السلام عليكم ورحمة الله وبركاته

هذا أول موضوع ليه في المنتدى وياريت أشوف آرائكم

نبدأ بسم الله

في البداية طبعا أنا قدمت في صندوق تنمية الموارد البشرية قبل مدة

وبعد فترة من الوقت ومرور الزمن جاني إتصال وأنا توي نايم الصباح <== أوووووه يالله صباح خير

المهم بعد السلام قال معاك صندوق تنمية الموارد البشرية

أنا تفاجئت لأني بصراحة نسيت إني قدمت فيه من كثر ما أقدم

المهم قال لي الأخ اللي إتصل إن عندي مقابلة يوم الإثنين القادم
قلت إنشاء على خير


إنتظرت وإنتظرت وإنتظرت لين ماجى يوم الإثنين يوم المقابلة وأنا متفائل ومتحمس وماخليت شي

المهم وصلت لموقع الصندوق ودخلت ماشفت أحد في الإستقبال غير سكورتي جالس

السكورتي : نعم يا أخ تفضل

أنا : لا أخوي بس أنا عندي موعد مقابلة اليوم

السكورتي : لحظة إنتظر خليك جالس هنا

شوي و شويات

السكورتي : تفضل تعال شوف المكتب إلى على يدك اليمين روح هناك

وصلت المكتب
الموظف : تفضل يا أخ خير إنشاء الله

أنــــا : يا أخي الإسبوع اللي فات جاني إتصال منكم على إن أنا عندي مقابلة شخصية

الموظف : عندك ثانوية

أنــــا : إيه

الموظف : ماعليش أخوي إنتظر إتصالنا فيك إنشاء الله قريب يعني خلال هاليومين بالكثير

أنــــا : متحطم بعد الموقف (( إنشاء الله يصير خير ))


وطلعت ولا عاد أحد إتصل

بعد مرور إسبوعين قلت الظاهر شطبوني من الأسماء ماشوف أحد إتصل

قمت وبعثت برسالة إلى الصندوق وإلى المركز الرئيسي في الرياض أخبرهم وأشوف وش الخبر وش السالفة (( يعني كنت حاب أعرف وش صار )) مجرد إستفسار لا أكثر

يوم ثاني ماشاء الله إتصل فيني أحد الموظفين هناك

السلام عليكم وعليكم السلام وبعد السلام والتعريف

الموظف : يا أخ إنت أرسلت لنا رسالة على البريد الإلكتروني وماقلت أي فرع

أنــــــــا : أنا تابع قسم الدمام ياخوي

الموظف : نعم نعم ياأخ ماتعرف إنك أرسلت حق المركز الرئيسي في الرياض <== مادري ليه كان معصب الأخ ويرفع صوته كأني ماكل حلاله

أنـــــــا : يا أخي ماشفت أي بريد أرسل له الشكاوي غير هذا في موقعكم وإذا فيه إعطيني وأنا أرسل لهم

الموظف : طيب يا أخي إنت مستعجل ليه المفروض يا أخي تعرف إن هذي خدمة مجانية إحنا نقدمها لكم يعني أصبر عليهم شوي <== مادري ليه معصب الأخ وكأني طاق باب بيتهم وأطر لو ماكل من حلاله شي

أنـــــا : أعرف يا أخي لا تتوقع ماعرف وثانيا مشكورين على كل اللي تسوونه وثالثا أنا اللي أرسلته كان مجرد إستفسار ماهاوشت ولا إشتكيت على أحد كان كل اللي أبيه أعرف وش صار هذا لا اكثر

الموظف : (( صار هادي شوي )) ماعليش اخوي تعرف من هالمسائل بحاجة إلى شوي صبر وإنشاء الله يردون عليك في أقرب وقت وراح توصلهم كل المعلومات

أنــــــا : طيب خير إنشاء الله

وبعدها سلام وسلام وتحية

اليوم اللي بعده على طول

إتصل فيني الصندوق في الشرقية

ياهلا أخوي ترى وصل إيميلك وإنشاء الله نشوف وين المشكلة وإنتظر إتصالنا

أنــــــا : طيب ياخوي على الأقل أحد يعطيني خبر شي

الموظف : يا اخي تعرف إنت من ذوي الأحتياجات الخاصة ولازم نشوف لك شي يناسب

أنـــــا : طيب ومشكورين أخوي على الإتصال والتفهم

الموظف : بالعكس إحنا شاكرين لك


ومن ذاك اليوم لين اليوم ولا جاني أي شي وصار للسالفة هذي ألحين شهرين

وش رايكم ؟؟

يعني هم العادة كدة أو لا

ياريت أحد يفيدني

لا حد يقول لي روح راجع المكتب لأني كل ما أروح هناك يقول لي إنت مقدم عندنا
أقول لهم أيه
يقول لي إنتظر إتصال إنشاء الله
وهذا الحال في كل مرة أروح لهم


تحياتي

الله يرزق المسلمين من فضله

الله يرزقك عاد انت اتصلوا فيك انا ماحد عبرني ولاسال فيني واشتكيت الف مرة علي البريد ولاحد سال الله يوفقك انشاءالله