وش رايكم بالمركز السعودي البريطاني بالرياض

بنت طموحة · #19 (**permalink**) 22-03-2009, 05:31 AM

بااااااااااااااااااااااك

مراسلتكم الممرمطة رجعت لكم بتقريرها اليومي

وربي برتش كاونسل بيجيب لي جلطة

من جد رفعوا ضغطي

اليوم توكلت على الله ورحت لبرتش كاونسل عشان اسجل لأن اليوم اول يوم بالتسجيل
طبعا عينكم ماتشوف الا النور على اللي شفته لما وصلت

أنا رحت لهم قبل المغرب الله لا يوريكم على الزحمة والخبصة اللي لقيتها أرقام وحالة
ودخلنا غرفة وقالوا انتظروا وحنا بنناديكم على حسب الارقام

وانطقينا حول الساعتين وشوي وبعدين جاء دوري طبعا الموظفة تجي تقول لازم الدفع يكون كاش ماعندهم شبكة للأسف >> حشا داخلة بقالة مو معهد محترم

وبعدها قالت ادفعوا 50 ريال حقت تحديد المستوى ودفعناها على أساس اننا بنسجل الحين ونخلص
وسألت الموظفة قلت الحين وش الاوقات المتوفرة قالت انتي اول شي ادفعي قيمة الاختبار و اختبري وبعدين نتفاهم على المواعيد

قلت: متوفر يعني ولا لا؟؟

قالت: نقول ان شاء الله المهم هاتي الخمسين
قلت: طيب وش اللي تقفل عندكم ؟
قالت: بعد الاختبار نحدد لك وبعدين تعرفين
قلت : طيب ، ودفعت ودخلت لي البيانات ورحت أختبر
دخلنا قاعة فيها مدرسة بريطانية اسمها دانيال تعاملها حليو بصراحة مره

وعطتني ورقة اختبار وعلمتني الطريقة وكان الاختبار بصراحة مره حلو وفعلا احسه يبين مستواك الحقيقي عكس المعهدين اللي اختبرت فيه أحسه يقيس أكثر من هذوليك على انه مو سهل بالحيل بس كان طريقته حلوة مره
اول شي تعبير اكتبي عن نفسك
وبعدين معطينك جمل وفراغات تخص القرامر وبعدين زي البراقراف وفيه كلمات ناقصة المفترض اني اكتب الناقص على اساس اللي قبله
وبعد ماأخلص تقعد تسولف معك دانيال

عشان تشوف السبيكنق تبعك وبطريقة مره حلوة عشان تعطيك ثقة بنفسك
وفوق كذا لو وحدة غلطت تحاول تعلمها بطريقة حلوة خطاها عشان تعدله
المهم الين هنا حلو

عقب ماقضيت قلت حلو ابروح اسجل الحين وكانت الساعة تسع الا ربع تقريبا وانا خلاااااااااص قرفت مره من طول الوقت

إلا الموظفة قالت: الكلاسات مقفلة تعالي على 6/ مايو على الكورس الثاني
أنا: >>

قالت : فرصة سعيدة

قلت : لحظة لحظة!!

أنا قبل أدخل واختبر سألتكم ان كان فيه كلاسات مقفلة ولا لا ومحد رد علي

وبعدين على اي اساس اجيكم?? الحين وانا ابي اسجل وبأول يوم عشان اختار الوقت اللي يناسبني وأتفاجأ انه بعد ماسوينا الاختبار ودفعنا قيمته تجين وتقولين لا مافيه الحين وش هالاستغفال ؟؟

ضيعتوا وقتي على الفاضي وبكل بساطة تقولين فرصة سعيدة؟؟

قالت : لا لا عادي تطمني بالنسبة لنتيجة الاختبار تراها سارية المفعول لمدة ست شهور من تاريخ اليوم
أنا عاد فهيت >>

قلت: نعم!!! هو مضاد حيوي الله يطول لنا بعمرك؟!!!!

أنا جاية أسجل هالكورس وما أضمن اني أجي بالكورس الجاي
وأنا مفرغة نفسي عشان هالكورس وش ينطرني للكورس الجاي؟؟!!!!
قالت: عاد هذا اللي عندنا

قلت : الحين كل مااجي اسأل وحدة فيكم يكون هذا ردكم ؟؟ وش سالفتكم انتم ؟؟
ليش مابلغتونا قبل مانضيع وقتنا وخليتونا ننتظر كل هالوقت وخليتونا نختبر على الفاضي وش هالمهزلة ؟؟
طبعا البنات اللي جايين يسجلون معي نفس التذمر اللي تهاوش واللي تشرشحهم واللي شوي وتذبحهم على هالحركة
اللي تقول الحين أنا تاركة عيالي وبالقوة جاية واللي كان عندها اختبار وجاية تسجل واللي توها طالعة من دوامها وجاية

يعني الكل متذمر

والمشكلة ماعالجوا الموضوع بتقدير على هالطقة اللي انطقيناها ابد
وقالوا : خلاص يالله لو سمحتوا سياراتنا منلطعة من زمان نشوفكم بـ 6/ مايو
وقسم بالله ضرب الامبير عندي مليووووووووون بعد حركاتهم هذي

الحين أبسألكم بالله عمركم شفتوا معهد له شهرة كبيرة بالرياض تتقفل كلاساته من أول يوم بالتسجيل؟؟

كيف معهد كبير وله سمعته من سنة السبلة على قولة أمي مايكون مكانه كبير ومجهز لعدد كبير من الطالبات؟؟
عمركم شفتوا معهد محترم ماعندهم دفع الرسوم يكون كاااش؟؟

وين صارت هذي بالله عليكم؟؟

المشكلة اني محتاجة آخذ الكورس بمكان كويس بهالفترة ومافيني انتظر شهر ونص كمان

ولا فيه بالرياض معهد زي العالم والناس

كل المعاهد الموجودة ماتلقى لا منهج ولا مدرسات قويات

من جد انا محتارة ياعالم وش اسوي

بالله علموني وش رايكم بهاللي حكيتكم عنه ؟؟