي
غسلنا وصلينا وأجي عاد أفتح الاب توب , وعلى اني مغسل زين الا ان الغمص يحبني مره فتشوفوني
افرك عيني من هنا واظغط تشغيل الاب توب من هنا ومعركه انا والغمص وابشركم أخر شي عرفت
اني ما غسلت زين رجعت وفركته بديتول قلت هذا اللي ينفعلك يا كلب <<<مره عصبت
وعلى طول تكيه علىمنتديات البطاله(وجه متشقق من الخقه) زي كذا  <<<قل قسم
ترن الساعه اثنين ونص إلا ابوي يزأر في البيت الغداااااااااااااااااا!!
قسمن بالله على بالي أبوي خربها وبيطلع يحارب
نتغدا ومع الغدا أحلى تنتيف وفله وساعة صدر على الناس الموظفه والدارسه وبعدين نتفتين
من ابوي علي يالعاطل تحسسني بتأنيب الظمير وتخليني ما أكمل غداي واقوم اركض كذا وانا اصيح
ودموعي تطييير تشوفونها وراي في منظر خيالي ما تشوفونه الا في أفلام الكرتون وبعدين اصرخ
بأعلى صوتي انا مااحبكم ماااحبكم كلكم تكرهووني انا بنتحر<<<الله تخيلوا عاد هنا الموقف ابوي
وراي لا يا ابني ما يصحش كذا اقول ورا ما تنقلع عن وجهي خلني اكمل غداي
رجعنا بعد الغدا صلينا العصر وقلت يالله ما بدهاش وقت الرياضه<<<إعقل يا حسين عبد الغني
واروح لهالنادي مزقلب هالشنطه معي ابد من شافني قال هذا احسن رياضي في المملكه وما فيه فرق بينه وبين حسين عبد الغني
مع هالشحوم اللي طالعه كني مدرس خصوصي مصري
دخلنا النادي والله عاد في النادي تحف!! من جد يا جماعه تحف!! قسمن بالله لو قلبوا الأنديه الرياضيه
الخاصه عندنا معالم سياحيه ان نكسب
تشوفون ناس اشكال وألوان!! وكلهم سبحان الله رياضين 
ولا كلهم فاهمين ووخر عنهم!! واحد وزنه 220 تقول طبلون كامري 99
جراندي جنوط نيكل جناح فتحه جلد ماشيه 132000 للمساومه الرجاء الإتصال<<<مسك خط
يجي ينصح واحد ياربيه توه مسجل!! ترى الرياضه صبر ولازم تتحمل وتواصل!! يعنبوا بليسك علم
نفسك غاد كنك دوشق سليب هاي يمشي وتنصح
يالله ماعليه رقينا بنمشي على هالسير , تعالوا عاد شوفوا العالم الحلوه اللي تمشي , قسمن بالله حرام
فيهم السير اللي يمشون عليه!! اجل واحد مشغله يمشي خفيف مره ويكلم بجواله واقص يميني اذا مو
خويته اللي ساكنه في المغيبره : والله حبيبتي انا جالس امشي على السير ألحين , وخويته تسمع
بالسير ولا تدري وشو , هو لاعب عليها يقول السير هذا شارع يمشي بك وانتي واقفه
المشكله انه معصقل فيذا لو انفخه طار كنه قارورة هالبيره اللي بيدي 
ابد ناقصه لزاق مكتوب عليه هولستن وراسه ما يحتاج لبسه كاب احمر يغدي كنه فراوله وللبيع
واناظر يميني الا واحد يمينا بالله السير يقول ارحمني!! السير مسكين مافيه حيل يمشي!! 
والأخ مصر انه يشوف دخان اسود يطلع من تحت عشان يتأكد انه خلاص مستحيل يمشي ويخليه
وعلى فكره من بكره جيت نفس المكان وألقى مكان السير فاضي وفيه ورقه مكتوب عليها كان هنا سير
خلصنا من السيور قلنا يالله ننزل للحديد!! عاد هنا وخروا عنهم!! ناس تقول جبال تمشي مشاءالله تبارك
الله!! وناس من طقة البيره اللي على السير لابس دسوس (قفازات لعيال النيدو) وحاط حزام على بطنه!!
قسمن بالله من نحفه ان الحزام ياخذ لفتين على جسمه تقول ثعبان
يا رجال لو منك اروح أقرب صيدليه واخذلي حفايظ بانبرز حجم كبير أبو لزاقات تنمط مع الحركه وأجي
يالله ماعليه خلاص بلاش حديد مشينا المسبح!! وما أدراك مالمسبح!! يا ناس تعالوا شوفوا الأشياء
اللي تخلي الجميع يتحسف انه اشترك في نادي او فكر يمارس رياضه , كروووووش!! تعرفون وشلون
كرووووش؟!! الشعب السعودي يثبت أنه شعب الرز الاول في المسبح!! كل واحد بكرشته يا جماعة الخير
تحسون انه دبابات وهذي البطاريات حقتها
يعنبوكم ما تستحون؟!! واحد من كبر كرشه على بالي جايب كفر من كفرات سيارته ورابطه ببطنه!!
حتى اني فكرت اجيب اربعه جنب بعض وأجي فوقهم وأسوق
خلونا من حقين الكروش , تعالوا شوفوا الناس اللي ما تعرف تسبح!! ماسك الزاويه , ويدينه على الحديد
ولا على الجدران , وما يتحرك!! ولو قرب منه احد صرخ تقول جريمة اغتصاب
طيب وش الله حادك ومنزلك وتعال عاد علمه , اول ما تسمه اقوى صرخه لااااا واصكه على علباه
خير ان شاءالله يقول خايف والله طيب يا حياتي شوي شوي ويروح الخوف وامسكه مره ثانيه
الا صرخه اقوى من الأولى لااااااااا وهالمره مسكته غصب وغرقته عشان مايصارخ مره ثانيه طلع
المسكين من الروعه وخشمه يسيل ويناشق ابد تقول ظاطور صاكينه ب***ريه عصل مصل فيذا كنه
عود صيني حق الاكل
يعنبو بليسكم طالع من بيتنا ابي اغير جو!! اجي فيذا تجيبون لي الصمرقع؟!! تقول داخل مستشفى
كله عاهات!! يالله ما عليه يا حمد شغل موترك وأرجع بيتكم!!
رجعنا البيت وصلينا المغرب وبدت الإتصالات وموبايلي تدهر 
هاه وين اليوووووم؟!!<<<ان شاءالله في الإستراحه الخاصه ولا في الكامباوند!! الله من زين السؤال
زي العاده يا بيت بيتل يا كافي مونت وين يعني؟!!
واصكها في وجهه واروح اخذلي بيالة قهوه<<<كيف الحشيش
وبعد صلاة العشا أروح أمر المتواضع مدريد ونتجه للكافي , ونلقا باقي الشله الموقره , بيتل وعلوي
وابو عتيق و وأشكال وولد عمي نواف(وجه متشقق من الحب) وعاشق رونالدو وابو عساف والباقين
ما تعرفونهم
<<<حط اسم امك بعد
ونجلس طال عمركم سواليف , والله من زين السواليف!! الهلال جاب لاعب؟!! النصر وقع؟!! مدريد
انهزم؟!! وبعدين تتغير الوتيره شوي , يلعن ام العطاله , هاه ما لقيت وظيفه؟!! ما دق عليك فلان؟!!
أقول ورا ما تلفقونه انت وياه قلنا نغير شوي بلوت يا عيال؟!! ويالله بلوت!! حامت تسبودنا!!
قلنا اقول مالها الا هيفاء قصدي تبتدا ساعة الصدر , ويبدا الذب العالمي وساعه كامله راحت وحنا
دموعنا تنزل من الضحك , طبعا الذبات مشفره
يعني بالعربي , ما ورانا الا الضعوي 
جت الساعه 2 بالليل كل واحد يسلم على الثاني وفمان الكريم!! غدا يوم آخر
أرجع البيت , ظلاااااااام , كلهم نايمين وراهم مدارس ووراهم دوامات , وانا زي ما انا (وجه يصيح)
ادخل غرفتي , أشعل الإضاءه<<<قسمن بالله متعوب عليها
وادخل النت شوي , لين يذن الفجر , اصلي الفجر , اطلع القرموشي فطور , اصبح على وجيه الزيود
اللي هناك , طبعا صارت بينا صداقه من كثر مااجيهم 
اول ماادخل القرموشي هلاااا عمي كيف حالك والعالم تناظر وش ذا اللي يهلون فيه وانا عاد وقتها
يعنني راعي القرموشي<<<كيف يعنني قديمه صح
وافطر كذا لحالي وفال الجريده اللي خذتها من المحطه وانا جاي القرموشي , والله لو شفتوا وجه
اللي يبيع فيها , ابد تقول ضفدع وطاق نظاره
وبعد ما نملي الكرشه<<<افااا حتى انت
>>>لا يكون صدقت انك اسباني احمد ربك تراك مولود في القنفذة
الزبده رجعنا البيت , اخواني كذا يلبسون مراييلهم وأباتهم<<<الأبه تعرفونها؟!! قسمن بالله لين
ألحين ابي اعرف سبب التسميه ما قدرت
واخوي حمودي كالعاده يقاتل الخادمه في سبيل البقاء في الفراش حتى أجي شخصيا واخرشه
لينه ناط تقول جني
وطبعا هاللحظات هي احلى لحظات العطاله , تخيلوا كلهم بيروحون المدارس والدوامات وانا اقول يا
ميرااا شغلي المكيف حق غرفه انا عشان انوم
كل اخواني وقتها يناظروني نظرات حقد دفين<<<اسمع بدفين وحطيتها
, واطفئ الإضاءه<<<فيوبعدين ادخل غرفتي خاطري اكتبها
وعاد عشان يعني كذا احس اني رومانسي وجو حاط جنب السرير روايه , ابد من دخل غرفتي قال
هالولد اكيد مثقف وعلى طول يذبون علي ابن تيميه
اذا كان النوم لاعب في راسي وهذا هو الغالب فأنا تفلت على يسراي ثلاث مرات عشان بليس ما
ينشب في حلقي وانا نايم وياخذ الكنبل<<<عاش الدور
وحتى احيانا افقده اقول غريبه ماله حس
<<<حشا ولدك
واذا ما فيه نوم فتحنا هالروايه لاجاثا كريستي واروع عمري بهالجرايم لين تطقني الروعه وام الركب
وابوها بعد واعيش دور الخايف من القاتل واتغطا تحت الفراش عشان ما يجيني وانام
<<<قسمن بالله لو شاف القاتل سيقانك عطاك خمسه وقال هذي بحتسب فيها أجرك
وبكذا يكون يومي خلص<<<حشا لبن
واخيرا اكرر اعتذاري لان مافيه صور وكذا ولكن اذا ربي قدرنا وتأهلنا حطينالكم أهم الأسباب اللي
تخليكم تتركون النت وهي الصور وبعدها لكل حادث حديث<<<بعد هذي في خاطري
عاد تكفون ادعولنا ان الله يفرجها علينا يالعاطلين 
قسمن بالله من الفراغ قمت ألعب بلاي ستيشن 3 وأختم أشرطه
صح نسيت ترى اذا صار عندي شريط جديد اذا رجعت في البيت جلست عليه لين وقت الفطور والغالب
ان وقت الغدا يوصل وانا مانمت من الإدمان واحمدوا ربكم على العافيه
اتمنى اننا زرعنا الفجل على شفاهكم<<<فجل في خشتك
تقبلوا تحياتي... ( اقسم بالله اني ارد,اقسم بالله اني ارد,اقسم بلله اني ارد)
|
العرض العادي
